ໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກ ໃນລະຫວ່າງວັນທີ 02-06 ກັນຍາ 2024 ທ່ານ ດຣ ອອມ ເຢິນຕຽງ, ລັດຖະມົນຕີອາວຸໂສ, ປະທານ ອົງການຕ້ານການສໍ້ລາດບັງຫຼວງ ແຫ່ງຣາຊະອານາຈັກ ກຳປູເຈຍ ( Kitti Nitti Kosal Pandita Om Yentieng ) ພ້ອມດ້ວຍຄະນະ ໄດ້ເຄື່ອນໄຫວພົບປະ ກັບທ່ານ ພົຕ ຈັນສະແຫວງ ທິບຄູນທອງ ຮອງເລຂາພັກແຂວງ,​ ປະທານອົງການກວດກາພັກ-ລັດແຂວງຫຼວງນໍ້າທາ ພ້ອມດ້ວຍຄະນະ ຢູ່ທີເຂດເສດຖະກິດພິເສດບໍ່ເຕ່ນ ແຂວງ ຫຼວງນໍ້າທາ. ໂດຍມີທ່ານ ໄຊຄຳ ອຸ່ນມີໄຊ ຮອງປະທານອົງການກວດກາແຫ່ງລັດ, ຮອງຫົວໜ້າອົງການຕ້ານການສໍລາດບັງຫຼວງ ສປປ ລາວ ເຂົ້າຮ່ວມ

ໃນພະທີ ທ່ານ ພົຕ ຈັນສະແຫວງ ທິບຄູນທອງ ໄດ້ສະແດງຄວາມຍິນດີຕ້ອນຮັບຄະນະຜູ້ແທນຂັ້ນສູງຈາກອົງການຕ້ານການສໍ້ລາດບັງຫຼວງ ແຫ່ງຣາຊະອານາຈັກ ກຳປູເຈຍ ທີ່ໄດ້ໃຫ້ກຽດມາເຄື່ອນໄຫວຢ້ຽມຢາມພົບປະໃນຄັ້ງນີ້ ພ້ອມລາຍງານຫຍໍ້ກ່ຽວກັບການພັດທະນາເສດຖະກິດ-ສັງຄົມ ຂອງແຂວງຫຼວງນໍ້າທາ ແລະ ການຈັດຕັ້ງປະຕິບັດວຽກງານກວດກາໃນໄລຍະຜ່ານມາ ແລະ ໄດ້ຮັບຟັງການລາຍງານຫຍໍ້ກ່ຽວກັບການຄຸ້ມຄອງເຂດເສດຖະກິດພິເສດບໍ່ເຕ່ນຫຼວງນໍ້າທາ.

ຈາກນັ້ນ, ທ່ານ ດຣ ອອມ ເຢິນຕຽງ ກໍ່ໄດ້ກ່າວຄຳຂອບໃຈຕໍ່ການຕ້ອນຮັບຢ່າງສົມກຽດ, ອົບອຸ່ນ, ຈິງໃຈ ຂອງຄະນະພັກ,​ ຄະນະນໍາແຂວງຫຼວງນໍ້າທາ ທີ່ໄດ້ໃຫ້ກຽດຕ້ອນຮັບຄະນະໃນຄັ້ງນີ້, ທ່ານຍັງໄດ້ສະແດງຄວາມຊົມເຊີຍຕໍ່ຜົນສຳເລັດໃນການປະຕິບັດວຽກງານແຕ່ລະດ້ານໂດຍສະເພາະແມ່ນວຽກງານພັດທະນາເສດຖະກິດ-ສັງຄົມ ແລະ ວຽກງານກວດກາ,​ ວຽກງານຕ້ານການສໍ້ລາດບັງຫຼວງ.