ໃນຕອນເຊົ້າຂອງວັນທີ 26 ກໍລະກົດ 2024, ທີ່ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດພິທີ ສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວຄົບຮອບ 69 ປີ (20 ກໍລະກົດ 1955 - 20 ກໍລະກົດ 2024)ຂຶ້ນ, ໂດຍການເປັນປະທານຂອງ ທ່ານ ປອ ດາວບົວລະພາ ບາວົງເພັດ ກຳມະການປະຈຳພັກ ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ, ມີຜູ້ຕາງໜ້າຈາກອົງການຈັດຕັ້ງມະຫາຊົນ, ພະນັກງານແມ່ຍິງບຳນານ, ຄະນະສະຫະພັນແມ່ຍິງ ແລະ ເອື້ອຍນ້ອງແມ່ຍິງພາຍໃນຄະນະກວດກາສູນກາງພັກ ແລະ ອົງການກວດກາແຫ່ງລັດເຂົ້າຮ່ວມ.

ໃນພິທີ ທ່ານ ນາງ ບຸນອ້ອມ ອຸ່ນມະໂນ ຄະນະບໍລິຫານງານສູນກາງສະຫະພັນແມ່ຍິງລາວສະໄໝທີ VIII, ປະທານ ສະຫະພັນມແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ລາຍງານຫຍໍ້ຜົນສໍາເລັດກ່ຽວກັບນໍາພາ-ຊີ້ນໍາການກະກຽມ ແລະ ດຳເນີນກອງປະຊຸມຂັ້ນໜ່ວຍ, ການກະກຽມກອງປະຊຸມໃຫຍ່ສະມາຊິກສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ ຄັ້ງທີ X; ຜ່ານຄໍາແນະນໍາ ຂອງສູນກາງສະຫະພັນແມ່ຍິງລາວ ເລກທີ 556/ສສຍລ, ລົງວັນທີ 25 ສິງຫາ 2023 ກ່ຽວກັບການກະກຽມດຳເນີນກອງປະຊຸມໃຫຍ່ຂອງສະຫະພັກແມ່ຍິງກະຊວງ, ອົງການ. ຫຼັງຈາກນັ້ນ ທ່ານ ນາງ ອາລຸນນາ ບຸດຕະລາດ ຮອງປະທານ ຄະນະສະຫະພັນມແມ່ຍິງ ຍັງໄດ້ຂຶ້ນຜ່ານມາດຖານ ຂອງປະທານ, ຮອງປະທານ ແລະ ຄະນະບໍລິຫານງານສະຫະພັນແມ່ຍິງກະຊວງ, ອົງການ, ນະຄອນຫຼວງວຽງຈັນ, ແຂວງ ຂອງສູນກາງສະຫະພັນແມ່ຍິງລາວ ສະບັບເລກທີ 210/ສສຍລ, ລົງວັນທີ 21 ມີນາ 2024.