ໃນພິທີສະຫາຍ ໂລ ອາຍິງ ຮອງເລຂາໜ່ວຍພັກ ຮອງປະທານຄະນະກວດກາພັກແຂວງ ໄດ້ຜ່ານບົດສະຫຼຸບຕີລາຄາ ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ແລະ ທິດທາງແຜນການປະຈຳປີ 2024 ເຊິ່ງສະຫາຍໄດ້ຍົກໃຫ້ເຫັນຜົນງານການຈັດຕັ້ງປະຕິບັດແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຂອງໜ່ວຍພັກ ໃນໄລຍະ 1 ປີຜ່ານມາ ເຫັນໄດ້ວ່າຄະນະໜ່ວຍພັກຄະນະກວດກາ ໄດ້ເອົາໃຈໃສ່ຕໍ່ການນໍາພາ-ຊີ້ນໍາສະມາຊິກພາຍໃນໜ່ວຍພັກຂອງຕົນປະຕິບັດໜ້າທີ່ວຽກງານຕາມພາລະບົດບາດ, ໜ້າທີ່ ຂອບເຂດສິດຂອງຕົນ. ເປັນເສນາທິການໃຫ້ຄະນະປະຈຳພັກແຂວງ ໂດຍ ປະຕິບັດຕາມກົດລະບຽບຂອງພັກ ສະໄໝທີ XI ຢ່າງຖືກຕ້ອງ, ມີຄວາມຍຶດຖືປະຕິບັດຕາມ 5 ຫຼັກການ ແລະ 3 ທິດນໍາຂອງພັກ ໃນການກໍ່ສ້າງພັກ-ພະນັກງານຢ່າງໜັກແໜ້ນ, ການເຄື່ອນໄຫວວຽກງານແຕ່ລະໄລຍະໄດ້ມີການສະຫຼຸບຕີລາຄາ ປະເມີນຜົນຂອງການຈັດຕັ້ງປະຕິບັດແຜນ ນໍາພາວຽກງານຮອບດ້ານ ແລະ ວາງທິດທາງແຜນການໃນຕໍ່ໜ້າ, ສ່ອງແສງລາຍງານໃຫ້ຂັ້ນເທິງເປັນປົກກະຕິ, ເຮັດວຽກປະຕິບັດຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ ແລະ ມອບວຽກງານໃຫ້ບຸກຄົນຮັບຜິດຊອບຢ່າງລະອຽດຈະແຈ້ງ, ສຽງສ່ວນໜ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງ, ມີການຊຸກຍູ້, ຕິດຕາມ, ກວດກາ ແລະ ມີການສະຫຼຸບຖອດຖອນບົດຮຽນ, ມີການປະສານສົມທົບຢ່າງກົມກຽວ ລະຫວ່າງການນໍາພາຂອງພັກ ກັບການເສີມຂະຫຍາຍພາລະບົດບາດ, ສິດ ແລະ ໜ້າທີ່ຂອງພັກ. ໂດຍຢຶດໝັ້ນອຸດົມການແນວທາງຂອງພັກ ດ້ວຍຫຼາຍຮູບການພ້ອມທັງເຊື່ອມຊຶມບັນດາມູນເຊື້ອຂອງພັກ, ຂອງຊາດແຕ່ລະໄລຍະເຜີຍແຜ່ ເຊື່ອມຊຶມແນວທາງການປ່ຽນແປງໃໝ່ ມະຕິ, ຄໍາສັ່ງ, ຂໍ້ກຳນົດ, ບົດແນະນໍາ ແລະ ກົດໝາຍຕ່າງໆຢ່າງຕໍ່ເນື່ອງ ສາມາດເຮັດໃຫ້ສະມາຊິກພັກ, ພະນັກງານ-ລັດຖະກອນ ມີຄວາມຮັບຮູ້ ແລະ ເຂົ້າໃຈດ້ານຄຸນທາດການເມືອງຂອງພັກເປັນຢ່າງດີ ເຮັດໃຫ້ສະມາຊິພັກມີຄວາມອຸ່ນອ່ຽນທຸ່ນທ່ຽງ, ມີຄວາມຊື່ສັດ, ໂປ່ງໃສ່ ແລະ ເຊື່ອໝັ້ນຕໍ່ການນໍາພາຂອງພັກ.

ຈາກນັ້ນສະຫາຍ ບຸນສະຫວັດ ເຫຼັກກັນຍາ ຕາງໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 459/ຄພຂ, ລົງວັນທີ 20 ສິງຫາ 2024 ວ່າດ້ວຍການອະນຸມັດມອບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023, ຂໍ້ຕົກລົງ ວ່າດ້ວຍການຍ້ອງຍໍສັນລະເສີນໃຫ້ແກ່ບຸກຄົນດີເດັ່ນໃນຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ແຂວງຜົ້ງສາລີ ປະຈຳປີ 2023 ສະບັບເລກທີ 01/ຄຊຂຍ ລົງວັນທີ 25 ມິນາ 2024 ໃຫ້ສະມາຊິກພັກທີ່ມີຜົນງານດີເດັ່ນທັງໝົດ 25 ສະຫາຍ, ຍິງ 8 ສະຫາຍ, ໃຫ້ກຽດຂຶ້ນມອບຂອງສະຫາຍ ບຸນທະວີ ສໍສຸກັນ.

ຕອນທ້າຍຂອງພິທີ ສະຫາຍ ບຸນທະວີ ສໍສຸກັນ ໄດ້ມີຄຳເຫັນໂອ້ລົມ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍມາຍັງໜ່ວຍພັກຄະນະກວດກາພັກ ແລະ ອົງການກວດກາລັດແຂວງ ທີ່ໄດ້ເອົາໃຈໃສ່ນໍາພາ-ຊີ້ນໍາການ ເຄື່ອນໄຫວວຽກງານຮອບດ້ານຂອງຕົນ ສາມາດຍາດໄດ້ຜົນງານໃນຫຼາຍດ້ານ ແລະ ສາມາດຍາດໄດ້ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2023, ພ້ອມທັງເນັ້ນໃຫ້ບັນດາຄະນະໜ່ວຍພັກ, ສະມາຊິກພັກສຶບຕໍ່ເຮັດວຽກງານການເມືອງ-ແນວຄິດ ໃຫ້ສະມາຊິກພັກ ໂດຍຖືເອົາການຮ່ວມຊີວິດພັກປະຈຳເດືອນ, ສືບຕໍ່ປັບປຸງແບບ ແຜນນໍາພາວິທີເຮັດວຽກໂດຍຖືເອົາຫຼັກການລວມສູນປະຊາທິປະໄຕ ນຳພາເປັນໝູຄະນະ ແບ່ງວຽກໃຫ້ບຸກຄົນຮັບ ຜິດຊອບ, ສືບຕໍ່ຮັກສາມູນເຊື້ອໜ່ວຍພັກປອດໃສ, ເຂັ້ມແຂງ, ໜັກແໜ້ນຕະຫຼອດໄປ.

ພາບ ແລະ ຂ່າວໂດຍ: ນາງ ຄອນຄໍາ ແສງເມືອງ ນັກຂ່າວຄະນະກວດກາພັກ-ລັດແຂວງ ຜົ້ງສາລີ