​ວັນທີ 29 ພຶດສະພາ 2024 ນີ້, ຢູ່ທີ່ໂຮງຮຽນ ມັດທະຍົມຕອນຕົ້ນນາເໝືອງ ຄະນະພັກຮາກຖານກຸ່ມບ້ານນາເໝືອງ ເມືອງງາ ແຂວງອຸດົມໄຊ ໄດ້ເປີດກອງປະຊຸມໃຫຍ່ສະໄໝທີ IV ຂຶ້ນ, ໂດຍການເປັນປະທານຂອງ ສະຫາຍ ສົມດີ ອິນທະສັກ ຮອງເລຂາ ຄະນະພັກຮາກຖານກຸ່ມບ້ານນາເໝືອງ ແລະ ໃຫ້ກຽດເຂົ້າຮ່ວມຂອງສະຫາຍ ບຸນທີ ໄຊຍະວົງ ຄະນະປະຈຳພັກເມືອງ ຮອງເລຂາພັກເມືອງ, ປະທານກວດກາພັກ-ລັດເມືອງ, ສະມາຊິກສະພາປະຊາຊົນແຂວງ, ມີຄະນະພັກຮາກຖານ, ເລຂາໜ່ວຍພັກ, ສະມາຊິກພັກໃນທົ່ວກຸ່ມບ້ານເຂົ້າຮ່ວມທັງໝົດ 45 ສະຫາຍ,ຍິງ 8 ສະຫາຍ.

​ໃນກອງປະຊຸມ ສະຫາຍ ສົມດີ ອິນທະສັກ ຮອງເລຂາ ຄະນະພັກຮາກຖານກຸ່ມບ້ານນາເໝືອງໄດ້ຜ່ານບົດສຳຫຼວດນຳພາລວມ; ຮ່າງລາຍງານການເມືອງໃນການເຄື່ອນໄຫວໜ້າທີ່ວຽກງານໃນໄລຍະ 5 ປີຜ່ານມາ (2019-2023) ແລະ ທິດທາງແຜນການ 5 ປີໃນຕໍ່ໜ້າ; ຈາກນັ້ນ, ຜູ້ແທນກອງປະຊຸມກໍໄດ້ພ້ອມກັນປະກອບຄຳຄິດເຫັນຕໍ່ສະພາບອັນລວມ ແລະ ອັນສະເພາະ, ບົດສຳຫຼວດນຳພາລວມ ແລະ ຮ່າງລາຍງານການເມືອງຢ່າງກົງໄປກົງມາ, ຢ່າງພາວະວິໄສ, ເລິກເຊິ່ງ, ແທດເຖິງຕົວຈິງ ດ້ວຍຄວາມຮັບຜິດຊອບສູງ ເພື່ອເຮັດໃຫ້ເນື້ອໃນຄົບຖ້ວນສົມບູນຍິ່ງຂຶ້ນ. ໂອກາດດຽວກັນນີ້ກອງປະຊຸມຍັງໄດ້ດຳເນີນການປ່ອນບັດເລືອກຕັ້ງເອົາ ເລຂາ ຄະນະພັກຮາກຖານຊຸດໃໝ່ ເພື່ອມານຳພາ-ຊີ້ນຳວຽກງານ ແລະ ພັດທະນາກຸ່ມບ້ານນາເໝືອງໃຫ້ມີການພັດທະນາໄປສູ່ບາດກ້າວອັນໃໝ່ທີ່ດີຂຶ້ນກວ່າເກົ່າ, ເຊິ່ງຜູ້ແທນກອງປະຊຸມໄດ້ໃຊ້ສິດປະຊາທິປະໄຕປ່ອນບັດເລືອກຕັ້ງເອົາເລຂາ ຄະນະພັກຮາກຖານຊຸດໃໝ່ ໂດຍມີຜູ້ສະໝັກ 9 ສະຫາຍ, ຍິງ 0 ສະຫາຍ, ໃນນີ້ເລືອກເອົາ 7 ສະຫາຍ, ຍິງ 0 ສະຫາຍ, ກອງປະຊຸມຄັ້ງປະຖົມມະລຶກໄດ້ປະຊາມະຕິຮັບຮອງເອົາ ສະຫາຍ ບູລີ ຈັນທະມິດ ເປັນເລຂາ ຄະນະພັກຮາກຖານ, ສະຫາຍ ສົມດີ ອິນທະສັກ ເປັນຮອງເລຂາ ທັງເປັນປະທານກວດກາຄະນະພັກຮາກຖານກຸ່ມບ້ານ. ກອງປະຊຸມຄັ້ງນີ້ໄດ້ດຳເນີນເປັນເວລາ 1 ວັນ.