ທ່ານ ປອ ຄຳພັນ ພົມມະທັດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ຫຼວງນ້ຳທາ
24/08/2024
ໃນຕອນເຊົ້າຂອງວັນທີ 22 ສິງຫາ 2024, ທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ, ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາ, ໂດຍໃຫ້ການຕ້ອນຮັບຈາກທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫຼວງນໍ້າທາ ພ້ອມດ້ວຍຄະນະ.
ການເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້, ແມ່ນໄດ້ຮັບຟັງການລາຍງານຫຍໍ້ການຈັດຕັ້ງປະຕິບັດມະຕິກອງປະຊູມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ຕິດພັນກັບ ມະຕິ 04 ແລະ ການດໍາເນີນກອງປະຊູມໃຫຍ່ 3 ຂັ້ນ ຂອງພັກ ຊຶ່ງເຫັນໄດ້ວ່າ ຄະນະພັກ, ຄະນະນໍາຂອງແຂວງໄດ້ສຸມໃສ່ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ຂອງແຂວງຫຼວງນໍ້າທາ. ພ້ອມດຽວກັນນັ້ນ, ກໍໄດ້ສຸມໃສ່ການຈັດຕັ້ງປະຕິບັດຄໍາສັ່ງເລກທີ 13/ນຍ ວ່າດ້ວຍການເພີ່ມທະວີແກ້ໄຂບັນຫາເຄັ່ງ ຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ແລະ ຈັດຕັ້ງຜັນຂະຫຍາຍ 2 ວາລະແຫ່ງຊາດ ລົງເຖິງທ້ອງຖິ່ນຮາກຖານ ແລະ ນໍາພາຈັດຕັ້ງປະຕິບັດມີຜົນສໍາເລັດໃນຫຼາຍດ້ານ, ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍພື້ນຖານ. ໃນ 06 ເດືອນຜ່ານມາ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຖືກທິດໃນລະດັບ 5,7% ຕໍ່ປີ, ລວມຍອດຜະລິດຕະພັນພາຍໃນ (GDP) ບັນລຸໄດ້ 7,393.17 ຕື້ກີບ. ໃນນີ້, ຂະແໜງກະສິກຳ ແລະ ປ່າໄມ້ ກວມ 59.89%, ອຸດສາຫະກຳ ກວມ 21.21%, ການບໍລິການ ກວມ 18.43%, ສະເລ່ຍລາຍຮັບຕໍ່ຫົວຄົນ (ໃນປີ2023) ໄດ້ 2,298.53 ໂດລາສະຫະລັດ/ຄົນ/ປີ; ໄດ້ຊຸກຍູ້ການຜະລິດຂອງປະຊາຊົນເພື່ອຄໍ້າປະກັນສະບຽງອາຫານ ແລະ ການຜະລິດເປັນສິນຄ້າຢ່າງເປັນຂະບວນກວ້າງຂວາງ ເພື່ອສະໜອງໃຫ້ແກ່ຕະຫຼາດພາຍໃນ ແລະ ຂາຍສົ່ງອອກໄປຕ່າງປະເທດ; ໄດ້ເອົາໃຈໃສ່ຈັດສັນ, ນໍາໃຊ້ ແລະ ພັດທະນາທີ່ດິນ, ຄຸ້ມຄອງ-ປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມ, ປ່າໄມ້-ຊີວະນາໆພັນໃຫ້ຍືນຍົງ. ດ້ານລາຍຮັບ-ລາຍຈ່າຍງົບປະມານ: ໄດ້ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ດ້ວຍການສຸມໃສ່ການຫັນການເກັບລາຍຮັບເປັນທັນສະໄໝ ແລະ ສຸມໃສ່ສ້າງຖານລາຍຮັບໃໝ່ຈໍານວນໜຶ່ງໃນຂົງເຂດຕ່າງໆ, ໃນ 06 ເດືອນຜ່ານມາຈຶ່ງສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 1,322.83 ຕື້ກີບ, ເທົ່າກັບ 82.83% ຂອງແຜນການປີ; ໃນນີ້: ລາຍຮັບພູດສູນກາງ ປະຕິບັດໄດ້ 1,212.88 ຕື້ກີບ, ເທົ່າກັບ 84.94%; ລາຍຮັບພູດທ້ອງຖິ່ນ ປະຕິບັດໄດ້ 109.95 ຕື້ກີບ, ເທົ່າກັບ 65.07%; ສໍາລັບການດໍາເນີນກອງປະຊູມໃຫຍ່ 3 ຂັ້ນ ຂອງພັກ ຊຶ່ງມາຮອດປະຈຸບັນ ແມ່ນດໍາເນີນສໍາເລັດຢູ່ຂັ້ນຮາກຖານບ້ານ ແລະ ໜ່ວຍພັກອ້ອມຂ້າງເມືອງ.
ພາຍຫຼັງທີ່ໄດ້ຮັບຟັງການລາຍງານຈາກຄະນະນໍາແຂວງຫຼວງນໍ້າທາ, ທ່ານ ປອ ຄຳພັນ ພົມມະທັດ ກໍ່ໄດ້ສະແດງຄວາມຊົມເຊີຍຕໍ່ຄະນະພັກ, ຄະນະນຳຂອງແຂວງທີ່ໄດ້ພ້ອມກັນເອົາໃຈໃສ່ນຳພາ-ຊີ້ນຳວຽກງານໃນແຕ່ລະດ້ານ, ພ້ອມມີບາງຄຳເຫັນຊີ້ນຳເປັນຕົ້ນແມ່ນໄດ້ຍົກໃຫ້ເຫັນສະພາບການໂດຍລວມຂອງບັນດາປະເທດໃນພາກພື້ນສາກົນ ທີ່ສົ່ງຜົນກະທົບເຖິງ ສະພາບເສດຖະກິດ-ສັງຄົມປະເທດເຮົາ, ສະພາບເງິນເຟີ້, ອັດຕາແລກປ່ຽນ, ໂຄງການລົງທຶນຕ່າງໆ ລວມທັງຂົງເຂດກະສິກຳ ແລະ ເນັ້ນໃຫ້ຄະນະພັກ-ຄະນະນຳຕ້ອງກຳແໜ້ນຄວາມຮັບຜິດຊອບຕໍ່ໜ້າການເມືອງສູງ, ເລັງໃສ່ແກ້ໄຂບັນຫາຕົວຈິງ ໂດຍຕິດພັນກັບມະຕິກ່ຽວກັບການຜັນຂະຫຍາຍເຂົ້າສູ່ງລວງເລິກ, ການພັດທະນາເສດຖະກິດສັງຄົມເປັນເຈົ້າຕົນເອງ. ເອົາໃຈໃສ່ສືບຕໍ່ຕິດຕາມ ການເຜີຍແຜ່ເຊື່ອມຊຶມບັນດາມະຕິ, ຄຳສັ່ງ, ຄຳແນະນຳຕ່າງໆທີ່ສຳຄັນຂອງຊາດ. ວຽກງານການກະກຽມກອງປະຊຸມໃຫຍ່ 3 ຂັ້ນ ຂອງພັກ, ໃຫ້ລົງເລິກກວດເບິ່ງບຸກຄົນທີ່ມີຄວາມຮູ້ຄວາມສາມາດ, ມີຮັບຜິດຊອບສູງຕໍ່ໜ້າທີ່ການເມືອງ, ມີຄວາມເສຍສະຫຼະ, ຜູ້ທີມີຄວາມກ້າຫານກ້າເຮັດກ້າຮັບຜິດຊອບ, ບໍ່ຫວັງຜົນປະໂຫຍດສ່ວນຕົວ ເພື່ອສ້າງການຫັນປ່ຽນຢ່າງເລິກເຊິ່ງໃຫ້ແກ່ກອງປະຊູມໃຫຍ່ຂອງພັກ.
ຕອນບ່າຍຂອງມື້ດຽວກັນນີ້ທ່ານ ປອ ຄຳພັນ ພົມມະທັດ ພ້ອມດ້ວຍຄະນະນຳຂອງແຂວງ ແລະ ຄະນະຕິດຕາມ ຍັງໄດ້ລົງຢ້ຽມຢາມຂົງເຂດການຜະລິດເຂົ້ານາປີ, ໂຮງງານຢາງພາລາຢູນານ ແລະ ໂຄງການພັດທະນາແຫຼ່ງທ່ອງທ່ຽວຕາດນ້ຳດີ.
ພາບ-ຂ່າວ: ສະໝິງທອງ ເຄນສະບັບ
