ໃນໂອກາດນີ້ ສະຫາຍ ອານຸພາບ ຕຸລາລົມ ໄດ້ລາຍງານສະພາບລວມໂດຍຫຍໍ້ຂອງນະຄອນຫຼວງວຽງຈັນ ໃນໄລຍະຜ່ານມາ ເຊິ່ງສະຫາຍໃຫ້ຮູ້ວ່າ: ສະພາບເສດຖະກິດຂອງນະຄອນຫຼວງວຽງຈັນຄາດວ່າຈະຂະຫຍາຍຕົວໃນລະດັບ 5,7% (ມະຕິສະພາໃຫ້ບັນລຸ 5,5%), ລວມຍອດຜະລິດຕະພັນພາຍໃນ (GDP) ຄາດວ່າຈະບັນລຸ 43,960.07 ຕື້ກີບ, ເທົ່າກັບ 51.23% ຂອງແຜນການປີ (ມະຕິສະພາ ໃຫ້ບັນລຸ 85,799 ຕື້ກີບ), GDP ສະເລ່ຍຕໍ່ຫົວຄົນ 43.14 ລ້ານກີບ (ມະຕິສະພາໃຫ້ໄດ້ 81.7 ລ້ານກີບ), ໃນນັ້ນ ຂະແໜງກະສິກໍາ ຂະຫຍາຍຕົວເພີ່ມຂຶ້ນ 4.2%, ກວມເອົາ 13% ຂອງ GDP; ຂະແໜງອຸດສາຫະກໍາ ຂະຫຍາຍຕົວເພີ່ມຂຶ້ນ 7.05%, ກວມເອົາ 48% ຂອງ GDP; ຂະແໜງການບໍລິການ ຂະຫຍາຍຕົວເພີ່ມຂຶ້ນ 3.8%, ກວມເອົາ 39% ຂອງ GDP; ສາມາດເກັບລາຍຮັບງົບປະມານໄດ້ທັງໝົດ 5,029.66 ຕື້ກີບ ເທົ່າກັບ 70.39% ຂອງແຜນການສະພາຮັບຮອງ 7,144.42 ຕື້ກີບ; ດ້ານລາຍຈ່າຍປະຕິບັດໄດ້ 426.33 ຕື້ກີບ ເທົ່າກັບ 74.71%; ດ້ານດຸນດ່ຽງປະຕິບັດໄດ້ 506.52 ຕື້ກີບ ເທົ່າກັບ 44.82%. ພ້ອມນີ້ ຍັງໄດ້ຍົກໃຫ້ເຫັນບາງບັນຫາທີ່ພົ້ນເດັ່ນເປັນຕົ້ນແມ່ນບັນຫາຂໍ້ຂັດແຍ່ງທີ່ດິນ, ວຽກງານປັບປຸງກົງຈັກການຈັດຕັ້ງ, ການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ທົ່ວອົງຄະນະພັກນະຄອນຫຼວງວຽງຈັນ, ວຽກງານຄົ້ນຄວ້າຄໍາຮ້ອງ ແລະ ຄໍາສະເໜີ, ການແກ້ໄຂຜົນຂອງການກວດກາ. ຈາກນັ້ນ, ສະຫາຍ ວິລະສັກ ນາມມຸນຕຣີ ຄະນະປະຈໍາພັກ, ປະທານຄະນະກວດກາພັກ, ປະທານອົງການກວດກາລັດ ນະຄອນຫຼວງວຽງຈັນ ກໍ່ໄດ້ລາຍງານສະພາບການເຄື່ອນໄຫວວຽກງານກວດກາ ແລະ ການຈັດຕັ້ງປະຕິບັດຜົນຂອງການກວດກາ ໃນໄລຍະຜ່ານມາ ເປັນຕົ້ນ ວຽກງານກວດກາພັກ, ວຽກງານກວດກາລັດ, ວຽກງານຄົ້ນຄວ້າຄໍາຮ້ອງ ແລະ ຄໍາສະເໜີ, ວຽກງານຕ້ານ ແລະ ສອບສວນການສໍ້ລາດບັງຫຼວງ, ວຽກຕິດຕາມການຈັດຕັ້ງປະຕິບັດຜົນການກວດກາ, ວຽກຕິດຕາມຜົນການກວດສອບ, ບັນຫາທີ່ຍັງຄົງຄ້າງ ແລະ ບາງຂໍ້ສະເໜີຕໍ່ຂັ້ນເທິງ.