ໃນກອງປະຊຸມຄັ້ງນີ້ ສະຫາຍ ສຸກຄໍາເພັດ ເຮືອງບຸດສີ ໄດ້ໃຫ້ກຽດເຜີຍແຜ່ເອກະສານ ວັນລັດຖະທໍາມະນູນ ແຫ່ງ ສປປ ລາວ ຄົບຮອບ 33 ປີ; ວັນຍຶດອໍານາດ 23 ສິງຫາ 1945; 23 ສິງຫາ 1975 ເຊິ່ງສະຫາຍໄດ້ຍົກໃຫ້ເຫັນປະຫວັດຄວາມເປັນມາ, ຄວາມໝາຍ ຄວາມສໍາຄັນຂອງລັດຖະທໍາມະນູນ ແຫ່ງ ສປປ ລາວ, ຕີລາຄາສະພາບການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍໃນໄລຍະປີຜ່ານມາ ໂດຍຍົກໃຫ້ເຫັນບັນດາດ້ານດີ, ດ້ານຄົງຄ້າງ, ບາງບົດຮຽນທີ່ຖອດຖອນໄດ້ ແລະ ບັນດາທິດທາງແຜນການທີ່ຈະໄດ້ພ້ອມກັນສືບຕໍ່ເພີ່ມທະວີການຈັດຕັ້ງປະຕິບັດລັດຖະທໍາມະນູນ, ກົດໝາຍຕ່າງໆ ໃຫ້ເຂັ້ມງວດ ແລະ ມີປະສິດທິຜົນໃນຕໍ່ໜ້າ ພ້ອມນີ້ຍັງໄດ້ຍັງໄດ້ຍົກໃຫ້ເຫັນປະຫວັດຄວາມເປັນມາຂອງການຢຶດອໍານາດ 23 ສິງຫາ 1945, ບັນດາເຫດການສໍາຄັນຕ່າງຂອງຂະບວນການຕໍ່ສູ້ຕ້ານລະບອບສັກດີນາແບບເກົ່າ ແລະ ແບບໃໝ່ ເຊິ່ງມັນສະແດງໃຫ້ເຫັນເຖິງຄວາມເສຍສະຫຼະ, ຄວາມເດັດດ່ຽວຕໍ່ສູ້ບໍ່ຍອມຈໍານົນ, ນໍ້າໃຈຮັກຊາດອັນສູງສົ່ງ ແລະ ຄວາມສາມັກຄີເປັນປຶກແຜນຂອງປວງຊົນລາວທັງຊາດ ຈົນສາມາດຍຶດອໍານາດນາດ ໃນວັນທີ 23 ສິງຫາ 1975 ທີ່ໄດ້ກາຍເປັນຂີດໝາຍສໍາຄັນຂອງການປະຕິວັດລາວ. ຈາກນັ້ນ, ສະຫາຍ ປອ ດາວບົວລະພາ ບາວົງເພັດ ໄດ້ໃຫ້ກຽດເຜີຍແຜ່ເອກະສານວັນຄ້າຍວັນເກີດປະທານ ສຸພານຸວົງ ຄົບຮອບ 115 ປີ (13/07/1909-13/07/2024)ໂດຍສະຫາຍໄດ້ຍົກໃຫ້ເຫັນປະຫວັດ, ຜົນງານການເຄື່ອນໄຫວປະຕິວັດ ຂອງປະທານ ສຸພານຸວົງ ໃນການຂະບວນການຕໍ່ສູ້ຕ້ານຈັກກະພັດຜູ້ຮຸກຮານ, ການເປັນແບບຢ່າງທີ່ດີໃນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ເຊິ່ງຄຸນງາມຄວາມດີຂອງທ່ານໄດ້ກາຍເປັນແວ່ນແຍງ, ບົດຮຽນອັນລໍ້າຄ່າ ໃຫ້ຄົນຮຸ່ນໃໝ່ນໍາໄປຜັນຂະຫຍາຍ; ເຜີຍແຜ່ຂໍ້ກໍານົດ ວ່າດ້ວຍລະບຽບການປ້ອງກັນສໍານັກງານ-ອົງການ ໃນເຂດຫຼັກ 6 ໂດຍໄດ້ລະບຸການເຂົ້າ-ອອກ, ການພົວພັນວຽກງານ, ການປ້ອງກັນສໍານັກງານ-ອົງການ, ບັນດາຂໍ້ຫ້າມ ແລະ ມາດຕະການຕ່າງໆຕໍ່ຜູ້ລະເມີດ; ໂອກາດດຽວກັນນີ້ ຍັງໄດ້ເຜີຍແຜ່ເອກະສານ ວັນເຊັນສົນທິສັນຍາມິດຕະພາບ-ການຮ່ວມມືຄົບຮອບ 47 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ ໂດຍໄດ້ຍົກໃຫ້ເຫັນມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຂະນົງແກ່ນຕະຫຼອດໄປ.