ໃນວັນທີ 19 ພະຈິກ 2024 ນີ້,ໜ່ວຍພັກຮາກຖານ ຄະນະກວດກາພັກ-ອົງການກວດກາລັດ ເມືອງ ສະໜາມໄຊ, ໄດ້ເປີດກອງປະຊຸມ ປະເມີນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈໍາປີ 2024 ແລະ ວາງທິດທາງແຜນການປີ 2025 ກອງປະຊຸມດັ່ງກ່າວໄດ້ຈັດຂຶ້ນຢູ່ທີ່ຫ້ອງປະຊຸມຫ້ອງການ ແຮງງານສະຫວັດດີການເມືອງ ພາຍໃຕ້ການເປັນປະທານຮ່ວມຂອງ ສະຫາຍ ຄຳໝັ້ນ ພົມມະແສງ ຮອງເລຂາພັກເມືອງ, ປະທານ ຄະນະກວດກາພັກ ອົງການກວດກາລັດເມືອງ, ສະຫາຍ ໄກສິດ ສີລາເພັດ ກຳມະການພັກເມືອງ, ເລຂາໜ່ວຍພັກຮາກຖານ ຄະນະກວດກາພັກ-ອົງການກວດກາລັດເມືອງ, ມີຄະນະກຳມະການປະເມີນຂັ້ນເມືອງ, ມີຄະນະພັກຮາກຖານ, ໜ່ວຍພັກຮາກຖານ ອ້ອມຂ້າງເມືອງ ພ້ອມດ້ວຍສະມາຊິກພັກພາຍໃນໜ່ວຍພັກເຂົ້າຮ່ວມ ຢ່າງພ້ອມພຽງ.

ໃນກອງປະຊຸມ ສະຫາຍ ຄໍາຕັນ ໄຊຍະລາດ ຮອງເລຂາໜ່ວຍພັກຮາກຖານ ໄດ້ຜ່ານຮ່າງ ບົດສະຫຼຸບການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ແລະ ທິດທາງແຜນການ ປີ 2025, ເຊິ່ງໄດ້ຍົກໃຫ້ເຫັນການຈັດຕັ້ງປະຕິບັດແຜນກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນເປັນຕົ້ນ ຄະນະໜ່ວຍພັກ ໄດ້ປັບປຸງ, ກໍ່ສ້າງ ແລະ ຂະຫຍາຍການຈັດຕັ້ງພັກຕາມ 5 ຫລັກການ ແລະ 3 ທິດນໍາຂອງພັກ ໂດຍຖືເອົາຄຸນນະພາບເປັນກົກ, ເອົາໃຈໃສ່ວຽກງານສຶກສາອົບຮົມການເມືອງແນວຄິດ ເພື່ອສ້າງໃຫ້ສະມາຊິກພັກມີຄຸນທາດການເມືອງ, ຄຸນສົມບັດສິນທໍາປະຕິວັດ, ມີຄວາມຮັບຮູ້ເຂົ້າໃຈ, ມີຄວາມເປັນເອກະພາບ ແລະ ມີຄວາມບຸກບືນຫ້າວຫັນເປັນທີ່ຍອມຮັບຂອງມະຫາຊົນ ແລະ ນໍາພາ ອົງການຈັດຕັ້ງມະຫາຊົນ ຕິດພັນກັບ ການນໍາພາ ປະຕິບັດໜ້າທີ່ການເມືອງ, ພ້ອມນີ້ ຍັງໃຫ້ເຫັນຜົນຂອງການດຳເນີນ ຊີວິດການເມືອງ ແລະ ການປະເມີນການກໍ່ສ້າງໜ່ວຍພັກ ປອດໃສ,ເຂັ້ມແຂງ,ໜັກແໜ້ນ ຂອງໜ່ວຍພັກ, ເຊິ່ງພາຍໃນໜ່ວຍພັກ ມີສະມາຊິກພັກທັງໝົດ 08 ສະຫາຍ, ຍິງ 2 ສະຫາຍເຂົ້າຮ່ວມການປະເມີນ 8 ສະຫາຍ. ຜ່ານການປະເມີນ ແລະ ຈັດປະເພດ ມີສະມາຊິກພັກແຂງ 08 ສະຫາຍ, ຍິງ 2 ສະຫາຍ ເທົ່າກັບ 100%. ພ້ອມນີ້ກອງປະຊຸມ ໄດ້ພ້ອມກັນ ລົງປະຊາມະຕິ ຕີລາຄາຄຸນນະພາບ ແລະ ການແບ່ງປະເພດໜ່ວຍພັກ ຕາມ 5 ເນື້ອໃນ ສາມາດບັນລຸ ຕາມລະດັບຄາດ ໝາຍ ຄື: ດ້ານການເມືອງ ບັນລຸ 1,9 ຄະແນນ, ດ້ານແນວຄິດ ບັນລຸໄດ້ 1,4 ຄະແນນ, ດ້ານການຈັດຕັ້ງ 1,4 ຄະແນນ, ດ້ານແບບແຜນການນໍາພາ 1,9 ຄະແນນ, ດ້ານການປະຕິບັດຕໍ່ຫນ້າທີ່ການເມືອງ 2,8 ຄະແນນ, ລວມທັງໝົດໄດ້ 9,4 ຄະແນນ, ສາມາດຍາດໄດ້ໜ່ວຍພັກຈັດໃນ ປະເພດແຂງ.