ວັນທີ 16 ກັນຍາ 2024 ທ່ານ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທັງເປັນຜູ້ຊີ້ນຳແຂວງ ຫຼວງນໍ້າທາ ພ້ອມດ້ວຍຄະນະ ໂດຍມີຄະນະພັກ,ຄະນະນຳຂອງແຂວງ ນຳພາສືບຕໍ່ເຄື່ອນໄຫວຢ້ຽມຢາມປະຊາຊົນທີ່ຖືກຜົນກະທົບຈາກໄພນໍ້າຖ້ວມໃນຫຼາຍເຂດຂອງແຂວງຫຼວງນໍ້າທາ ນອກຈາກໄດ້ສືບຕໍ່ເຄື່ອນໄຫວຢ້ຽມຢາມ ທ່ານ ປອ ຄຳພັນ ພົມມະທັດ ຍັງໄດ້ມອບເງິນສົດຕື່ມອີກ 2.000.000.000 ກີບ (ສອງຕື້ກີບ) ທີ່ອຸປະຖຳໂດຍບໍລິສັດ PT ຈຳກັດ ນະຄອນຫຼວງວຽງຈັນ ເພື່ອນຳໄປຊ່ວຍເຫຼືອ ຄອບຄົວທີ່ຖືກນໍ້າຖ້ວມ ຕາງໜ້າຮັບໂດຍ ທ່ານ ວຽງສະຫວັດ ສີພັນດອນ ເລຂາພັກແຂວງ, ເຈົ້າແຂວງ ຫຼວງນໍ້າທາ ເພື່ອນຳໄປມອບຕໍ່ໃຫ້ປະຊາຊົນຜູ້ປະສົບໄພໃນຄັ້ງນີ້, ພ້ອມນີ້ກໍ່ໄດ້ລົງຢ້ຽມຢາມ ປະຊາຊົນ ແລະ ມອບເຄື່ອງຢູ່ບ້ານ ວຽງໃຕ້, ວຽງເໜຶອ ແລະ ບ້ານດອນສຳພັນ ເມືອງຫຼວງນໍ້າທາ. ເຊິ່ງການລົງຢ້ຽມຢາມ ແລະ ມອບເຄື່ອງໃນຄັ້ງນີ້, ແມ່ນໄດ້ສະແດງເຖິງຄວາມເປັນຫ່ວງເປັນໃຍ, ໃຫ້ກຳລັງໃຈ ຕໍ່ປະຊາຊົນບັນດາເຜົ່າທີ່ຖືກຜົນກະທົບຈາກໄພນໍ້າຖ້ວມໃນລະຫວ່າງວັນທີ 9-11 ກັນຍາ 2024. ທັງເປັນການບັນເທົາທຸກໃນຍາມທີ່ພົບຄວາມລໍາບາກ ແລະ ໄດ້ສະແດງເຖິງຄວາມມີນໍ້າໃຈ, ຄວາມສາມັກຄີເອື້ອເຟື້ອເພື່ອແຜ່ ຊ່ວຍເຫຼືອເຊິ່ງກັນ ແລະ ກັນ ຂອງຄົນລາວທີ່ມີຕໍ່ກັນ.