​ໃນ​ລະຫວ່າງ ເດືອນຕຸລາ ຫາ ເດືອນພະຈິກ 2024 ​ ອົງການກວດກາລັດເມືອງແອດ ໄດ້ລົງເຄື່ອນໄຫວ ຕິດຕາມ, ກວດກາ ການຂຸດຄົ້ນແຮ່ເຫຼັກຢູ່ບ້ານ ນາງີ້ວ ຂອງບໍລິສັດລາວປູຢິ່ງ, ບ້ານ ນາເກືອ ຂອງບໍລິສັດບຸນທະວີສັບ ແລະ ບ້ານຖ້ຳຊ່ອງ ຂອງບໍລິສັດຮວງຟຸກລາງເຊີນ. ນໍາພາໂດຍທ່ານ ພັນສະຫວັດ ດວງສີ ຮອງປະທານອົງການກວດກາລັດ ເມືອງແອດ ແຂວງຫົວພັນ ພ້ອມດ້ວຍທິມງານຄື: ມີພະນັກງານຂະແໜງກວດກາລັດ ເມືອງແອດ, ມີພະນັກງານສະພາປະຊາຊົນແຂວງຫົວພັນປະຈຳຢູ່ເຂດເລືອກຕັ້ງເມືອງແອດ, ຫ້ອງການພະລັງງານ ແລະ ບໍ່ແຮ່ເມືອງແອດ ເຂົ້າຮ່ວມ.

ການລົງເຄື່ອນໄຫວ ຕິດຕາມ, ກວດກາ ໃນຄັ້ງນີ້ ແມ່ນໄດ້ຮັບຟັງການລາຍງານສະພາບການຈັດຕັ້ງປະຕິບັດໂຄງການ ການຂຸດຄົ້ນແຮ່ເຫຼັກຢູ່ໃນ 4 ຈຸດ, ເພື່ອໃຫ້ຖືກຕ້ອງຕາມລະບຽບກົດໝາຍການລົງທຶນ, ຈາກນັ້ນທີມງານກໍ່ໄດ້ມີຄຳເຫັນເຈາະຈີ້ມຢ່າງກົງໄປກົງມາບົນພື້ນຖານຄວາມເປັນຈິງ, ພ້ອມທັງກວດກາເບິ່ງບັນດາເອກະສານຕ່າງໆເຊັ່ນ: ກວດກາເນື້ອທີ່ສຳປະທານ, ກວດກາແຜນປ້ອງກັນຜົນກະທົບສິ່ງແວດລ້ອມ, ກວດກາກຳນົດເວລາສັນຍາສຳປະທານ, ກວດກາການຊົດເຊີຍຄ່າເສຍຫາຍຂອງປະຊາຊົນ, ກວດກາສັນຍາການໃຊ້ແຮງງານ, ສ່ວນເອກະສານໃດທີ່ຍັງບໍ່ທັນຄົບຖ້ວນແມ່ນໄດ້ແຈ້ງໃຫ້ບໍລິສັດຮີບຮ້ອນປະກອບໃຫ້ຖືກຕ້ອງຕາມລະບຽບ, ກົດໝາຍເພື່ອເປັນບ່ອນອີງໃຫ້ແກ່ການຕິດຕາມ, ກວດກາ ໃນຕໍ່ໜ້າ. ຜ່ານການກວດກາບັນດາເອກະສານຕ່າງໆ ຈຳນວນ 4 ໂຄງການເຫັນວ່າ: ໂຄງການຂຸດຄົ້ນແຮ່ເຫຼັກຢູ່ຈຸດ ບ້ານ ຖໍ້າຊ່ອງ ແລະ ບ້ານ ນາ ຂອງບໍລິສັດ ຮ່ວງຟຸກລາງເຊິນຈຳກັດ. ປັດຈຸບັນຍັງຢູ່ໃນຂັ້ນຕອນສັນຍາສຳຫຼວດຄວາມເປັນໄປໄດ້ ສ່ວນເອກະສານອື່ນໆ ແມ່ນບໍ່ທັນມີ ແຕ່ໄດ້ຊົດເຊີຍຄ່າເສຍຫາຍຂອງປະຊາຊົນໃນຂອບເຂດສຳຫຼວດຄົບຖ້ວນແລ້ວ; ໂຄງການຂຸດຄົ້ນແຮ່ເຫຼັກຢູ່ຈຸດ ບ້ານ ນາເກືອເໜືອ ຂອງບໍລິສັດ ບຸນທະວີຊັບ ຂຸດຄົ້ນແຮ່ ຈຳກັດຜູ້ດຽວ. ສ່ວນດ້ານເອກະສານສັນຍາເຂົ້າສຳຫຼວດແມ່ນໝົດກຳນົດແລ້ວ ປັດຈຸບັນທາງບໍລິສັດຍັງພວມເຮັດສັນຍາຕໍ່ໃນການຂຸດຄົ້ນຢ່າງເປັນທາງການນຳລັດຖະບານ.