ວັນທີ 17 ກັນຍາ 2024 ທ່ານ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທັງເປັນຜູ້ຊີ້ນຳແຂວງ ຫຼວງພະບາງ ພ້ອມດ້ວຄະນະ ໃຫ້ການຕ້ອນຮັບໂດຍທ່ານ ຄຳຂັນ ຈັນທະວີສຸກ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງພະບາງ ພ້ອມຄະນະ

ການເຄື່ອນໄຫວຢ້ຽມຢາມຄັ້ງນີ້ ທ່ານ ຄຳຂັນ ຈັນທະວີສຸກ ໄດ້ລາຍງານຜົນເສຍຫາຍເບື້ອງຕົ້ນຈາກໄພນໍ້າຖ້ວມ ຢູ່ແຂວງຫຼວງພະບາງ, ຈາກນັ້ນ ທ່ານ ປອ ຄຳພັນ ພົມມະທັດ ກໍ່ໄດ້ສະແດງຄວາມເປັນຫ່ວງເປັນໃຍ ແລະ ເຊື່ອໝັ້ນຕໍ່ຄະນະພັກ, ຄະນະນຳຂອງແຂວງໃນການ ແກ້ໄຂຟື້ນຟູເຂດທີ່ຖືກນໍ້າຖ້ວມ ໃຫ້ກັບມາສູ່ສະພາບປົກກະຕິ ພ້ອມນີ້ ຍັງໄດ້ມອບເງິນສົດ ຈຳນວນ 1.000.000.000 ກີບ (ໜຶ່ງຕື້ກີບ) ທີ່ອຸປະຖໍາໂດຍບໍລິສັດ PT ຈຳກັດ ນະຄອນຫຼວງວຽງຈັນ ເພື່ອນຳໄປຊ່ວຍເຫຼືອປະຊາຊົນທີ່ຖືກນໍ້າຖ້ວມຢູ່ຫຼາຍພຶ້ນທີ່ຂອງແຂວງຫຼວງພະບາງ ເພື່ອເປັນການບັນເທົາທຸກໃນຍາມທີ່ພົບ​ຄວາມລໍາບາກ ​ແລະ ໄດ້ສະແດງເຖິງຄວາມມີນໍ້າໃຈ, ຄວາມສາມັກຄີ​ເອື້ອ​​ເຟື້ອ​ເພື່ອ​ແຜ່ ຊ່ວຍເຫຼືອເຊິ່ງກັນ ແລະ ກັນ ຂອງຄົນລາວທີ່ມີຕໍ່ກັນ. ນອກນັ້ນ, ຍັງໄດ້ມອບງົບປະມານຈຳນວນໜຶ່ງໃຫ້ຄະນະກວດກາແຂວງເພື່ອນຳໃຊ້ເຂົ້າໃນການຈັດຝຶກອົບຮົມວຽກງານກວດກາ ແລະ ຊື້ອຸປະກອນທີ່ຈຳເປັນໃຫ້ແກ່ບັນດາຄະນະກວດກາພັກ-ລັດເມືອງຈຳນວນໜຶ່ງເພື່ອຮັບໃຊ້ໃນການເຄື່ອນໄຫວວຽກງານກວດກາ. ເຊິ່ງຕາງໜ້າຮັບໂດຍ ທ່ານ ຄຳຂັນ ຈັນທະວີສຸກ.

ຈາກນັ້ນ, ຍັງໄດ້ລົງຢ້ຽມຢາມ ປະຊາຊົນຢູ່ບ້ານໂນນສະອາດ, ພະບາດໃຕ້ ແລະ ບ້ານສັງຄະໂລກ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ນະຄອນຫຼວງພະບາງ ເພື່ອຢື້ຢາມຖາມຂ່າວ, ໃຫ້ກຳລັງໃຈປະຊາຊົນບັນດາເຜົ່າ ແລະ ສະແດງເຖິງຄວາມເປັນຫ່ວງເປັນໃຍຂອງພັກ ແລະ ລັດຖະບານທີ່ມີຕໍ່ປະຊາຊົນ.