ໃນຕອນເຊົ້າວັນທີ 25 ກັນຍາ 2024 ຢູ່ທີ່ ກະຊວງແຜນການ ແລະ ການລົງທຶນ ໄດ້ເປີດຝຶກອົບຮົມສ້າງຄວາມ ເຂັ້ມແຂງກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ຂອງຂະແໜງແຜນການ ແລະ ການລົງທຶນ ໃນຂອບເຂດທົ່ວປະເທດ; ໃຫ້ກຽດເປັນປະທານ ແລະ ກ່າວເປີດພິທີໂດຍ ທ່ານ ນາງ ພອນວັນ ອຸທະວົງ ຮອງເລຂາຄະນະບໍລິຫານງານພັກ ກະຊວງ, ປະທານຄະນະກວດກາພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ,​ ໂດຍມີວິທະຍາກອນ ຈາກອົງການກວດກາແຫ່ງລັດ, ປະທານກວດກາ ແລະ ຜູ້ຮັບຜິດຊອບວຽກງານກວດກາຢູ່ບັນດາກົມ, ຫ້ອງການ, ສູນສະຖິຕິແຫ່ງຊາດ, ສູນຄົ້ນຄວ້ານະໂຍບາຍການພັດທະນາ ແລະ ຂະ ແໜງກວດກາ ພະແນກແຜນການ ແລະ ການລົງທຶນແຂວງ, ນະຄອນຫຼວງ ເຂົ້າຮ່ວມທັງໝົດ 60 ທ່ານ, ຍິງ 24 ທ່ານ.​

ໂອກາດນີ້ ທ່ານ ນ ພອນວັນ ອຸທະວົງ ຮອງເລຂາຄະນະບໍລິຫານງານ, ປະທານຄະນະກວດກາພັກ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ຍົກໃຫ້ເຫັນເຖິງຄວາມສໍາຄັນຕໍ່ວຽກງານກວດກາວ່າ: ໃນເງື່ອນໄຂໃໝ່ການກວດກາຍິ່ງມີບົດບາດພົ້ນເດັ່ນ ເພາະວ່າມັນຊ່ວຍໃຫ້ພວກເຮົາສາມາດ ຊອກເຫັນດ້ານອ່ອນຂໍ້ຄົງຄ້າງ ແລະ ເສີມຂະຫຍາຍດ້ານຕັ້ງໜ້າ ແລະ ປັດໄຈໃໝ່ທີ່ກ້າວໜ້າໄດ້ໄວ ທັງຊ່ວຍສະກັດກັ້ນ ແກ້ໄຂ ປະກົດການຫຍໍ້ທໍ້ ການເຊື່ອມເສຍຕ່າງໆ ທີ່ຈະສົ່ງຜົນກະທົບທີ່ເປັນໄພອັນຕະລາຍຮ້າຍແຮງ ຕໍ່ການພັດທະນາ ເສດຖະກິດ-ສັງຄົມ ເກີດຂຶ້ນຢ່າງແຜ່ຫລາຍ ເຊິ່ງໄດ້ກາຍເປັນບັນຫາທ້າທາຍ, ເປັນໄພຂົ່ມຂູ່ຕໍ່ສະຖຽນລະພາບ ແລະ ເປັນບັນຫາໜຶ່ງທີ່ກະທົບເຖິງບົດບາດການນໍາພາຂອງພັກ, ຄຸ້ມຄອງຂອງລັດ ແລະ ລະບອບການເມືອງ, ການຕິດຕາມ ປະເມີນຜົນການຈັດຕັ້ງປະຕິບັດ ວຽກງານສະກັດກັ້ນຕ້ານການສໍ້ລາດບັງຫຼວງ.

ສະນັ້ນ, ການສ້າງຄວາມເຂັ້ມແຂງວຽກງານສະກັດກັ້ນ ແລະ ຕ້ານການສໍ້ລາດບັງຫຼວງຈັດຂຶ້ນ ໃນຄັ້ງນີ້ ແມ່ນມີຄວາມສໍາຄັນຫຼາຍ ເພື່ອຍົກລະດັບຄວາມສາມາດ, ເສີມຂະຫຍາຍສະຕິປັນຍາຂອງຜູ້ ທີ່ເຮັດວຽກງານກວດກາ, ເປັນການຮຽນຮູ້ຊຶ່ງກັນ ແລະ ກັນ ພວກເຮົາຈະໄດ້ຄົ້ນຄວ້າຮໍ່າຮຽນເຊື່ອມຊືມເອກະສານກ່ຽວກັບວຽກງານສະກັດກັ້ນ ນໍານັກວິທະຍາກອນທີ່ມາຈາກຄະນະກວດກາສູນກາງພັກ, ອົງການກວດກາແຫ່ງລັດ ທີ່ມີບົດຮຽນປະສົບການທາງດ້ານທິດສະດີ ແລະ ພຶດຕິກຳຕົວຈິງມາແລ້ວ ນັກສຳມະນາກອນທີ່ມາ ຮ່ວມກໍ່ແມ່ນ ຜູ້ທີ່ຮັບຜິດຊອບວຽກງານກວດກາ ຂອງຂະແໜງ ຜທ ໃນຂອບເຂດທົ່ວປະເທດ ແລະ ບັນດາໜ່ວຍພັກກົມ, ທຽບເທົ່າກົມ ແລະ ຄະນະພັກຮາກຖານພາຍໃນກະຊວງມາຮຽນຮູ້ເອົາບົດຮຽນ ເພື່ອໄປນໍາໃຊ້ເຂົ້າໃນການປະຕິບັດໜ້າທີ່ຂອງຕົນ.