ໃນຕອນເຊົ້າ ວັນທີ 24 ກັນຍາ 2024 ນີ້ ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ ,ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ທັງເປັນຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ຕ້ອນຮັບ ທ່ານ ໂຄອິຊິ ມິຊິໂຕະມຸ ເອກອັກຄະຣາຊະທູດຍີ່ປຸ່ນ ຄົນໃໝ່ປະຈຳ ລາວ ເຂົ້າຢ້ຽມຂໍ່ານັບ ທີ່ຫ້ອງວ່າການສູນກາງພັກ. 

ໂອກາດດັ່ງກ່າວ, ທ່ານ ຄຳພັນ ພົມມະທັດ ໄດ້ກ່າວສະແດງຄວາມຕ້ອນຮັບ ແລະ ຊົມເຊີຍຕໍ່ ທ່ານທູດທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກ ຄະຣາຊະທູດຄົນໃໝ່ປະຈຳ ສປປ ລາວ ເພື່ອສືບຕໍ່ເຂົ້າໃນການເສີມຂະຫຍາຍສາຍ ພົວພັນຮ່ວມມືທີ່ດີລະຫວ່າງ ຍີ່ປຸ່ນ-ລາວ ໃຫ້ນັບມື້ແໜ້ນແຟ້ນຍິ່ງຂຶ້ນ.

ຈາກນັ້ນ ທ່ານ ໂຄອິຊິ ມິຊິໂຕະມຸ ກໍໄດ້ສະແດງຄວາມຂອບໃຈ ຕໍ່ທ່ານ ຄຳພັນ ພົມມະທັດ ທີ່ໄດ້ໃຫ້ກຽດຕ້ອນຮັບ ຢ່າງອົບອຸ່ນ ພ້ອມທັງແຈ້ງຈຸດປະສົງຂອງການເຂົ້າຢ້ຽມຂໍ່ານັບຄັ້ງນີ້ ແມ່ນ ເພື່ອສະເໝີໂຕພາຍຫຼັງທີ່ໄດ້ຍື່ນສານຕາຕັ້ງຕໍ່ປະທານປະເທດ ສປປ ລາວ ໃນ ເດືອນເມສາ 2024 ແລະ ທ່ານຍັງໄດ້ກ່າວຢືນຢັນຈະຕັ້ງໜ້າປະກອບສ່ວນ ເຂົ້າໃນການພົວພັນຮ່ວມມືທີ່ດີ ລະຫວ່າງຍີ່ປຸ່ນ-ລາວໃຫ້ໝັ້ນຄົງຕະຫຼອດໄປ.