ໃນຕອນເຊົ້າຂອງວັນທີ 13 ສິງຫາ 2024 ນີ້, ທີ່ຫ້ອງປະຊຸມ ຄະນະກວດກາສູນກາງພັກ ສະຫາຍ ສຸກຄໍາເພັດ ເຮືອງບຸດສີ ກໍາມະການປະຈໍາພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ໃຫ້ກຽດຕ້ອນຮັບການເຂົ້າພົບປະຢ້ຽມຢາມຂອງສະຫາຍ ຢາງ ເຢຢວນ ຮອງເລຂາຄະນະກຳມະການກວດກາລະບຽບວິໄນ ຄະນະພັກແຂວງ ຢຸນນານ, ຮອງຫົວໜ້າຄະນະກຳມະການກວດກາລັດແຂວງ ຢຸນນານ ສປ ຈີນ ພ້ອມດ້ວຍຄະນະ ໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ.

ໂອກາດດຽວກັນນີ້, ສະຫາຍ ສຸກຄໍາເພັດ ເຮືອງບຸດສີ ຕາງໜ້າຄະນະນໍາ ຄະນະກວດກາສູນກາງພັກ, ອົງການກວດກາແຫ່ງລັດ ສປປ ລາວ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ຕໍ່ການມາຢ້ຽມຢາມ ສປປ ລາວ ຂອງຄະນະນໍາ ຄະນະກວດກາ ແຂວງຢຸນນານໃນຄັ້ງນີ້ ຊຶ່ງເປັນການສືບຕໍ່ເສີມຂະຫຍາຍສາຍພົວພັນ ລະຫວ່າງ ສປປ ລາວ ແລະ ສປ ຈີນ ໃຫ້ນັບມື້ນັບເຂົ້າສູ່ລວງເລິກ. ພ້ອມທັງໄດ້ສະແດງຄວາມຂອບໃຈຕໍ່ ສະຫາຍ ຢາງ ເຢຢວນ ທີ່ໄດ້ແຈ້ງໃຫ້ຊາບກ່ຽວກັບສະພາບການພົ້ນເດັ່ນໃນການພັດທະນາເສດຖະກິດ-ສັງຄົມ, ການຄຸ້ມຄອງພັກຢ່າງຮອບດ້ານ ກໍຄືການກວດກາລັດ ແລະ ຕ້ານການສໍ້ລາດບັງຫຼວງ ຂອງແຂວງຢຸນນານ, ພາຍໃຕ້ການນໍາພາຂອງພັກຄອມມູນິດຈີນທີ່ມີສະຫາຍ ເລຂາທິການໃຫຍ່ ສີ ຈິນຜິງ ເປັນແກນກາງ ຊຶ່ງພັກ-ລັດ ແລະ ປະຊາຊົນຈີນສາມາດຍາດໄດ້ຜົນງານອັນໃຫຍ່ຫຼວງໃນທຸກດ້ານຕະຫຼອດໄລຍະທີ່ຜ່ານມາ.