ຕອນເຊົ້າຂອງວັນທີ 4 ສິງຫາ 2024 ນີ້, ໜ່ວຍພັກຄະນະກວດກາພັກ-ລັດ ເມືອງຂວາ ແຂວງຜົ້ງສາລີ ໄດ້ເປີດກອງປະຊຸມໃຫຍ່ຄັ້ງທີ I ຂອງຕົນຂຶ້ນ ທີ່ຫ້ອງປະຊຸມຫ້ອງການ-ການເງິນເມືອງຂວາ. ໂດຍການເປັນປະທານຂອງສະຫາຍ ພົມມີ ອິນມະສອນ ຮອງເລຂາພັກເມືອງ ປະທານກວດກາພັກ-ລັດ ເມືອງ, ເລຂາໜ່ວຍພັກຄະນະກວດກາພັກ-ລັດ ເມືອງ, ເປັນກຽດເຂົ້າຮ່ວມຂອງສະຫາຍ ພອນທະວີ ໄຊມົນຕີ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງ-ເມືອງຂວາ, ສະຫາຍ ຄໍາໄລ ສຸທິພອນ ຮອງເລຂາພັກເມືອງ ປະທານແນວລາວສ້າງຊາດ, ຜູ້ຊີ້ນໍາວຽກງານພັກພະນັກງານ, ມີຄະນະຮັບຜິດຊອບຂັ້ນເມືອງ, ຄະນະໜ່ວຍພັກ, ແຂກຖືກເຊີນ ພ້ອມດ້ວຍສະມາຊິກພັກພາຍໃນໜ່ວຍເຂົ້າຮ່ວມຢ່າງພ້ອມພຽງ.

ໃນກອງປະຊຸມ ສະຫາຍ ພົມມີ ອິນມະສອນ ໄດ້ຜ່ານຮ່າງລາຍງານການເມືອງ 2 ພາກ, ຕີລາຄາການເຄື່ອນໄຫວຈັດຕັ້ງປະຕິບັດວຽກງານແຕ່ລະດ້ານໃນໄລຍະ 5 ປີຜ່ານມາ (2019-2023) ແລະ ທິດທາງລວມ, ຄາດໝາຍສູ້ຊົນ ແລະ ວຽກງານຈຸດສຸມໃນ 5 ປີຕໍ່ໜ້າ (2024-2028 ). ໂດຍໄດ້ຍົກໃຫ້ເຫັນຜົນງານພົ້ນເດັ່ນບາງດ້ານເຊັ່ນ: ຄະນະພັກໄດ້ເອົາໃຈໃສ່ນໍາພາ-ຊີ້ນໍາ, ຊຸກຍູ້, ຕິດຕາມ ສະມາຊິກພັກໃນການເຂົ້າຮ່ວມຮັບຟັງການເຜີຍແຜ່, ເຊື່ອມຊຶມ, ມະຕິ, ຄໍາສັ່ງ, ແນວທາງແຜນນະໂຍບາຍຂອງພັກ ແລະ ລະບຽບກົດໝາຍຂອງລັດຢ່າງຕໍ່ເນື່ອງ ເຮັດໃຫ້ສະມາຊິກພັກ ຮັບຮູ້ເຂົ້າໃຈເລິກເຊິ່ງ, ມີທັດສະນະຫຼັກໝັ້ນການເມືອງໜັກແໜ້ນ, ມີຜົນສໍາເລັດໃນການຈັດຕັ້ງປະຕິບັດວຽກງານທີ່ໄດ້ຮັບມອບໝາຍ, ພ້ອມນີ້ຍັງໄດ້ສຸມໃສ່ຕິດຕາມ, ກວດກາການປະຕິບັດໜ້າທີ່ການເມືອງ, ພາລະບົດບາດຂອງຄະນະພັກແຕ່ລະຂັ້ນ, ຕິດຕາມການຮ່ວມຊີວິດພັກ, ການປະເມີນສະມາຊິກພັກ, ປະເມີນການສ້າງໜ່ວຍພັກປອດໃສ, ເຂັ້ມແຂງ ໜັກແໜ້ນ ເປັນປົກກະຕິ, ຜ່ານການຕິດຕາມເຫັນວ່າ ທົ່ວເມືອງມີໜ່ວຍພັກທັງໝົດ 123 ໜ່ວຍພັກ ໃນນີ້, ມີສະມາຊິກພັກແຂງ 1,371 ສະຫາຍ, ຍິງ 365 ສະຫາຍ, ສະມາຊິກພັກກາງ 266 ສະຫາຍ, ຍິງ 50 ສະຫາຍ, ສະມາຊິກພັກອ່ອນ 9 ສະຫາຍ, ເສຍທາດຂາດຄຸນ 2 ສະຫາຍ; ມີໜ່ວຍພັກທີ່ຖືກຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແຕ່ປີ 2020-2024 ຈໍານວນ 115 ໜ່ວຍພັກ; ວຽກງານກວດກາລັດແມ່ນໄດ້ສຸມໃສ່ກວດກາການປະຕິບັດແຜນພັດທະນາເສດຖະກິດ ແລະ ນໍາໃຊ້ເງິນບໍລິຫານລັດ ຢູ່ບັນດາຫ້ອງການອ້ອມຂ້າງເມືອງ, ສອງກອງບັນຊາການ ປກຊ-ປກສ ເມືອງ, ຜ່ານການກວດກາພົບເຫັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ບາງຂະແໜງການຍັງບໍ່ທັນມີຈຸດສຸມ, ການໃຊ້ຈ່າຍບໍລິຫານຈຳນວນໜຶ່ງບໍ່ທັນລະອຽດ; ນອກຈາກນີ້ຍັງໄດ້ຖືເອົາວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ເປັນບັນຫາສໍາຄັນ ໂດຍໄດ້ເອົາໃຈໃສ່ຈັດຕັ້ງເຜີຍແຜ່ເຊື່ອມຊຶມກົດໝາຍຕ້ານການສໍ້ລາດບັງຫຼວງ ແລະ ບັນດານິຕິກໍາທີ່ກ່ຽວກັບການຕ້ານການສໍ້ລາດບັງຫຼວງ, ໃຫ້ແກ່ສະມາຊິກພັກ, ພະນັກງານ- ລັດຖະກອນ, ທະຫານ, ຕຳຫຼວດ ແລະ ປະຊາຊົນ; ໄດ້ສໍາເລັດການແຈ້ງຊັບສິນຂອງພະນັກງານ-ລັດຖະກອນຮອບ III ຈຳນວນ 661 ຄົນ, ຍິງ 320 ຄົນ, ແກ້ໄຂບັນຫາປະກົດການຫຍໍ້ທໍ້ຈໍານວນໜຶ່ງ; ໄດ້ຮັບຄໍາຮ້ອງ ແລະ ຄໍາສະເໜີທັງໝົດ 44 ສະບັບ, ຄົ້ນຄວ້າແກ້ໄຂສໍາເລັດແລ້ວ 38 ສະບັບ, ກຳລັງແກ້ໄຂ 6 ສະບັບ, ໃນນັ້ນ, ຄໍາຮ້ອງ-ຄໍາສະເໜີ ທີ່ຜ່ານຕູ້ຮັບຄໍາຮ້ອງມີ 25 ສະບັບ, ຜ່ານຫ້ອງການກວດກາມີ 19 ສະບັບ, ໂດຍບັນດາຄໍາຮ້ອງ-ຄໍາສະເໜີດັ່ງກ່າວແມ່ນໄດ້ຮັບການແກ້ໄຂຢ່າງຖືກຕ້ອງ, ຕາມກົດໝາຍ. ພ້ອມນີ້ ຍັງໄດ້ຜ່ານທິດທາງແຜນພັດທະນາວຽກງານອົງການກວດກາລັດ 5 ປີ 2024-2028. ຈາກນັ້ນ, ສະມາຊິກພັກພາຍໃນໜ່ວຍ ໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່, ເຊິ່ງມີຜູ້ສະໝັກ 03 ສະຫາຍ, ເລືອກເອົາ 02 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາ ສະຫາຍ ພົມມີ ອິນມະສອນ ເປັນເລຂາໜ່ວຍພັກ, ສະຫາຍ ບຸນໄຊ ສົມພະນາວັດ ເປັນຮອງເລຂາໜ່ວຍ ທັງເປັນຜູ້ເຮັດວຽກງານກວດກາໜ່ວຍພັກ.