ພະນັກງານກວດກາ ສປປ ລາວ ເຂົ້າຮ່ວມ ສຳມະນາສອງຝ່າຍ ກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ຣາຊະອານາຈັກໄທ
07/11/2024
ພະນັກງານກວດກາ ສປປ ລາວ ເຂົ້າຮ່ວມ ສຳມະນາສອງຝ່າຍ ກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ຣາຊະອານາຈັກໄທ
ໃນລະຫ່ວາງວັນທີ 29-31 ຕຸລາ 2024, ພະນັກງານ ອົງການກວດກາແຫ່ງລັດ, ກວດກາກະຊວງ-ອົງການ ແລະ ທ້ອງຖິ່ນ ຈໍານວນໜຶ່ງ ຂອງ ສປປ ລາວ ໄດ້ເຂົ້າຮ່ວມ ສຳມະນາສອງຝ່າຍ ກັບອົງການຕ້ານການສໍ້ລາດບັງຫຼວງ ຂອງຣາຊະອານາຈັກໄທ ກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ໃນເຂດຊາຍແດນ ເຊິ່ງໄດ້ຈັດຂຶ້ນ ຢູ່ແຂວງອຸດອນ ຣາຊະອານາຈັກໄທ, ຝ່າຍລາວເຂົ້າຮ່ວມຈຳນວນ 25 ທ່ານ, ຍິງ 6 ທ່ານ ນຳທີມໂດຍ ທ່ານ ສຸລະພົນ ສີລາວີ ຫົວໜ້າກົມຄົ້ນຄວ້າຄຳຮ້ອງ ແລະ ຄຳສະເໜີ ຂອງອົງການກວດກາແຫ່ງລັດ.
ຈຸດປະສົງຂອງ ສໍາມະນາຄັ້ງນີ້ ແມ່ນເສີມສ້າງຄວາມຮູ້ ກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງໃຫ້ແກ່ພະນັກງານກວດກາ ແລະ ສືບສວນ-ສອບສວນ ຂອງອົງການຕ້ານການສໍ້ລາດບັງຫຼວງ ທີ່ເຮັດວຽກຢູ່ເຂດຊາຍແດນ; ເປັນການສ້າງຕາໜ່າງ, ສ້າງເວທີແລກປ່ຽນຂໍ້ມູນຂ່າວສານ, ປະສົບການ ແລະ ຄວາມຮູ້ເຂົ້າໃຈ ລະຫວ່າງປະເທດແນໃສ່ເພີ່ມທະວີການພົວພັນສາກົນ ແລະ ການນຳໃຊ້ມາດຕະຖານສາກົນເຂົ້າໃນການເຄື່ອນໄຫວປ້ອງກັນການຕ້ານການສໍ້ລາດບັງຫຼວງ ຢູ່ເຂດຊາຍແດນ; ເພື່ອອຳນວຍຍຄວາມສະດວກໃຫ້ແກ່ການຮ່ວມມືໃນອະນາຄົດ.
ເນື້ອໃນການສຳມະນາປະກອບມີ 4 ຫົວຂໍ້ສະເພາະຄື: (1)ສະພາບການສໍ້ລາດບັງຫຼວງ ແລະ ອາດຊະຍະກຳຂ້າມຊາດ; (2)ທັກສະພື້ນຖານຂອງຜູ້ຊ່ຽວຊານຕ້ານການສໍ້ລາດບັງຫຼວງ; (3) ການຮ່ວມມືສາກົນ ແລະ ການຊ່ວຍເຫຼືອທາງດ້ານກົດໝາຍ ເຊິ່ງກັນ ແລະ ກັນໃນເລື່ອງອາດຊະຍະກຳ; (4)ຫົວຂໍ້ພິເສດກ່ຽວກັບການສືບສວນທາງດ້ານການເງິນ. ເຊິ່ງນໍາສະເໜີບົດຮຽນ ໂດຍຊ່ຽວຊານ ທີ່ມາຈາກອົງການ UNODC.
ຜ່ານການສໍາມະນາຄັ້ງນີ້ ແມ່ນເຮັດໃຫ້ນັກສໍາມະກອນຝ່າຍລາວ ມີຄວາມຮັບຮູ້ ແລະ ເຂົ້າໃຈອັນໃໝ່ ຕໍ່ກັບບົດຮຽນວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ໃນຂົງເຂດຊາຍແດນ, ທັງກໍາໄດ້ເນື້ອໃນທາງດ້ານທິດສະດີ ແລະ ພຶດຕິກຳຕົວຈິງ ເພື່ອນໍາໄປໝູນໃຊ້ເຂົ້າໃນວຽກງານຕົວຈິງ ຢູ່ ສປປ ລາວ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
