ອານຸກໍາມະການກົດລະບຽບ-ບຸກຄະລາກອນຂັ້ນສູນກາງ ລົງເກັບກໍາຂໍ້ມູນ ແລະ ຕິດຕາມ, ຊຸກຍູ້ ຢູ່ເມືອງແບງ ແຂວງອຸດົມໄຊ
29/10/2024
ໃນຕອນເຊົ້າຂອງ ວັນທີ 25 ຕຸລາ 2024 ນີ້, ໜ່ວຍງານອານຸກໍາມະການກົດລະບຽບ-ບຸກຄະລາກອນ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ທີ່ມາຈາກຄະນະຈັດຕັ້ງສູນກາງພັກ, ຄະນະກວດກາສູນກາງພັກ ສົມທົບກັບຄະນະຈັດຕັ້ງແຂວງອຸດົມໄຊ ໄດ້ລົງເຄື່ອນໄຫວເກັບກໍາ, ຕິດຕາມ, ຊຸກຍູ້ ການຈັດຕັ້ງປະຕິບັດກົດລະບຽບພັກ ສະໄໝທີ XI ຢູ່ເມືອງແບງ, ເຊິ່ງນໍາພາໂດຍ ສະຫາຍ ວັນຄໍາ ໄຊວົງສັກ ກຳມະການພັກ ຄະນະກວດກາສູນກາງພັກ, ຫົວໜ້າກົມຄົ້ນຄວ້າ ແລະ ວາລະສານກວດກາ ເປັນກຽດຕ້ອນຮັບໂດຍ ສະຫາຍ ສຸກສະຫວັນ ວົງລ້ອມ ຮອງເລຂາພັກເມືອງ, ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ, ມີບັນດາພະນັກງານຫຼັກແຫຼ່ງຂອງຄະນະຈັດຕັ້ງ, ຄະນະກວດ ກາເມືອງ ແລະ ຄະນະພັກ-ອົງການປົກຄອງບ້ານສາມກາງ ເຂົ້າຮ່ວມທັງໝົດ 23 ສະຫາຍ, ຍິງ 6 ສະຫາຍ.
ການເຄື່ອນໄຫວຄັ້ງນີ້ ໜ່ວຍງານອານຸກໍາມະການກົດລະບຽບ-ບຸກຄະລາກອນ ໄດ້ເຂົ້າພົບ ແລະ ເຮັດວຽກກັບຮອງເລຂາພັກເມືອງ ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ແລະ ພະນັກງານຫຼັກແຫຼ່ງຂອງ 2 ຫ້ອງການ (ຄະນະຈັດຕັ້ງເມືອງແບງ ແລະ ຄະນະກວດກາເມືອງແບງ), ຄະນະພັກ-ອົງການປົກຄອງບ້ານສາມກາງ ແລະ ໄດ້ຮັບຟັງການລາຍງານສະພາບການຈັດຕັ້ງປະຕິບັດກົດລະບຽບພັກ ສະໄໝທີ XI ( ໂດຍສັງເຂບ )ຈາກສະຫາຍ ນາງມະນີວັນ ອານຸສອນ ກໍາມະການພັກເມືອງ, ຫົວໜ້າຄະນະຈັດຕັ້ງເມືອງ, ຈາກນັ້ນ ກໍໄດ້ມີຄໍາຄິດ-ເຫັນແລກປ່ຽນບົດຮຽນ ລະຫວ່າງໜ່ວຍງານຈາກສູນກາງ ແລະ ຄະນະຈັດຕັ້ງເມືອງ, ຄະນະກວດກາເມືອງ, ຄະນະພັກ-ອົງການປົກຄອງບ້ານສາມກາງ ( ຕາມຄໍາຖາມເຈາະຈີ້ມ) ຢ່າງກົງໄປກົງມາ ມີລັກສະນະສ້າງສັນບົນພື້ນຖານຄວາມເປັນຈິງ.
ໂອກາດນີ້ ສະຫາຍ ວັນຄໍາ ໄຊວົງສັກ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດໃນການຈັດຕັ້ງປະຕິບັດກົດລະບຽບພັກໃນໄລຍະຜ່ານມາ ຂອງເມືອງ ພ້ອມມີຄຳເຫັນຊີ້ນຳໃຫ້ ຄະນະຈັດຕັ້ງເມືອງ, ຄະນະກວດກາເມືອງພ້ອມດ້ວຍພະນັກງານຫຼັກແຫຼ່ງຂອງ 2 ຫ້ອງການ ແລະ ຄະນະໜ່ວຍພັກ-ຄະນະອົງການປົກຄອງບ້ານສາມກາງ ສືບຕໍ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງ, ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ຖັນແຖວພະນັກງານຄູ-ອາຈານ, ສະມາຊິກພັກ, ແລະ ປະຊາຊົນ ໃຫ້ມີຄວາມໜັກແໜ້ນຕໍ່ອຸດົມການຂອງພັກ, ເອົາໃຈໃສຊອກຮູ້ຮໍ່າຮຽນສ້າງໃຫ້ມີແນວຄິດຫຼັກໝັ້ນ, ການເມືອງໜັກແໜ້ນ ເປັນແບບຢ່າງໃຫ້ແກ່ມະຫາຊົນ ແລະ ພ້ອມດຽວກັນນີ້ໃຫ້ເສີມຂະຫຍາຍດ້ານດີທີ່ຕັ້ງໜ້າ, ສືບຕໍ່ປັບປຸງດ້ານອອ່ນ-ຂໍ້ຄົງຄ້າງ, ເອົາໃຈໃສ່ເຊື່ອມຊຶມກໍາແໜ້ນບັນ ດານິຕິກໍາທີ່ສໍາຄັນ ຂອງພັກ-ຂອງຊາດ ເປັນຕົ້ນແມ່ນກົດລະບຽບຂອງພັກ, ມະຕິ, ຄໍາສັ່ງ , ບົດແນະນໍາ, ກົດໝາຍ ແລະ ລະບຽບການຕ່າງໆຂອງລັດທີ່ວາງອອກຢ່າງເຂັ້ມງວດ ຕິດພັນກັບການກະກຽມຄວາມພ້ອມດ້ານເນື້ອໃນ ເພື່ອກ້າວເຂົ້າສູ່ການດໍາເນີນກອງປະຊຸມໃຫຍ່ຄັ້ງທີ XIII ຂອງອົງຄະນະພັກເມືອງແບງ ໃຫ້ສໍາເລັດຕາມລະດັບຄາດໝາຍທີ່ວາງໄວ້.
ພາບ-ຂ່າວໂດຍ: ຄອນສີ ຂັນທະເກດ ຄະນະກວດກາ ເມືອງແບງ
