ໃນຕອນເຊົ້າຂອງວັນທີ 23 ສິງຫາ 2024 ສະຫະພັນແມ່ຍິງຮາກຖານຄະນະກວດກາພັກ-ອົງການກວດກາລັດແຂວງເຊກອງ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ 3 ດີ ແລະ ຮັບຮອງເປັນສະຫະພັນຮາກຖານ 3 ດີ ໄລຍະ ທີ II ( 2023-2024 ) ພ້ອມທັງເຜີຍແຜ່ເຊື່ອມຊຶມ, ເນື້ອໃນຂໍ້ແຂ່ງຂັນ 3 ດີ ໄລຍະປີ 2025, ທີ່ຫ້ອງປະຊຸມຊັ້ນ III ຫ້ອງວ່າການແຂວງເຊກອງ. ໃຫ້ກຽດເປັນປະທານຮ່ວມໂດຍ ທ່ານ ອ່ອນມະນີວັນ ຈັນດາວົງ ຮອງເລຂາ ໜ່ວຍພັກຮາກຖານ, ຮອງປະທານຄະນະກວດກາພັກ-ລັດແຂວງ, ທ່ານ ນາງ ເພັດດາແກ້ວ ພົນສະລາດ, ຮອງເລຂາ ໜ່ວຍພັກຮາກຖານ, ຮອງປະທານຄະນະບໍລິຫານງານສະຫະພັນແມ່ຍິງແຂວງ ແລະ ທ່ານ ນາງ ເພັດສຸພັນ ແກ້ວລັງສີ ປະທານສະຫະພັນແມ່ຍິງຮາກຖານຄະນະກວດກາພັກແຂວງ, ມີສະຫະພັນແມ່ຍິງຮາກຖານກຸ່ມອົງການຈັດຕັ້ງມະຫາຊົນ ພ້ອມດ້ວຍສະມາຊິກສະຫະພັນແມ່ຍິງຮາກຖານ ເຂົ້າຮ່ວມທັງໝົດ 18 ທ່ານ.

ໃນພິທີ ທ່ານ ນາງ ລັດສະໝີ ວັນລະເບືອມ ຮອງປະທານສະຫະພັນແມ່ຍິງຮາກຖານ ຄະນະກວດກາພັກ-ລັດແຂວງ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານ 3 ດີ ໄລຍະທີ II ( 2023-2024 ) ເຊິ່ງໄດ້ຍົກໃຫ້ເຫັນຜົນງານບາງດ້ານເປັນຕົ້ນ: ຄະນະແມ່ຍິງຮາກຖານໄດ້ເປັນເຈົ້າການໃນການສຶກສາອົບຮົມການເມືອງ-ແນວຄິດ, ເຕົ້າ ໂຮມຄວາມສາມັກຄີ, ມີສະຕິເຄົາລົບຕໍ່ການຈັດຕັ້ງ, ນຳພາການຮ່ວມຊີວິດການເມືອງ ຂອງສະຫະພັນແມ່ຍິງໃນຄວາມຮັບຜິດຊອບຂອງຕົນເປັນປົກກະຕິຕໍ່ເນື່ອງ, ເຂົ້າຮ່ວມການເຜີຍແຜ່, ເຊື່ອມຊຶ່ມ, ເອກະສານວັນສຳຄັນຕ່າງໆຂອງພັກ, ຂອງຊາດ. ເອົາໃຈໃສ່ຊຸກຍູ້, ຕິດຕາມ ແລະ ນຳພາສະມາຊິກສະຫະພັນແມ່ຍິງເປັນເຈົ້າການເຄື່ອນໄຫວວຽກງານກຸ່ມທ້ອນເງິນ ເຊິ່ງປະຈຸບັນມີສະມາຊິກກຸ່ມທ້ອນເງິນທັງໝົດ 26 ທ່ານ, ມີຈຳນວນເງິນທັງໝົດ 30,384,000 ກີບ, ປ່ອຍກູ້ 18,230,000 ກີບ, ໄດ້ດອກເບ້ຍຈໍານວນ 4,084,000 ກີບ, ໄດ້ຊຸກຍູ້, ປຸກລະດົມສະມາຊິກແມ່ຍິງເຂົ້າຮ່ວມກອງທຶນປະກັນສັງຄົມແມ່ຍິງ, ການສ້າງເສດຖະກິດຄອບຄົວໃຫ້ໄດ້ຮັບການພັດທະນາດີຂຶ້ນ ເຮັດໃຫ້ສະມາຊິກແມ່ຍິງຈຳ ນວນໜຶ່ງໄດ້ເປັນຄອບຄົວແບບຢ່າງ ໃນການສ້າງເສດຖະກິດຄອບຄົວ ດ້ວຍກິດຈະກຳຕ່າງໆຕາມທ່າແຮງຂອງແຕ່ລະຄອບຄົວຂອງສະມາຊິກເຊັ່ນ: ການຕໍ່າຫູກ, ປູກຝັງ, ລ້ຽງສັດ, ສ້າງຫ້ອງແຖວ, ເປີດຮ້ານອາຫານ, ເດີ່ນບານ ແລະ ຄ້າ ຂາຍ, ເຊິ່ງສາມາດສ້າງລາຍຮັບໃຫ້ແກ່ຄອບຄົວ 5,000,000-20,000,000ກີບຕໍ່ປີ. ນອກນີ້, ຍັງເປັນແບບຢ່າງທີ່ດີໃນການດຳລົງຊີວິດ, ການພົວພັນໃນຄອບຄົວ ແລະ ສັງຄົມ ສອດຄ່ອງກັບປະເພນີອັນດີງາມຂອງຊາດ ແລະ ລະບຽບກົດໝາຍ, ມີການແບ່ງງານຄວາມຮັບຜິດຊອບໃຫ້ສະມາຊິກພາຍໃນຄອບຄົວ, ຕ້ານ ແລະ ສະກັດກັ້ນປະກົດການຫຍໍ້ທໍ້, ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກໃນຄອບຄົວ. ຈາກຜົນງານດັ່ງກ່າວຈຶ່ງເຮັດໃຫ້ສະຫະພັນແມ່ຍິງຮາກຖານຄະນະກວດກາພັກ-ລັດແຂວງ ໄດ້ຖືກຮັບຮອງເປັນສະຫະພັນແມ່ຍິງຮາກຖານ 3 ດີໃນໄລຍະທີ II (2023-2024) ແລະ ສາມາດຈັດປະເພດສະມາຊິກ 3 ດີ ປະເພດ I ມີ 11 ສະຫາຍ.