ຕອນເຊົ້າຂອງວັນທີ 14 ຕຸລາ 2024 ນີ້, ກົມກວດກາທະນາຄານແຫ່ງ ສປປ ລາວ ໄດ້ເປີດກອງປະຊຸມຝຶກອົບຮົມວຽກງານກວດກາພັກ-ລັດຂຶ້ນ, ໂດຍການເປັນປະທານຮ່ວມກ່າວເປີດຂອງ ທ່ານ ນາງ ຂັນແກ້ວ ຫຼ້າມະນີເງົາ ຄະນະປະຈໍາພັກ, ປະທານຄະນະກວດກາພັກ ທະນາຄານແຫ່ງ ສປປ ລາວ, ຮອງຜູ້ວ່າການ ຜູ້ຊີ້ນໍາກົມກວດກາ ແລະ ທ່ານ ສຸກຄໍາເພັດ ເຮືອງບຸດສີ ຄະນະປະຈໍາພັກ ຮອງປະທານຄະນະກວດກາສູນກາງພັກ, ອົງການກວດກາແຫ່ງລັດ, ມີບັນດາສະຫາຍເລຂາໜ່ວຍພັກຫ້ອງການ, ບັນດາກົມ, ສະຖາບັນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ ແລະ ນັກສຳມະນາກອນຈຳນວນ 65 ທ່ານ.

ໃນໂອກາດກ່າວເປີດກອງປະຊຸມ ສະຫາຍ ນາງ ຂັນແກ້ວ ຫຼ້າມະນີເງົາ ໄດ້ຍົກໃຫ້ເຫັນບົດບາດຄວາມສຳຄັນຂອງວຽກງານຕິດຕາມ, ກວດກາ ໃນການນໍາພາຂອງພັກ ແລະ ຄຸ້ມຄອງຂອງລັດ ຄືທັດສະນະຂອງພັກທີ່ກ່າວໄວ້ວ່າ “ບໍ່ມີການກວດກາ ກໍໝາຍຄວາມວ່າບໍ່ມີການນໍາພາ” ເພາະວ່າວຽກງານຕິດຕາມ, ກວດກາ ແມ່ນວຽກງານໜຶ່ງທີ່ຕິດພັນກັບທຸກຂົງເຂດວຽກງານ, ເປັນວຽກທີ່ຄະນະພັກຮັບຜິດຊອບໂດຍກົງ, ຕ້ອງເຮັດເປັນປົກກະຕິ ແລະ ຂາດບໍ່ໄດ້ສໍາລັບການນໍາພາຂອງພັກ ແລະ ການຄຸ້ມຄອງລັດ; ການກວດກາແມ່ນພາຫະນະທີ່ສໍາຄັນອັນໜຶ່ງທີ່ມີປະສິດທິຜົນ ເພື່ອແກ້ໄຂບັນຫາຕ່າງໆ ໃນການພົວພັນຢູ່ພາຍໃນພັກ, ອົງການຈັດຕັ້ງລັດ. ຍ້ອນເຫັນໄດ້ຄວາມສໍາຄັນ, ຄຸນປະໂຫຍດຂອງວຽກງານກວດກາ ແລະ ເພື່ອສ້າງຄວາມເຂັ້ມແຂງທາງດ້ານຄວາມຮູ້, ຄວາມສາມາດໃຫ້ແກ່ຜູ້ຮັບຜິດຊອບວຽກງານກວດກາພັກ-ລັດ ໃນການເຄື່ອນໄຫວວຽກງານກວດກາໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ, ກົມກວດກາທະນາຄານແຫ່ງ ສປປ ລາວຈຶ່ງໄດ້ສົມທົບກັບຄະນະກວດກາສູນກາງພັກ ແລະ ອົງການກວດກາແຫ່ງລັດ ຈັດກອງປະຊຸມຝຶກອົບຮົມວຽກງານກວດກາ ໃຫ້ຜູ້ຮັບຜິດຊອງວຽກງານກວດກາພັກ-ລັດຢູ່ຫ້ອງ ການ, ບັນດາກົມ, ສະຖາບັນ, ບັນດາໜ່ວຍພັກທີ່ສັງກັດ ທະນາຄານແຫ່ງ ສປປ ລາວ ແລະ ພາກສ່ວນທີ່ກ່ຽວຂ້ອງ, ເພື່ອກໍາໄດ້ຫຼັກການ, ເນື້ອໃນ, ວິທີການ, ຂັ້ນຕອນຂອງການກວດກາ ແລະ ນໍາໃຊ້ເຂົ້າໃນການເຄື່ອນໄຫວວຽກງານຕົວຈິງຢູ່ໃນການຈັດຕັ້ງຂອງຕົນ, ນອກຈາກນີ້ຍັງໄດ້ເນັ້ນໜັກໃຫ້ສໍາມະນາກອນທຸກທ່ານ ນໍາເອົາບົດຮຽນໃນຄັ້ງນີ້ ໄປໝູນໃຊ້ເຂົ້າໃນແບບແຜນ ວິທີເຮັດວຽກ ໃຫ້ເກີດປະສິດທິຜົນສູງ ເຮັດໃຫ້ວຽກງານກວດກາໄດ້ຮັບການພັດທະ ນາ ສາມາດບັນລຸໄດ້ຕາມລະດັບຄາດໝາຍ. ພ້ອມດຽວກັນນັ້ນ, ທ່ານ ສຸກຄໍາເພັດ ເຮືອງບຸດສີ ຍັງໄດ້ມີຄໍາເຫັນ ໂດຍທ່ານໄດ້ຍົກໃຫ້ເຫັນເຖິງສະພາບການເຄື່ອນໄຫວຕົວຈິງກ່ຽວກັບວຽກງານກວດກາທີ່ເກີດຂຶ້ນໃນປັດຈຸບັນ ແລະ ຍັງເນັ້ນໃຫ້ແລກປ່ຽນ, ຍາດແຍ່ງ ເອົາບົດຮຽນໃນຄັ້ງນີ້ຢ່າງຕັ້ງໜ້າ ເພື່ອນຳໄປຈັດຕັ້ງປະຕິບັດເຂົ້າໃນວຽກງານໃນຂົງເຂດຂອງຕົນໃຫ້ໄດ້ຮັບໝາກຜົນສູງຂຶ້ນກວ່າເກົ່າ.