ກາງເດືອນກັນຍາ 2024 ນີ້, ໜ່ວຍພັກ ຄະນະກວດກາພັກ, ອົງການກວດກາລັດ ເມືອງສໍາພັນ ແຂວງຜົ້ງສາລີ ໄດ້ເປີດກອງປະຊຸມໃຫຍ່ ຄັ້ງທີ I ຂອງໜ່ວຍພັກຕົນຂຶ້ນ, ຢູ່ທີ່ຫ້ອງປະຊຸມຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ, ພາຍໃຕ້ການເປັນປະທານ ຂອງສະຫາຍ ນາງ ຄໍາເຫຼັກ ຄົງໄພວັນ ຮັກສາການເລຂາ ໜ່ວຍພັກ, ຮອງປະທານຄະນະກວດກາພັກ, ຮອງປະທານອົງກວດກາລັດເມືອງ, ໂດຍເປັນກຽດເຂົ້າຮ່ວມ ຂອງສະຫາຍ ທອງຕື ເກຍສະບົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ເມືອງສໍາພັນ, ມີສະຫາຍ ນາງ ວອນ ສີລິພົງ ຮອງເລຂາໜ່ວຍພັກ, ຮອງຄະນະຈັດຕັ້ງເມືອງ, ມີບັນດາຄະນະປັບປຸງກົງຈັກການຈັດຕັ້ງຂັ້ນເມືອງ, ຫ້ອງການທີ່ກ່ຽວຂ້ອງ, ແຂກຖືກເຊີນຈາກບັນດາໜ່ວຍພັກອ້ອມຂ້າງເມືອງ, ຕະຫຼອດຮອດສະມາຊິກພັກພາຍໃນໜ່ວຍພັກເຂົ້າຮ່ວມທັງໝົດ 10 ສະຫາຍ, ຍິງ 04 ສະຫາຍ.

ກອງປະຊຸມ ສະຫາຍ ນາງ ຄໍາເຫຼັກ ຄົງໄພວັນ ໄດ້ຜ່ານຮ່າງບົດລາຍງານການເມືອງ ແລະ ທິດທາງແຜນການ ແຕ່ປີ 2025-2029, ບົດສະຫຼຸບການຈັດຕັ້ງປະຕິບັດແຜນພັດທະນາປະຈໍາ 5 ປີ ແຕ່ປີ 2020-2024 ແລະ ທິດທາງແຜນພັດທະນາວຽກງານ ຂອງອົງການກວດກາລັດເມືອງ ແຕ່ປີ 2025-2029 ແລະ ຜ່ານຮ່າງບົດສໍາຫຼວດການນໍາພາລວມ ຂອງຄະນະໜ່ວຍພັກຊຸດເກົ່າ, ໂດຍໄດ້ຍົກໃຫ້ເຫັນການເຄື່ອນໄຫວນໍາພາ-ຊີ້ນໍາ ຂອງຄະນະໜ່ວຍພັກມີຜົນສໍາເລັດຫຼາຍດ້ານເປັນຕົ້ນ, ແມ່ນໄດ້ຕິດຕາມ, ກວດກາການຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິ, ຄໍາສັ່ງ, ກົດລະບຽບຂອງພັກກົດໝາຍຂອງລັດ ແລະ ນິຕິກໍາຕ່າງໆ, ໄດ້ວາງອອກແຕ່ລະໄລຍະ, ໄດ້ຕິດຕາມ, ກວດກາການປະຕິບັດໜ້າທີ່ຂອງຄະນະພັກ, ສະມາຊິກພັກ, ພະນັກງານ-ລັດຖະກອນ, ຕິດພັນກັບກອງປະຊຸມດໍາເນີນຊີວິດການເມືອງປະຈໍາປີ, ກາງສະໄໝ, ທ້າຍສະໄໝ ຂອງຄະນະໜ່ວຍພັກ, ຄະນະພັກຮາກຖານ ແລະ ສໍາເລັດເປີດກອງປະຊຸມໃຫຍ່ຂອງສະມາຊິກພັກໜ່ວຍພັກ, ກອງປະຊຸມໃຫຍ່ສະມາຊິກພັກ ຄະນະພັກຮາກຖານທົ່ວເມືອງ 12 ຄະນະພັກຮາກຖານ; ນອກນີ້, ຜູ້ແທນກອງປະຊຸມຍັງໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກ ເອົາຄະນະໜ່ວຍພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ຖືກຕ້ອງຕາມມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ສະໝັກເລືອກຕັ້ງ 3 ສະຫາຍ, ຍິງ 01 ສະຫາຍ, ເລືອກເອົາ 02 ສະຫາຍ, ກອງປະຊຸມຄັ້ງປະຖົມມະລືກໄດ້ເປັນເອກະສັນກັນເລືອກເອົາ ສະຫາຍ ຍືນ ສານວິໄລ ເປັນເລຂາໜ່ວຍພັກ, ສະຫາຍ ນາງ ຄໍາເຫຼັກ ຄົງໄພວັນ ເປັນຮອງເລຂາໜ່ວຍພັກ ທັງເປັນປະທານກວດກາໜ່ວຍພັກ ເພື່ອສືບຕໍ່ນຳພາ-ຊີ້ນຳການເຄື່ອໄຫວຈັດຕັ້ງປະຕິບັດວຽກງານກວດກາໃຫ້ມີຜົນສໍາເລັດດີກວ່າເກົ່າ.