17/07/2024
![ກອງປະຊຸມໃຫຍ່ ຄັ້ງທີ I ຂອງໜ່ວຍສະຫະພັນແມ່ຍິງ ກົມກວດກາພັກ](/sia/backend/web/images/download/Content_2024071903074229.jpg)
ກອງປະຊຸມໃຫຍ່ ຄັ້ງທີ I ຂອງໜ່ວຍສະຫະພັນແມ່ຍິງ ກົມກວດກາພັກ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດຂຶ້ນໃນຕອນເຊົ້າ ຂອງວັນທີ 12 ກໍລະກົດ 2024 ນີ້, ທີ່ສະໂມສອນຄະນະກວດກາສູນກາງພັກ ໂດຍການເປັນປະທານຂອງທ່ານ ນາງ ພອນວິໄລ ແກ້ວມະນີ ຮອງຫົວໜ້າພະແນກ, ຫົວໜ້າໜ່ວຍສະຫະພັນແມ່ຍິງກົມກວດກາພັກ, ໃຫ້ກຽດເຂົ້າຮ່ວມໂດຍທ່ານ ນາງ ບຸນອ້ອມ ອຸ່ນມະໂນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ, ທ່ານ ແສງທອງ ຊາວພູວົງ ຮອງຫົວໜ້າກົມກວດກາພັກ, ຜູ້ຊີ້ນໍາອົງການຈັດຕັ້ງມະຫາຊົນ, ມີຮອງປະທານສະຫະພັນແມ່ຍິງ, ຜູ້ຕາງໜ້າອົງການຈັດຕັ້ງມະຫາຊົນຂອງກົມ, ຄະນະໜ່ວຍສະຫະພັນແມ່ຍິງບັນດາກົມ ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ, ພ້ອມດ້ວຍສະມາຊິກສະຫະພັນແມ່ຍິງພາຍໃນໜ່ວຍເຂົ້າຮ່ວມ.
ໃນກອງປະຊຸມໃນຄັ້ງນີ້ ຄະນະໜ່ວຍໄດ້ຜ່ານຮ່າງລາຍງານການເມືອງ ໃນໄລຍະ 5 ປີ 2020-2024 ຂອງ ໜ່ວຍສະຫະພັນແມ່ຍິງກົມກວດກາພັກ; ທິດທາງແຜນການໃນຕໍ່ໜ້າ ແລະ ຜ່ານຮ່າງບົດສໍາຫຼວດນໍາພາລວມຂອງຄະນະໜ່ວຍແມ່ຍິງໃນໄລຍະ 5 ປີ ຜ່ານມາ ເຫັນວ່າມີຜົນສໍາເລັດໃນຫຼາຍດ້ານ ເປັນຕົ້ນ ຄະນະໜ່ວຍໄດ້ນໍາພາ-ຊີ້ນໍາສະມາຊິກພາຍໃນໜ່ວຍເຂົ້າຮ່ວມຂະບວນການເຄື່ອນໄຫວຂອງສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ, ຕິດຕາມ, ຊຸກຍູ້ເຂົ້າຮ່ວມການຄົ້ນຄວ້າເຊື່ອມຊຶມເອກະສານສໍາຄັນ, ມູນເຊື້ອຂອງພັກ, ຂອງຊາດ ແລະ ປະຕິບັດວຽກງານວິຊາສະເພາະຕິດພັນກັບການປະຕິບັດວຽກງານ 3 ດີ ແລະ ຂໍ້ແຂ່ງຂັນຮັກຊາດ-ພັດທະນາ ຢ່າງເປັນຂະບວນຟົດຟື້ນ. ຈາກນັ້ນ, ກອງປະຊຸມໄດ້ດໍາເນີນການປ່ອນບັດເລືອກຕັ້ງເອົາຄະນະໜ່ວຍສະຫະພັນແມ່ຍິງກົມກວດກາພັກຊຸດໃໝ່ ຕາມກົດລະບຽບຂອງແມຍິງລາວ, ເຊິ່ງກອງປະຊຸມຄັ້ງນີ້ ໄດ້ມີຜູ້ລົງສະໝັກຮັບເລືອກຕັ້ງ 5 ທ່ານ, ເລືອກເອົາ 4 ທ່ານ, ກອງປະຊຸມຄັ້ງປະຖົມມະລືກໄດ້ເປັນເອກະສັນກັນເລືອກ ເອົາທ່ານ ນາງ ປະພາພອນ ໝັ້ນວິໄລສັກ ເປັນຫົວໜ້າໜ່ວຍສະຫະພັນແມ່ຍິງ ຊີ້ນໍາລວມ, ທ່ານ ນາງ ກ້າໄຊ ໄຊລືຢ່າງ ເປັນຮອງຫົວໜ້າໜ່ວຍ ຮັບຜິດຊອບວຽກງານກວດກາ, ທ່ານ ນາງ ສົມສີ ສິດທິວົງ ເປັນຮອງຫົວໜ້າໜ່ວຍ ຮັບຜິດຊອບວຽກງານ 3 ດີ ແລະ ທ່ານ ນາງ ມາລາວັນ ໂຂງພູມຄໍາ ເປັນຄະນະ.