ວັນທີ 23 ກັນຍາ 2024, ໜ່ວຍພັກຄະນະກວດກາພັກ, ອົງການກວດກາລັດເມືອງ ໄຊເສດຖາ ແຂວງອັດຕະປື ໄດ້ຈັດກອງປະຊຸມດໍາເນີນຮ່ວມຊີວິດພັກ ແລະ ເຜີຍແຜ່ເຊື່ອມຊຶມເອກະສານສໍາຄັນຕ່າງໆຂຶ້ນ, ໃຫ້ກຽດເປັນປະທານຂອງ ສະຫາຍ ອຸດສະຫະ ກົມມະເມືອງ ຮອງເລຂາພັກເມືອງ, ປະທານຄະກວດກາພັກ, ປະທານອົງການກວດກາລັດເມືອງ, ມີຄະນະພັກ, ສະມາຊິກພັກ ພາຍໃນໜ່ວຍພັກ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ ສະຫາຍ ອຸດສະຫະ ກົມມະເມືອງ ໄດ້ໃຫ້ກຽດເຜີຍແຜ່ເອກະສານ ມະຕິຂອງກົມການເມືອງສູນກາງພັກ ເລກທີ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່; ຈາກນັ້ນ ສະຫາຍ ສຸກກອນ ດໍາມະຈັນ ເລຂາໜ່ວຍພັກ, ຮອງປະທານຄະນະກວດກາພັກ-ລັດ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຂອງໜ່ວຍພັກປະຈໍາເດືອນ, ເຊິ່ງໄດ້ຍົກໃຫ້ເຫັນຜົນສໍາເລັດໃນການນໍາພາ-ຊີ້ນໍາຂອງຄະນະໜ່ວຍພັກ, ເປັນຕົ້ນແມ່ນການນໍາພາສຶກສາອົບຮົມການເມືອງ-ແນວຄິດ ຕິດພັນກັບການເຜີຍແຜ່ເຊື່ອມຊຶມບັນດາມະຕິ, ຄໍາສັ່ງ, ຄໍາແນະນໍາ, ແຈ້ງການຂອງຄະນະພັກຂັ້ນເທິງ, ພ້ອມທັງຫັນມາເປັນແຜນການ, ແຜນງານອັນລະອຽດ ຂອງໜ່ວຍພັກ ກໍ່ຄືວຽກງານວິຊາສະເພາະຂອງຂັ້ນຕົນ, ໄດ້ເອົາໃສ່ຕິດຕາມ, ກວດກາບັນດາສະມາຊິກພັກ, ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບ ໃນການຈັດຕັ້ງປະຕິບັດກົດລະບຽບຂອງພັກ, ກົດໝາຍຂອງລັດຢ່າງເປັນປົກກະຕິ. ພ້ອມນີ້, ບັນດາສະຫາຍສະມາຊິກພັກກໍ່ໄດ້ປະກອບຄໍາຄິດ, ຄໍາເຫັນ ຕໍານິສົ່ງຂ່າວ, ເພື່ອເປັນການກໍ່ສ້າງຊ່ວຍເຫຼືອເຊິ່ງກັນ ແລະ ກັນ.

ໃນຕອນທ້າຍ ສະຫາຍ ອຸດສະຫະ ກົມມະເມືອງ ຍັງໄດ້ມີຄໍາເຫັນຕໍ່ກອງປະຊຸມ ໂດຍສະຫາຍໄດ້ເນັ້ນໃຫ້ຄະນະພັກ, ສະມາຊິກພັກທັງໝົດຕ້ອງກຳແໜ້ນບັນດາເນື້ອໃນ ເອກະສານທີ່ນໍາມາເຜີຍແຜ່ໃນຄັ້ງນີ້ຢ່າງເລິກເຊິ່ງ ເພື່ອນໍາໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ. ແຕ່ລະໜ່ວຍງານຕ້ອງເປັນເຈົ້າການຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ເອົາໃຈໃສ່ໃນການຈັດຕັ້ງປະຕິບັດວຽກງານຕາມທິດທາງແຜນການທີ່ວາງໄວ້ໃຫ້ມີປະສິດທິຜົນສູງ, ເພີ່ມທະວີຄວາມສາມັກຄີ ທັງພາຍໃນ-ພາຍນອກໃຫ້ໜັກແໜ້ນ, ກວ້າງຂວາງ, ເລິກເຊິ່ງ ແລະ ພ້ອມກັນຈັດຕັ້ງປະຕິບັດວຽກງານໃຫ້ສຳເລັດຕາມຄາດໝາຍທີ່ວາງໄວ້.

ຂ່າວ: ອານັນ ພິມມະເສນ ( ຄະນະກວດກາພັກ-ລັດ )