ໃນວັນທີ 8 ພະຈິກ ປີ 2024, ທີ່ສະໂມສອນ ຄະນະກວດກາສູນກາງພັກ ແລະ ອົງການກວດກາແຫ່ງລັດ ຄະນະສະຫະພັນແມ່ຍິງ ໄດ້ຈັດກອງປະຊຸມໃຫຍ່ສະມາຊິກສະຫະພັນແມ່ຍິງຄັ້ງທີ X ຂອງຕົນຂຶ້ນ, ພາຍໃຕ້ການ ເປັນປະທານຂອງ ທ່ານ ນ. ບຸນອ້ອມ ອຸ່ນມະໂນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານ ສະຫະພັນແມ່ຍິງຄະນະກວດກາສູນກາງພັກ, ອົງການກວດກາແຫ່ງລັດ, ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ສິລິກິດ ບຸບຜາ ກຳມະການພັກ ສູນກາງສະຫະພັນແມ່ຍິງລາວ, ຮອງປະທານ ຄະນະບໍລິຫານງານສູນກາງ ສະຫະພັນແມ່ຍິງລາວ, ທ່ານ ສຸກຄຳເພັດ ເຮືອງບຸດສີ ກຳມະການປະຈຳພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຜູ້ຊີ້ນໍາອົງການຈັດຕັ້ງສະຫະພັນແມ່ຍິງ, ມີຜູ້ຕາງໜ້າອົງການຈັດຕັ້ງກຳມະບານ, ຊາວໜຸ່ມ, ຕາງໜ້າຄະນະຫ້ອງການ, ບັນດາກົມ, ພະນັກງານແມ່ຍິງບຳນານ, ຄອບຄົວການນໍາ, ຕາງໜ້າຄະນະສະຫະພັນແມ່ຍິງ 5 ອົງການອ້ອມຂ້າງຫຼັກ 6, ພ້ອມດ້ວຍສະມາຊິກສະຫະພັນແມ່ຍິງ ພາຍໃນຄະນະກວດກາສູນກາງພັກ ແລະ ອົງການກວດກາແຫ່ງລັດເຂົ້າຮ່ວມ.

ກອງປະຊຸມ ທ່ານ ນາງ ບຸນເສີມ ໄຊຍະຄໍາ ຮອງປະທານສະຫະພັນແມ່ຍິງ ໄດ້ຂຶ້ນຜ່ານຮ່າງລາຍງານ ການເມືອງ ແລະ ທິດທາງແຜນການໃນຕໍ່ໜ້າ ໂດຍໄດ້ຍົກໃຫ້ເຫັນຜົນງານດ້ານດີທີ່ຕັ້ງໜ້າ, ດ້ານອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນ ໄລຍະ 5 ປີຜ່ານມາ, ທິດທາງແຜນການໃນ 5 ປີ ຕໍ່ໜ້າ 2025-2030. ຈາກນັ້ນ. ທ່ານ ນາງກອງມະນີ ສີບຸນເຮືອງ ຍັງໄດ້ຜ່ານແຜນພັດທະນາແມ່ຍິງ ຄະນະກວດກາສູນກາງພັກ ແລະ ອົງການ ກວດກາແຫ່ງລັດ, ໂດຍໄດ້ກຳນົດຕົວເລກບາງດ້ານເພື່ອເປັນຕົວຊີ້ວັດ ແລະ ເປັນບັດທັດຖານໃນການຕີລາຄາຜົນ ຂອງການຈັດຕັ້ງປະຕິບັດແຕ່ນີ້ຮອດປີ 2030 ແລະ ທ່ານ ນາງບຸນອ້ອມ ອຸ່ນມະໂນ ໄດ້ຂຶ້ນຜ່ານ ບົດສໍາຫຼວດການນໍາ ລວມໃນໄລຍະ 5 ປີ ຜ່ານມາຕໍ່ກອງປະຊຸມ. ພ້ອມນີ້, ສະມາຊິກສະຫະພັນແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດໄດ້ພ້ອມກັນໃຊ້ສິດປະຊາທິປະໄຕເລືອກຕັ້ງເອົາ ຄະນະບໍລິຫານງານຊຸດທີ X ຂອງຕົນ, ເຊິ່ງ ພາຍຫຼັງ ທ່ານ ໄພວັນ ພົມມະແສງ ຮອງກົມຈັດຕັ້ງ-ພະນັກງານ ໄດ້ຜ່ານມາດຖານເງື່ອນໄຂຂອງຜູ້ສະໝັກຮັບເລືອກຕັ້ງແລ້ວ, ທ່ານ ສຸກຄຳເພັດ ເຮືອງບຸດສີ, ຍັງໄດ້ມີຄໍາເຫັນຊີ້ນໍາຕໍ່ສະມາຊິກສະຫະພັນແມ່ຍິງຜູ້ມີສິດເລືອກຕັ້ງຄື: ສະມາຊິກສະຫະພັນແມ່ຍິງ ຕ້ອງຄົ້ນຄວ້າໃຫ້ເລິກເຊິ່ງ, ໃຊ້ສິດຂອງຕົນເລືອກເອົາຜູ້ທີ່ມີຄວາມຮູ້, ຄວາມສາມາດທີ່ ພົ້ນເດັ່ນ, ມີຄວາມຮັບຜິດຊອບສູງ ໃນການຊີ້ນໍາ-ນໍາພາເອື້ອຍນ້ອງແມ່ຍິງໃນສະໄໝທີ X ນີ້ ໃຫ້ໄດ້ຮັບໝາກຜົນສູງ ໃນການປະຕິບັດວຽກງານຂອງເອື້ອຍນ້ອງແມ່ຍິງ. ຈາກນັ້ນ, ບັນດາສະຫາຍສະມາຊິກສະຫະພັນແມ່ຍິງທັງໝົດ ຍັງໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດຊຸດໃໝ່. ເຊິ່ງກອງປະຊຸມຄັ້ງນີ້ມີຜູ້ລົງສະໝັກຮັບເລືອກຕັ້ງ 9 ທ່ານ, ໃນນັ້ນ. ເລືອກເອົາ 7 ທ່ານ. ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກ ເອົາທ່ານ ນາງ ກອງມະນີ ສີບຸນເຮືອງ ເປັນປະທານສະຫະພັນແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດສະໄໝທີ X, ທ່ານ ນາງ ດວງປີ ຈັນທະລັງສີ ເປັນຮອງປະທານ, ພ້ອມທັງເປັນປະທານກວດກາ ຄະນະບໍລິຫານງານສະຫະພັນແມ່ຍິງ. ທ່ານ ນາງ ໄມຄໍາ ຄໍາເພັງໄຊ ເປັນຮອງປະທານ, ທ່ານ ນາງ ສົມມະລີ ພົມທະວົງ ເປັນຄະນະ ທັງເປັນຮອງປະທານ ກວດກາ ຄະນະບໍລິຫານງານສະຫະພັນແມ່ຍິງ, ທ່ານ ນາງ ປະພາພອນ ໝັ້ນວິໄລສັກ ເປັນຄະນະ, ທ່ານ ນາງ ໃຈປະເສີດ ສິລິວົງ ເປັນຄະນະ ແລະ ທ່ານ ນາງ ສົມຮັກ ເລື່ອງຄໍາມາ ເປັນຄະນະ.

​ຈາກນັ້ນ, ທ່ານ ນາງ ສິລິກິດ ບຸບຜາ ຍັງໄດ້ໃຫ້ກຽດໂອ້ລົມຕໍ່ກອງປະຊຸມ, ເຊິ່ງທ່ານໄດ້ກ່າວຍ້ອງຍໍຜົນງານທີ່ ຄະນະບໍລິຫານງານສະຫະພັນແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດ ຍາດມາໄດ້ ແລະ ໄດ້ເນັ້ນໃຫ້ຄະນະບໍລິຫານງານຊຸດທີ X ພ້ອມດ້ວຍ ສະມາຊິກສະຫະພັນແມ່ຍິງທັງໝົດ ຈົ່ງເອົາໃຈໃສ່ ຖືເອົາວຽກງານສຶກສາອົບຮົມການເມືອງແນວຄິດເປັນກົກ, ຝຶກຝົນພັດທະນາຕົນເອງຮອບດ້ານ, ໂດຍສະເພາະວຽກງານວິຊາສະເພາະ, ສຸມໃສ່ແກ້ໄຂຂໍ້ບົກຜ່ອງ ແລະ ເສີມຂະຫຍາຍດ້ານດີທີ່ຕັ້ງໜ້າ, ເຕົ້າໂຮມຄວາມສາມັກຄີ, ຊຸກຍູ້ຄວາມສະເໝີພາບ ຍິງ- ຊາຍ, ແກ້ໄຂແນວຄິດຄັບແຄບຄອງເດີມ, ຮັກສາຮີດຄອງປະເພນີແມ່ຍິງອັນດີງາມຂອງຊາດ, ເອົາໃຈໃສ່ຈັດຕັ້ງປະຕິບັດ ວຽກງານ 3 ດີ, ຕິດພັນກັບຂະບວນການແຂ່ງຂັນຮັກຊາດ ແລະ ພັນທະນາ, ຂໍ້ແຂ່ງຂັນ “3 ໜ້າທີ່ 12 ຂໍ້ປະຕິບັດ”, ຊຸກຍູ້ສົ່ງເສີມການສ້າງເສດຖະກິດຄອບຄົວໂດຍໃຫ້ຖືກຕ້ອງຕາມກົດໝາຍ ແລະ ສືບຕໍ່ສ້າງແຜນການ, ແຜນງານໃຫ້ເປັນອັນລະອຽດ ນໍາພາຈັດຕັ້ງປະຕິບັດຜັນຂະຫຍາຍມະຕິກອງປະຊຸມໃຫຍ່ສະມາຊິກສະຫະພັນແມ່ຍິງຄັ້ງທີ X ໃຫ້ ປະກົດຜົນເປັນຈິງ ແລະ ມີການພັດທະນາດີຂຶ້ນເປັນກ້າວໆ. ກອງປະຊຸມໃຫຍ່ສະມາຊິກສະຫະພັນແມ່ຍິງຄັ້ງທີ X ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ໄຂຂຶ້ນ ແລະ ປິດລົງຢ່າງສະຫງ່າງາມໃນຕອນເຊົ້າ ຂອງວັນດຽວກັນ.ພາບ-ຂ່າວໂດຍ: ສະໝິງທອງ ເຄນສະບັບ.