ໃນວັນທີ 29 ສິງຫາ 2024 ນີ້, ທີ່ຫ້ອງປະຊຸມ ຫ້ອງວ່າການແຂວງສະຫວັນນະເຂດ ໄດ້ຈັດກອງປະຊຸມມອບໃບຢັ້ງຍືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2023 ໃຫ້ແກ່ໜ່ວຍພັກຮາກຖານຄະນະກວດກາພັກແຂວງ. ໃຫ້ກຽດເຂົ້າຮ່ວມເປັນປະທານກອງປະຊຸມ ໂດຍ ສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ, ສະຫາຍ ລຳທອງ ຂອບສີລາວົງ ກຳມະການປະຈຳພັກແຂວງ, ເລຂາ ໜ່ວຍພັກ ປະທານຄະນະກວດກາພັກ-ລັດແຂວງ, ສະຫາຍ ນາງ ວົງໄນ ໄຊຍະວົງ ຮອງຫົວໜ້າຂະແໜງກໍ່ສ້າງພັກ ຕາງໜ້າຈາກຄະນະຈັດຕັ້ງແຂວງ ພ້ອມດ້ວຍບັນດາສະມາຊິກພັກພາຍໃນໜ່ວຍ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມ ສະຫາຍ ລຳທອງ ຂອບສີລາວົງ ໄດ້ຜ່ານບົດສະຫຼຸບຕີລາຄາການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງໜ່ວຍພັກຮາກຖານ ຄະນະກວດກາພັກແຂວງ ໃນປີ 2023 ເຊິ່ງມີຜົນສໍາເລັດຫຼາຍດ້ານເປັນຕົ້ນ: ໄດ້ເອົາໃຈໃສ່ ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ-ພະນັກງານ ເປັນເຈົ້າການເຊື່ອມຊຶມຕິດຕາມ, ກວດກາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ແລະ ບັນດາມະຕິຄຳສັ່ງຂອງສູນກາງພັກ, ເຊິ່ງປະຈຸບັນທົ່ວແຂວງມີໜ່ວຍພັກທັງໝົດ 1,956 ໜ່ວຍພັກ, ໜ່ວຍພັກສຳນັກງານ 914 ໜ່ວຍພັກ, ໜ່ວຍພັກບ້ານ 1,042 ໜ່ວຍພັກ, ໄດ້ຕີລາຄາຈັດແບ່ງປະເພດຄື: ປະເພດແຂງ 462 ໜ່ວຍພັກ, ປະເພດກາງ 387 ໜ່ວຍພັກ, ໜ່ວຍພັກອ່ອນ 0 ໜ່ວຍພັກ, ມີໜ່ວຍພັກປອດໃສ ເຂັ້ມແຂງ ໜັກແໜ້ນ 1,107 ໜ່ວຍພັກ, ກວມ 56.59%, ທົ່ວແຂວງມີສະມາຊິກພັກທັງໝົດ 32,019 ສະຫາຍ, ຍິງ 8,936 ສະຫາຍ, ການລົງວິໄນຕໍ່ຄະນະພັກ ແລະ ສະມາຊິກພັກທົ່ວແຂວງ ປະຈຳປີ 2022 ມີ 74 ສະຫາຍ, ຍິງ 4 ສະຫາຍ. ປະຈຸບັນໜ່ວຍພັກຮາກຖານຄະນະກວດກາພັກແຂວງ ມີຈໍານວນສະມາຊິກພັກທັງໝົດ 42 ສະຫາຍ, ຍິງ 14 ສະຫາຍ. ຜ່ານການຕີລາຄາດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ດ້ວຍມາດຖານການໃຫ້ຄະແນນ ເຫັນວ່າດ້ານການເມືອງ: ສາມາດຈັດຕັ້ງປະຕິບັດໄດ້ 1,99 ຄະແນນ, ດ້ານແນວຄິດສາມາດ ບັນລຸໄດ້ 1,48 ຄະແນນ, ດ້ານການຈັດຕັ້ງສາມາດບັນລຸໄດ້ 1,48 ຄະແນນ, ດ້ານແບບແຜນການນຳພາສາມາດບັນລຸໄດ້ 1,95 ຄະແນນ, ຄະແນນລວມຂອງໜ່ວຍພັກໄດ້ 9,81 ຄະແນນ, ເຊິ່ງບັນລຸໄດ້ຕາມຈຸດປະສົງຄາດໝາຍທີ່ວາງໄວ້ ແລະ ສາມາດມາດຈັດປະເພດໜ່ວຍພັກເປັນປະເພດແຂງ. ຈາກນັ້ນ, ສະຫາຍ ພູວັງ ເກດແກ້ວພົມພອນ ຍັງໄດ້ໃຫ້ກຽດມອບໃບຢັ້ງຢືນນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ ໜ່ວຍພັກຮາກຖານ ຄະນະກວດກາພັກແຂວງປະຈຳປີ 2023 ໃຫ້ກຽດຮັບໂດຍສະຫາຍ ລໍາທອງ ຂອບສີລາວົງ.