ໃນຕອນເຊົ້າວັນທີ 14 ຕຸລາ 2024 ນີ້, ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຍົກລະດັບຄວາມຮັບຮູ້ ແລະ ການນໍາໃຊ້ລະບົບຫ້ອງການທັນສະໄໝ ( E-Office ) ໃຫ້ແກ່ພະນັກງານຂອງຕົນຂື້ນ ຢູ່ທີ່ຫ້ອງປະຊຸມໃຫຍ່ຄະນະກວດກາສູນກາງພັກ ແລະ ອົງການກວດກາແຫ່ງລັດ. ໂດຍການເປັນປະທານຮ່ວມຂອງທ່ານ ກົງໃຈ ວິໄລສັກ ຫົວໜ້າຫ້ອງການ ຄະນະກວດກາສູນກາງພັກ ແລະ ອົງການກວດກາແຫ່ງລັດ, ທ່ານ ປອ ທະວີສັກ ມະໂນທໍາ ຫົວໜ້າສູນບໍລິຫານລັດ ດີຈີຕອນ ກະຊວງເຕັກໂນໂລຊີ ແລະ ການສື່ສານ ມີບັນດາຮອງຫົວໜ້າກົມ, ຫົວໜ້າພະແນກ ແລະ ພະນັກງານວິຊາການເຂົ້າຮ່ວມ.

ໃນພິທີທ່ານ ກົງໃຈ ວິລະສັກ ໄດ້ໃຫ້ກຽດມີຄຳເຫັນກ່າວເປີດພິທີ ເຊິ່ງທ່ານໄດ້ກ່າວວ່າ: ການຈັດຊຸດຝຶກອົບຮົມຄັ້ງນີ້ ແມ່ນມີຄວາມໝາຍສຳຄັນແນ່ໃສ່ເພື່ອສ້າງ ແລະ ເສີມຂະຫຍາຍກຳລັງແຮງໃຫ້ແກ່ຖັນແຖວພະນັກງານທີ່ເຮັດວຽກງານກວດກາໄດ້ຮັບຮູ້, ເຂົ້າໃຈ ແລະ ສາມາດນໍາໃຊ້ ລະບົບຫ້ອງການທັນສະໄໝ (E-Office) ເຂົ້າໃນວຽກງານວິຊາສະເພາະເປັນຕົ້ນ: ການຮັບ-ສົ່ງ, ການຈັດເກັບເອກະສານຕ່າງໆ ຂອງໜ່ວຍງານຂາເຂົ້າ-ຂາອອກ, ເລຂານຸການຄະນະນໍາ ແລະ ບໍລິຫານຂອງຫ້ອງການ, ບັນດາກົມ ໃຫ້ມີຄວາມສະດວກວ່ອງໄວທັງຮັບປະກັນຄວາມປອດໄພ, ຫຼຸດຜ່ອນຂັ້ນຕອນການກຳເນີນການ, ປະຢັດເວລາ ແລະ ທັນກັບສະພາບການຂອງວຽກງານໃນແຕ່ລະໄລຍະ ສະນັ້ນ ຂ້າພະເຈົ້າຈຶ່ງຮຽກຮ້ອງມາຍັງນັກສຳມະນາກອນທັງໝົດຕ້ອງສຸມສະຕິປັນຍາຂອງຕົນເພື່ອຄົ້ນຄວ້າ, ກຳແໜ້ນ ແລະ ໝູນໃຊ້ເຂົ້າໃນວຽກງານຂອງຕົນໃຫ້ມີປະສິດຕິພາບສູງຂຶ້ນກວ່າເກົ່າ. ພ້ອມກັນນັ້ນ ກໍ່ຮຽກຮ້ອງມາຍັງ ຄູອາຈານ ຜູ້ທີ່ມີບົດຮຽນ ແລະ ມີຄວາມຮູ້ປະສົບການຕົວຈິງ ໃຫ້ຖ່າຍທອດບົດຮຽນ, ປະສົບການຕົວຈິງນັ້ນໃຫ້ນັກສຳມະນາກອນ ຢ່າງໝົດຈິດໝົດໃຈ ແລະ ສ້າງໃຫ້ນັກສໍາມະນາກອນກາຍເປັນວິທະຍາກອນ ເພື່ອສືບຕໍ່ຖ່າຍທອດຄວາມຮູ້-ຄວາມສາມາດໃຫ້ພະນັກງານພາຍໃນ ຄະນະຄະນະກວດກາສູນກາງພັກ ແລະ ອົງການກວດກາແຫ່ງລັດ. ຈາກນັ້ນ ທ່ານ ປອ ທະວີສັກ ມະໂນທໍາ ກໍ່ໄດ້ນໍາສະເໜີສະພາບລວມໂດຍຫຍໍ້ ກ່ຽວກັບສະພາບການທັນສະໄໝ ຂອງລັດ ແລະ ການນໍາໃຊ້ລະບົບຫ້ອງການທັນສະໄໝ ເຊິ່ງທ່ານໃຫ້ຮູ້ວ່າ: ລະບົບຫ້ອງການທັນສະໄໝ (E-Office ) ເປັນລະບົບການບໍລິຫານວຽກງານຫ້ອງການ ໃນຮູບແບບ ເອເລັກໂຕຣນິກ ເຊິ່ງເປັນລະບົບອອນລາຍ ຜ່ານເວັບບຣາວເຊີ ແລະ ໂປຣແກຣມມືຖື ປະກອບມີການຈັດເກັບບັນດາເອກະສານຂາເຂົ້າ-ຂາອອກ ທີ່ເຊື່ອມໂຍງກັນເຊັ່ນ: ການມອບໝາຍວຽກງານ ຂອງຄະນະກົມ, ຄະນະພະແນກ, ພະນັກງານວິຊາການ ທີ່ສາມາດຕິດຕາມວຽກ ໄປຕາມແຕ່ລະຂັ້ນ ຂອງບຸກຄະລາກອນ, ມີຕາຕະລາງການເຄື່ອນໄຫວ, ການຈອງຫ້ອງປະຊຸມ, ລາຍເຊັນເອເລັກໂຕຣນິກ ແລະ ອື່ນໆ. ເອກະສານທີ່ນໍາມາຝຶກອົບຮົມໃນຄັ້ງນີ້ປະກອບມີຄື: ເອກະສານກ່ຽວກັບການເຂົ້າລະບົບ ແລະ ການແກ້ໄຂຂໍ້ມູນພື້ນຖານ, ການສ້າງແຟ້ມເອກະສານຂາເຂົ້າ-ຂາອອກ, ການຮ່າງເອກະສານຂາເຂົ້າ-ຂາອອກ, ການສົ່ງແຕ່ລະສະຖານະແກ້ໄຂຫຼັກ, ແກ້ໄຂຮ່ວມ, ຕິດຕາມ, ການຂໍຄືນເອກະສານ, ແນະນໍາເມນູການຈັດການລະ ບົບ( Admin), ນໍາສະເໜີການນໍາໃຊ້ລະບົບອີອອບຝິດ (E-Office) ຜ່ານລະບົບມືຖື, ການກວດຂໍ້ມູນ ແລະ ດໍາເນີນການເອກະສານຂາອອກຜ່ານລະບົບມືຖື(Mobile App)