ໃນວັນທີ 18 ກໍລະກົດ 2024, ທີ່ຫ້ອງປະຊຸມ ຄະນະກວດກາສູນກາງພັກ ກົມຕິດຕາມ-ກວດກາ ການປະຕິບັດຜົນຂອງການກວດກາ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດພິທີມອບຮັບໜ້າທີ່ຫົວໜ້າກົມຕິດຕາມ-ກວດກາ ການປະຕິບັດຜົນຂອງການກວດກາ ຜູ້ເກົ່າ ແລະ ຜູ້ໃໝ່ຂຶ້ນ ລະຫວ່າງສະຫາຍ ເດດຕະກອນ ພິລາພັນເດດ ຫົວໜ້າກົມຕິດຕາມ-ກວດກາ ການປະຕິບັດຜົນຂອງການກວດກາ (ຜູ້ເກົ່າ) ແລະ ສະຫາຍ ກໍລະກັນ ສິງອຸດົມ ຮັກສາການເລຂາໜ່ວຍພັກ, ຫົວໜ້າກົມຕິດຕາມ-ກວດກາ ການປະຕິບັດຜົນຂອງການກວດກາ (ຜູ້ໃໝ່), ໂດຍໃຫ້ກຽດເຂົ້າຮ່ວມຂອງສະຫາຍ ໄຊຄໍາ ອຸ່ນມີໄຊ ກໍາມະການພັກ ຄະນະກວດກາສູນກາງພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ສະມາຊິກສະພາແຫ່ງຊາດຊຸດທີ IX, ມີຜູ້ຕາງໜ້າຈາກຫ້ອງການ, ກົມຈັດຕັ້ງ-ພະນັກງານ, ຄະນະກົມ, ຄະນະພະແນກ, ສະມາຊິກພັກ, ພະນັກງານ-ລັດຖະກອນພາຍໃນກົມ ເຂົ້າຮ່ວມ.

ໃນພິທີ ສະຫາຍ ເດດຕະກອນ ພິລາພັນເດດ ຫົວໜ້າກົມຕິດຕາມ-ກວດກາ ການປະຕິບັດຜົນຂອງການກວດກາ (ຜູ້ເກົ່າ) ໄດ້ລາຍງານການເຄື່ອນໄຫວນໍາພາ-ຊີ້ນໍາການຈັດຕັ້ງປະຕິບັດວຽກງານໃນໄລຍະ 2 ປີຜ່ານມາ ເຫັນວ່າສາມາດຍາດໄດ້ຜົນສໍາເລັດໃນຫຼາຍດ້ານ ເປັນຕົ້ນວຽກງານສຶກສາອົບຮົມການເມືອງ-ແນວຄິດ, ວຽກງານປັບປຸງການຈັດຕັ້ງ ແລະ ພະນັກງານ, ການປະຕິບັດໜ້າທີ່ວິຊາສະເພາະຕາມພາລະບົດບາດ ແລະ ຕາມການມອບ ໝາຍ ແລະ ຍົກໃຫ້ເຫັນບາງດ້ານທີ່ຍັງຄົງຄ້າງ. ພ້ອມນີ້, ສະຫາຍຍັງໄດ້ສະແດງຄວາມເປັນຫ່ວງເປັນໃຍມາຍັງສະຫາຍຫົວໜ້າກົມຜູ້ໃໝ່ ກໍຄືຄະນະກົມ, ຄະນະພະແນກ ເປັນຕົ້ນ ໃຫ້ພ້ອມສືບຕໍ່ເອົາໃຈໃສ່ນໍາພາສຶກສາອົບຮົມການເມືອງແນວຄິດ ໃຫ້ບັນດາສະມາຊິກພັກ, ພະນັກງານ-ລັດຖະກອນພາຍໃນກົມ ເປັນປົກກະຕິ; ເພີ່ມທະວີການນໍາພາ-ຊີ້ນໍາຄົ້ນຄວ້າ, ເຊື່ອມຊຶມ ບັນດາມະຕິ, ຄໍາສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດວາງອອກ; ຍຶດໝັ້ນຄວາມສາມັກຄີເປັນໝູ່ຄະນະ ຕາມຫຼັກການລວມສູນປະຊາທິປະໄຕ; ສືບຕໍ່ນຳພາ-ຊີ້ນໍາການຈັດຕັ້ງປະຕິບັດໜ້າທີ່ວິຊາສະເພາະໃນແຕ່ລະໄລຍະໃຫ້ບັນລຸຕາມແຜນການຢ່າງມີປະສິດທິຜົນສູງ. ພ້ອມນີ້ ສະຫາຍ ນາງ ດວງປີ ຈັນທະລັງສີ ຫົວໜ້າພະແນກ ຕາງໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງວ່າດ້ວຍການປະຕິບັດນະໂຍບາຍພາຍໃນໃຫ້ແກ່ພະນັກງານອອກພັກການຮັບອຸດໜູນບໍານານ ເຊິ່ງໃຫ້ກຽດມອບໂດຍ ສະຫາຍ ໄຊຄໍາ ອຸ່ນມີໄຊ. ຈາກນັ້ນ, ໄດ້ມີພິທີເຊັນບົດບັນທຶກມອບ-ຮັບໜ້າທີ່ຫົວໜ້າກົມຕິດຕາມ-ກວດກາ ການປະຕິບັດຜົນຂອງການກວດກາ (ຜູ້ເກົ່າ) ແລະ (ຜູ້ໃໝ່) ໂດຍພາຍໃຕ້ການເປັນສັກຂີພິຍານຂອງຄະນະພັກ, ຄະນະນໍາ ຕະຫຼອດຮອດສະມາຊິກພັກ, ພະນັກງານ ພາຍໃນກົມຕິດຕາມ-ກວດກາ ການປະຕິບັດຜົນຂອງການກວດກາ ແລະ ແຂກຖືກເຊີນ ເຂົ້າຮ່ວມ.