ໃນວັນທີ 22 ຕຸລາ 2024 ນີ້, ຢູ່ທີ່ຫ້ອງເຮັດວຽກສະຫາຍປະທານຄະນະກວດກາພັກ-ລັດເມືອງ, ໄດ້ຈັດກອງປະຊຸມສະຫຼຸບຕີລາຄາຜົນການຈັດຕັ້ງປະຕິບັດວຽກງານຂອງໜ່ວຍພັກ ປະຈໍາເດືອນ ແລະ ມອບໃບຍ້ອງຍໍໃຫ້ພະນັກງານ ໃນການຈັດຕັ້ງປະຕິບັດວຽກງານ ປະຈໍາປີ 2023 ; ໂດຍໃຫ້ກຽດເຂົ້າຮ່ວມຂອງ ສະຫາຍ ອຸດສະຫະ ກົມມະເມືອງ ຮອງເລຂາພັກເມືອງ, ປະທານຄະກວດກາພັກ, ປະທານອົງການກວດກາລັດເມືອງ, ມີຄະນະພັກ, ສະມາຊິກພັກ ພາຍໃນໜ່ວຍພັກ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ ສະຫາຍ ໂພສາ ທອງສະຫວັດ ຮອງເລຂາໜ່ວຍພັກ, ຫົວໜ້າໜ່ວຍງານກວດກາລັດ ແລະ ຕ້ານການສໍ້ລາດບັງຫຼວງ ໄດ້ຜ່ານບົດສະຫຼຸບຜົນການຈັດຕັ້ງປະຕິບັດວຽກງານຂອງໜ່ວຍພັກປະຈໍາເດືອນ ເຊີ່ງໄດ້ຍົກໃຫ້ເຫັນດ້ານດີຜົນສໍາເລັດ, ດ້ານອ່ອນຂໍ້ຄົງຄ້າງ ແລະ ທິດທາງແຜນການເພື່ອສືບຕໍ່ຈັດຕັ້ງປະຕິບັດໃນຕໍ່ໜ້າ; ຈາກນັ້ນ ສະຫາຍ ສຸກກອນ ດໍາມະຈັນ ເລຂາໜ່ວຍພັກ, ຮອງປະທານຄະນະກວດກາພັກ-ລັດ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກ ແໜ້ນປະຈໍາປີ 2024 ແລະ ທິດທາງແຜນການ ປີ 2025 ພ້ອມນີ້ກໍ່ໄດ້ສະໜີໃຫ້ບັນດາສະຫາຍສະມາຊິກພັກ ປະກອບຄໍາເຫັນໃສ່ເນື້ອໃນບົດດັ່ງກ່າວ ເພື່ອຈະສະເໜີຄະນະພັກຂັ້ນເທິງຮັບຮອງແຜນ ແລະ ປະເມີນແຜນໃນປີຕໍ່ໜ້າ. ຈາກນັ້ນ ສະຫາຍ ສີຄະນວນໄຊ ແກ້ວບົວເງິນ ຫົວໜ້າໜ່ວຍງານບໍລິຫານ ໄດ້ຜ່ານ ຂໍ້ຕົກລົງ ຂອງເຈົ້າແຂວງ ສະບັບເລກທີ 892/ຈຂອປ ວ່າດ້ວຍການຍ້ອງຍໍສັນລະເສີນໃຫ້ແກ່ບຸກຄົນທີ່ມີຜົນງານດີເດັ່ນ ປະຈໍາປີ 2023 ແລະ ຂໍ້ຕົກລົງຂອງເຈົ້າເມືອງສະບັບເລກທີ 120/ຈມຊຖ ລົງວັນທີ 9 ກຸມພາ 2024 ວ່າດ້ວຍການຈັດຕັ້ງປະຕິບັດນະໂຍບາຍມອບໃບຍ້ອງຍໍ, ຊົມເຊີຍໃຫ້ແກ່ຜູ້ທີ່ມີຜົນ ງານດີເດັ່ນໃນການຈັດຕັ້ງປະຕິບັດວຽກງານ ປະຈໍາປີ 2023. ໃນນີ້ມີພະນັກງານໄດ້ຮັບໃບຍ້ອງຍໍຂັ້ນແຂວງ 2 ທ່ານ, ຊົມ ເຊີຍຂັ້ນແຂວງ 3 ທ່ານ ແລະ ໃບຍ້ອງຍໍຂັ້ນເມືອງ 2 ທ່ານ, ຍິງ 2 ທ່ານ.

ຕອນທ້າຍ ສະຫາຍ ອຸດສະຫະ ກົມມະເມືອງ ໄດ້ມີຄໍາເຫັນຕໍ່ກອງປະຊູມ ໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ຂອງແຕ່ລະສະຫາຍ ທີ່ໄດ້ເອົາໃຈໃສ່ໃນການຈັດຕັ້ງປະຕິບັດໜ້າທີ່ທີ່ໄດ້ຮັບມອບໝາຍ ອັນໄດ້ມີຜົນສໍາເລັດໃນຫຼາຍດ້ານ. ພ້ອມນີ້, ຍັງໄດ້ເນັ້ນໜັກໃຫ້ຄະນະພັກ, ສະມາຊິກພັກ ແຕ່ລະສະຫາຍຕ້ອງເປັນເຈົ້າການຍົກສູງໜ້າທີ່ຄວາມຮັບຜິດຊອບ, ເພີ່ມທະວີຄວາມສາມັກຄີ ພາຍໃນໃຫ້ໜັກແໜ້ນ, ສືບຕໍ່ຈັດຕັ້ງປະຕິບັດ ວຽກງານຕາມທິດທາງແຜນການທີ່ວາງໄວ້ໃຫ້ສໍາເລັດຕາມຄາດໝາຍ.

ຂ່າວ: ອານັນ ພິມມະເສນ