ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດພິທີເປີດຝຶກອົບຮົມວຽກງານຂ່າວສານກວດກາ ໃຫ້ພະນັກງານບັນດາກົມ-ຫ້ອງການ, ຂຶ້ນໃນຕອນບ່າຍຂອງວັນທີ 17 ທັນວາ 2024, ທີ່ສະໂມສອນຄະນະກວດກາສູນກາງພັກ, ໂດຍເປັນກຽດ ກ່າວເປີດຊຸດຝຶກອົບຮົມ ຂອງທ່ານ ປອ ດາວບົວລະພາ ບາວົງເພັດ ຄະນະປະຈຳພັກ, ຮອງປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ, ມີຜູ້ຕາງໜ້າຈາກບັນດາກົມ-ຫ້ອງການ ຄະນະກວດກາສູນກາພັກ-ອົງການກວດກາແຫ່ງລັດເຂົ້າຮ່ວມພິທີເປີດ, ການຝຶກອົບຮົມຄັ້ງນີ້ມີນັກສຳມະນາກອນ ຄກສພ-ອກຫລ ແລະ ກົມກວດກາກະຊວງປ້ອງກັນປະເທດ ເຂົ້າຮ່ວມທັງໝົດ 32 ທ່ານ, ຍິງ 12 ທ່ານ.

ໂອກາດນີ້, ທ່ານ ປອ ດາວບົວລະພາ ບາວົງເພັດ ໄດ້ມີຄຳເຫັນໂອ້ລົມ ຕໍ່ນັກສໍາມະກອນທີ່ເຂົ້າຮ່ວມຝຶກອົບຮົມຄັ້ງນີ້ໂດຍໄດ້ຍົກໃຫ້ເຫັນເຖິງຄວາມສຳຄັນຂອງວຽກງານສື່ມວນຊົນ, ເພື່ອສ້າງໃຫ້ວຽກງານສື່ມວນຊົນເປັນກະບອກສຽງໃຫ້ແກ່ຄະນະກວດກາສູນກາງພັກ ແລະ ອົງການກວດກາແຫ່ງລັດ ກ່ຽວກັບການໂຄສະນາເຜີຍແຜ່ວຽກງານກວດກາແຕ່ລະຂະແໜງການ ແລະ ແນໃສ່ເຮັດໃຫ້ທົ່ວສັງຄົມໄດ້ຮັບຮູ້ເຂົ້າໃຈເຖິງບົດບາດ, ໜ້າທີ່ ແລະ ຂອບເຂດສິດ ການເຄື່ອນ ໄຫວຈັດຕັ້ງປະຕິບັດວຽກງານກວດກາຢ່າງເລິກເຊິ່ງທົ່ວເຖິງ. ເປັນການປັບປຸງຄຸນນະພາບວຽກງານສື່ມວນຊົນຂອງຄະ ນະກວດກາສູນກາງພັກ ແລະ ອົງການກວດກາແຫ່ງລັດ ໃຫ້ມີຄວາມເຂັ້ມແຂງ, ຮັບໃຊ້ໜ້າທີ່ການເມືອງໃນໄລຍະໃໝ່ ຂອງ ຄະນະກວດກາແຕ່ລະກົມ, ເພື່ອບໍາລຸງຍົກລະດັບດ້ານການຂຽນຂ່າວ, ຂຽນບົດປະເພດບົດຕ່າງໆອອກວາລະສານ ແລະ ລາຍການວິທະຍຸວຽກງານກວດກາ, ວິທີຖ່າຍຮູບພາບເພື່ອອອກວາລະສານ, ລາຍການໂທລະພາບ, ເຟສບຸກວາລະສານກວດກາ ແລະ ເວບໄຊກວດກາ ໃຫ້ມີຄຸນນະພາບດີ, ເຮັດໃຫ້ເນື້ອໃນມີຄວາມຊັດເຈນ, ສ່ອງແສງໃຫ້ໄດ້ເຫດການສໍາຄັນ, ແທດກັບຕົວຈິງ, ທັນກັບເຫດການ, ວຽກດີຄົນເດັ່ນທີ່ເກີດຂຶ້ນຢູ່ພາຍໃນກົມກອງຂອງຕົນ.