ໃນວັນທີ 22 ມັງກອນ ປີ 2024 ນີ້, ກະຊວງເຕັກໂນໂລຊີ ແລະ ການສື່ສານ ໄດ້ຈັດຝຶກອົບຮົມວຽກງານກວດກາພັກ-ລັດ ຊຸດທີ I ຂຶ້ນ, ທີ່ຫ້ອງປະຊຸມຊັ້ນ 5 (ຕຶກສີສະເກດ), ໂດຍການເປັນປະທານຮ່ວມ ຂອງທ່ານ ປອ ດາວບົວລະພາ ບາວົງເພັດ ກໍາມະການປະຈໍາພັກ ຮອງປະທານຄະນະກວດດກາສູນກາງພັກ, ຮອງປະທານອົງການກວດກາແຫ່ງລັດ, ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ແລະ ສະຫາຍ ປອ ສັນຕິສຸກ ສີມມາລາວົງ ຮອງເລຂາຄະນະບໍລິຫານງານພັກກະຊວງ, ປະທານຄະນະກວດກາພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ. ມີຄະນະກົມ, ທຽບເທົ່າກົມອ້ອມຂ້າງກະຊວງ, ຄະນະອໍານວຍການ ບັນດາບໍລິສັດທີ່ຂື້ນກັບກະຊວງ, ຄະນະພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ, ພ້ອມດ້ວຍນັກສຳມະນາກອນຜູ້ເຮັດວຽກງານກວດກາ ເຂົ້າຮ່ວມທັງໝົດ 84 ທ່ານ, ຍິງ 33 ທ່ານ.

ການເປີດຝຶກອົບຮົມວຽກງານກວດກາພັກ-ລັດຄັ້ງນີ້ ແມ່ນເພື່ອຍົກສູງຄວາມຮູ້, ຄວາມເຂົ້າໃຈໃຫ້ຜູ້ເຮັດວຽກງານກວດກາ ບັນດາກົມ ແລະ ທຽບເທົ່າກົມ, ບັນດາພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ ແລະ ພະນັກງານ ຂອງບັນດາບໍລິສັດ ທີ່ຂື້ນກັບກະຊວງ ໃນການເຄື່ອນໄຫວຈັດຕັ້ງປະຕິບັດວຽກງານກວດກາພັກ-ລັດ ໃຫ້ມີບາດກ້າວຫັນປ່ຽນໄປສູ່ຄຸນນະພາບໃໝ່ ເພື່ອເປັນເສນາທິການໃຫ້ແກ່ຄະນະພັກຂັ້ນຂອງຕົນ ກ່ຽວກັບວຽກງານຕິດຕາມ, ກວດກາ. ສໍາລັບບົດຮຽນທີ່ໄດ້ນໍາມາຝຶກອົບຮົມຄັ້ງນີ້ມີທັງໝົດ 15 ບົດຄື: ຄວາມຮູ້ພື້ນຖານກ່ຽວກັບວຽກງານກວດກາພັກ; ວຽກງານຕິດຕາມພັກ; ກວດກາການຈັດຕັ້ງພັກ-ລັດ ແລະ ສະມາຊິກພັກ; ພະນັກງານ-ລັດຖະກອນ ເມືອມີປະກົດການລະເມີດ; ລະບຽບວິໄນຂອງພັກ ແລະ ກວດກາລົງວິໄນພາຍໃນພັກ; ກວດກາພິສູດໃນວຽກງານກວດກາພັກ; ບາງບັນຫາພຶ້ນຖານກ່ຽວກັບຈິດຕະສາດໃນວຽກງານກວດກາ; ວິທີການສ້າງແຜນດຳເນີນການກວດກາ; ຄວາມຮູ້ພື້ນຖານກ່ຽວກັບວຽກງານກວດກາລັດ; ຄວາມຮູ້ພື້ນຖານກ່ຽວກັບການສະກັດກັ້ນ ແລະ ການຕ້ານສໍ້ລາດບັງຫຼວງ; ວຽກງານຄົ້ນຄວ້າແກ້ໄຂຄຳຮ້ອງຟ້ອງ, ຮ້ອງທຸກ ແລະ ຄຳສະເໜີ; ຄວາມຮູ້ພື້ນຖານ ກ່ຽວກັບວຽກງານຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ; ຄວາມຮູ້ພຶ້ນຖານກ່ຽວກັບວຽກງານການສືບສວນ-ສອບສວນ; ການແກ້ໄຂຜົນການກວດກາ ແລະ ຕິດຕາມ, ກວດກາການຈັດຕັ້ງປະຕິບັດຜົນການກວດກາ; ກົງຈັກການຈັດຕັ້ງ ແລະ ການບຳລຸງສ້າງພະນັກງານກວດກາ; ທັດສະນະຂອງພັກ ແລະ ນະໂຍບາຍຂອງລັດຕໍ່ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ.