ໃນວັນທີ 15 ພະຈິກ 2024 ທີ່ຫ້ອງປະຊຸມຫ້ອງວ່າການແຂວງ ໜ່ວຍຮາກຖານຊາວໜຸ່ມ ຄະນະກວດກາພັກ-ອົງການກວດກາລັດແຂວງເຊກອງ ໄດ້ຈັດພິທີປະກາດໜ່ວຍຮາກຖານຊາວໜຸ່ມ 4 ບຸກ ຄັ້ງທີ 01 ປະຈໍາປີ 2024, ໂດຍໃຫ້ກຽດເປັນປະທານຮ່ວມຂອງສະຫາຍ ອ່ອນມະນີວັນ ຈັນດາວົງ ຮອງເລຂາໜ່ວຍພັກ, ຮອງປະທານຄະນະກວດກາພັກແຂວງ, ສະຫາຍ ມີນາ ບົວລະພາ ຮອງເລຂາໜ່ວຍຮາກຖານຊາວໜຸ່ມຄະນະກວດກາພັກ-ອົງການກວດກາລັດແຂວງ, ສະຫາຍ ແສງໂນພາ ມິກດາວົງ ວາການ ເລຂາຄະນະບໍລິຫານງານຊາວໜຸ່ມ ປປລ ແຂວງ, ມີແຂກທີ່ຖືກເຊີນຈາກໜ່ວຍຮາກຖານອ້ອມຂ້າງແຂວງ ພ້ອມດ້ວຍສະມາຊິກຊາວໜຸ່ມພາຍໃນຄະນະກວດກາແຂວງເຂົ້າຮ່ວມທັງໝົດ 29 ສະຫາຍ, ຍິງ 12 ສະຫາຍ. ໃນພິທີສະຫາຍ ມີນາ ບົວລະພາ ໄດ້ຂື້ນຜ່ານຮ່າງບົດສະຫຼຸບປະເມີນຜົນການປະຕິບັດຂໍ້ແຂ່ງຂັນ 4 ບຸກ ຂອງໜ່ວຍຮາກຖານຊາວໜຸ່ມ ຄະນະກວດກາ ແຂວງ ຄັ້ງທີ 01 ປະຈໍາປີ 2024 ແລະ ວາງທິດທາງແຜນການ ປະຈຳປີ 2025 ຂອງໜ່ວຍຮາກຖານຊາວໜຸ່ມ ຄະນະກວດກາແຂວງ ເຊິ່ງໄດ້ຍົກໃຫ້ເຫັນຜົນສໍາເລັດໃນຫຼາຍດ້ານສະແດງອອກຄື: ບຸກທາງດ້ານການເມືອງ-ແນວຄິດ ປະຕິບັດໄດ້ 94,00%, ບຸກທາງດ້ານການຈັດຕັ້ງ ປະຕິບັດໄດ້ 92,50%, ບຸກທາງດ້ານຝຶກຝົນຫຼໍ່ຫຼອມ-ຮ່ຳຮຽນ ປະຕິບັດໄດ້ 92,20%, ບຸກທາງດ້ານວິຊາຊີບ-ສ້າງວຽກເຮັດງານທຳ ປະຕິບັດໄດ້ 92,60%. ແລະ ຮັບຟັງບົດລາຍງານຂອງສະມາຊິກຊາວໜຸ່ມຕົວແບບ ໃນການສ້າງອາຊີບຫາລາຍໄດ້ເຂົ້າຄອບຄົວ, ບົດລາຍງານຂອງຈຸຊາວໜຸ່ມຕົວແບບທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານພາຍໃນຈຸ. ໂອກາດນີ້, ສະຫາຍ ແສງໂນພາ ມິກດາວົງ ຍັງໄດ້ໃຫ້ກຽດ ມອບ-ຮັບ, ໃບຢັ້ງຢືນ 4 ບຸກ ແລະ ໃບຍ້ອງຍໍຈາກ ຄະນະບໍລິຫານງານຊາວໜຸ່ມ ປປລ ແຂວງ ໃຫ້ສະມາຊິກຊາວໜຸ່ມທັງໝົດ 20 ສະຫາຍ, ຍິງ 09 ສະຫາຍ, ໃຫ້ກຽດຮັບໂດຍ ສະຫາຍ ມີນາ ບົວລະ ພາ ຮອງເລຂາໜ່ວຍຮາກຖານຊາວໜຸ່ມຄະນະກວດກາພັກ-ອົງການກວດກາລັດແຂວງ.