ວັນທີ 15 ກັນຍາ 2024 ທ່ານ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທັງເປັນຜູ້ຊີ້ນຳແຂວງ ຫຼວງນໍ້າທາ ພ້ອມດ້ວຍຄະນະ ເຄື່ອນໄຫວຢ້ຽມຢາມປະຊາຊົນທີ່ຖືກຜົນກະທົບຈາກໄພນໍ້າຖ້ວມທີ່ແຂວງຫຼວງນໍ້າທາ ໃຫ້ການຕ້ອນຮັບໂດຍທ່ານ ວຽງສະຫວັດ ສີພັນດອນ ເລຂາພັກແຂວງ, ເຈົ້າແຂວງ ຫຼວງນໍ້າທາ ພ້ອມດ້ວຍຄະນະ.

ການເຄື່ອນໄຫວຢ້ຽມຢາມຄັ້ງນີ້ແມ່ນໄດ້ມອບເຄື່ອງອຸປະໂພກ, ບໍລິໂພກ ແລະ ເງິນສົດ ຈຳນວນ 600.000.000 ກີບ ລວມມູນຄ່າທັງໝົດ 820,000,000 ກີບ, ນອກນີ້ຍັງມີຢາປິ່ນປົວພະຍາດຈຳນວນໜຶ່ງ ມອບໃຫ້ແກ່ຄອບຄົວທີ່ຖືກນໍ້າຖ້ວມ ຕາງໜ້າຮັບໂດຍ ທ່ານ ວຽງສະຫວັດ ສີພັນດອນ ເພື່ອນຳໄປມອບຕໍ່ໃຫ້ຜູ້ປະສົບໄພໃນຄັ້ງນີ້, ພ້ອມນີ້ກໍ່ໄດ້ລົງຢ້ຽມຢາມ ປະຊາຊົນຢູ່ເຂດທີ່ໄດ້ຮັບຜົນກະທົບໜັກຄື:​ ບ້ານດອນໃໝ່,​ ບ້ານປ່າສັກ,​ ບ້ານປຸ່ງ, ບ້ານດອນຄູນ, ບ້ານນາເຕີຍ ແລະ ບ້ານນໍ້າແດງ ເມືອງຫຼວງນໍ້າທາ ພ້ອມສະແດງຄວາມເປັນຫ່ວງເປັນໃຍ ຕໍ່ປະຊາຊົນບັນດາເຜົ່າທີ່ຖືກຜົນກະທົບຈາກໄພນໍ້າຖ້ວມໃນລະຫວ່າງວັນທີ 9-11 ກັນຍາ 2024 ເຊິ່ງໄດ້ສ້າງຜົນເສຍຫາຍເປັນວົງກວ້າງກວມເອົາ 3 ເມືອງ, ປະຊາຊົນໄດ້ຮັບຜົນກະທົບຫຼາຍ ກວ່າ 40.255 ຄົນ, ເຮືອນພັດໄຫຼນໍ້າຫຼາຍກວ່າ 115 ຫຼັງຄາເຮືອນ, ປະຊາຊົນຂາດທີ່ຢູ່ອາໃສ, ສູນເສຍຊັບສິນ (ບໍ່ເຫຼືອຫຍັງ) ຫຼາຍກວ່າ 2,765 ຄົນ ແລະ ມີຄົນເສຍຊິວິດ 02 ຄົນ, ໃນນີ້: ເມືອງຫຼວງນໍ້າທາ (ເທດສະບານແຂວງ) ໜັກໜ່ວງກວ່າໝູ່: ມີ 46 ບ້ານ, 4,231 ຄອບຄົວ, 3,519 ຫຼັງຄາເຮືອນ, 18,859 ຄົນ; ເມືອງສິງ: ມີ 7 ບ້ານ, 261 ຄອບຄົວ; ເມືອງນາແລ: ມີ 14 ບ້ານ, 1,751 ຄອບຄົວ, 7,188 ຄົນ. ການ​ມອບ​ເຄື່ອງ​ຊ່ວຍ​ເຫຼືອ​​ຄັ້ງ​ນີ້ ​ແມ່ນ​ໄດ້ສະແດງເຖິງຄວາມເປັນຫ່ວງເປັນໃຍ ທີ່ມີຕໍ່ປະຊາຊົນລາວບັນດາເຜົ່າ ກໍຄື​ຄອບຄົວຜູ້ທີ່ຖືກຜົນກະທົບຈາກໄພນໍ້າຖ້ວມ ທັງ​ເປັນການບັນເທົາທຸກໃນຍາມທີ່ພົບ​ຄວາມລໍາບາກ ​ແລະ ໄດ້ສະແດງເຖິງຄວາມມີນໍ້າໃຈ, ຄວາມສາມັກຄີ​ເອື້ອ​​ເຟື້ອ​ເພື່ອ​ແຜ່ ຊ່ວຍເຫຼືອເຊິ່ງກັນ ແລະ ກັນ ຂອງຄົນລາວທີ່ມີຕໍ່ກັນ.