15/07/2024
![ກອງປະຊຸມໃຫຍ່ ຄັ້ງທີ I ຂອງໜ່ວຍສະຫະພັນແມ່ຍິງ ຫ້ອງການ](/sia/backend/web/images/download/Content_2024071506075445.jpg)
ໃນຕອນເຊົ້າ ວັນທີ 11 ກໍລະກົດ 2024 ນີ້, ທີ່ສະໂມສອນຄະນະກວດກາສູນກາງພັກ ໜ່ວຍສະຫະພັນແມ່ຍິງຫ້ອງການ ຄະນະກວດກາສູນກາງພັກ ແລະ ອົງການກວດກາແຫ່ງລັດ, ໄດ້ເປີດກອງປະຊຸມໃຫຍ່ໜ່ວຍສະຫະພັນແມ່ຍິງຄັ້ງທີ I ຂອງຕົນຂຶ້ນ, ໂດຍການເປັນປະທານຂອງທ່ານ ນາງ ສົມຮັກ ເລືອງຄໍາມາ ຮອງຫົວໜ້າພະແນກ, ຫົວໜ້າໜ່ວຍສະຫະພັນແມ່ຍິງຫ້ອງການ, ໃຫ້ກຽດເຂົ້າຮ່ວມໂດຍທ່ານ ນາງ ບຸນອ້ອມ ອຸ່ນມະໂນ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ, ທ່ານ ອາລິສັກ ພົມປິດາ ກໍາມະການຄະນະພັກ ຄະນະກວດກາສູນກາງພັກ, ເລຂາໜ່ວຍພັກຫ້ອງການ, ມີຮອງປະທານສະຫະພັນແມ່ຍິງ, ຜູ້ຕາງໜ້າອົງການຈັດຕັ້ງມະຫາຊົນຂອງຫ້ອງການ, ຄະນະໜ່ວຍສະຫະພັນແມ່ຍິງບັນດາກົມ ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ, ພ້ອມດ້ວຍສະມາຊິກສະຫະພັນແມ່ຍິງພາຍໃນໜ່ວຍສະຫະພັນແມ່ຍິງຫ້ອງການເຂົ້າຮ່ວມ.
ໃນກອງປະຊຸມໃນຄັ້ງນີ້ ຄະນະໜ່ວຍໄດ້ຜ່ານຮ່າງລາຍງານການເມືອງ ໃນໄລຍະ 5 ປີ 2020-2024 ຂອງ ໜ່ວຍສະຫະພັນແມ່ຍິງຫ້ອງການ; ທິດທາງແຜນການໃນຕໍ່ໜ້າ ແລະ ຜ່ານຮ່າງບົດສໍາຫຼວດນໍາພາລວມຂອງຄະນະໜ່ວຍແມ່ຍິງໃນໄລຍະ 5 ປີ ຜ່ານມາ ເຫັນວ່າມີຜົນສໍາເລັດໃນຫຼາຍດ້ານ ເປັນຕົ້ນ ຄະນະໜ່ວຍໄດ້ນໍາພາ-ຊີ້ນໍາສະມາຊິກພາຍໃນໜ່ວຍເຂົ້າຮ່ວມຂະບວນການເຄື່ອນໄຫວຂອງສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ, ຕິດຕາມ, ຊຸກຍູ້ເຂົ້າຮ່ວມການຄົ້ນຄວ້າເຊື່ອມຊຶມເອກະສານສໍາຄັນ, ມູນເຊື້ອຂອງພັກ, ຂອງຊາດ ແລະ ປະຕິບັດວຽກງານວິຊາສະເພາະຕິດພັນກັບການປະຕິບັດວຽກງານ 3 ດີ ແລະ ຂໍ້ແຂ່ງຂັນຮັກຊາດ-ພັດທະນາ ຢ່າງເປັນຂະບວນຟົດຟື້ນ. ຈາກນັ້ນ, ກອງປະຊຸມໄດ້ດໍາເນີນການປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ຕາມກົດລະບຽບຂອງແມຍິງລາວ, ເຊິ່ງກອງປະຊຸມຄັ້ງນີ້ ໄດ້ມີຜູ້ລົງສະໝັກຮັບເລືອກຕັ້ງ 5 ທ່ານ, ເລືອກເອົາ 4 ທ່ານ, ກອງປະຊຸມຄັ້ງປະຖົມມະລືກໄດ້ເປັນເອກະສັນກັນເລືອກ ເອົາທ່ານ ນາງ ສຸກສາຄອນ ໝື່ນໄຊຍະພົມ ເປັນຫົວໜ້າໜ່ວຍສະຫະພັນແມ່ຍິງ ຊີ້ນໍາລວມ, ທ່ານ ນາງ ສົມຮັກ ເລືອງຄໍາມາ ເປັນຮອງຫົວໜ້າໜ່ວຍ ຮັບຜິດຊອບວຽກງານກວດກາ, ທ່ານ ນາງ ມາລິສາ ວົງມະນີ ເປັນຮອງຫົວໜ້າໜ່ວຍ ຮັບຜິດຊອບວຽກງານ 3 ດີ ແລະ ທ່ານ ນາງ ອອນອານົງ ສຸດທິວົງ ເປັນຄະນະ.
ໃນຕອນທ້າຍຂອງກອງປະຊຸມ, ທ່ານ ອາລິສັກ ພົມປິດາ ຕາງໜ້າຄະນະປະທານກອງປະຊຸມ ຍັງໄດ້ມີຄໍາເຫັນໂອ້ລົມຕໍ່ກອງປະຊຸມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະໜ່ວຍສະຫະພັນແມ່ຍິງຫ້ອງການຊຸດເກົ່າ ຕະຫຼອດຮອດສະມາຊິກສະຫະພັນແມ່ຍິງຫ້ອງການ ທີ່ປະຕິບັດໜ້າທີ່ວຽກງານມີຜົນສໍາເລັດໃນຫຼາຍດ້ານໃນໄລຍະຜ່ານມາ ພ້ອມນີ້ຍັງໄດ້ຮ້ອງມາຍັງຄະນະໜ່ວຍສະຫະພັນແມ່ຍິງຊຸດໃໝ່ ກໍຄືສະມາຊິກແມ່ຍິງພາຍໃນໜ່ວຍ ໃຫ້ສືບຕໍ່ເສີມຂະຫຍາຍດ້ານດີທີ່ຕັ້ງໜ້າ, ປັບປຸງແກ້ໄຂບາງດ້ານທີ່ຍັງຄົງຄ້າງ, ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ສະມາຊິກສະຫັນແມ່ຍິງ ຕິດພັນກັບການປະຕິບັດການປະຕິບັດກົດລະບຽບຂອງພັກ, ກົດລະບຽບຂອງແມ່ຍິງລາວ, ກົດໝາຍ ແລະ ບຽບການຕ່າງໆ; ເປັນເຈົ້າການເຊື່ອມຊຶມກໍາແໜ້ນບັນດາແນວທາງນະໂຍບາຍຂອງພັກ, ນິຕິກໍາຕ່າງໆທີ່ກ່ຽວຂ້ອງກັບວຽກງານກວດກາ; ເພີ່ມທະວີການຊອກຮູ້ຮໍ່າຮຽນ, ບໍາລຸງກໍ່ສ້າງຕໍານິສົ່ງຂ່າວເຊິ່ງກັນ ແລະ ກັນ ເພື່ອສ້າງໃຫ້ເປັນພະນັກງານທີ່ດີເດັ່ນຂອງຫ້ອງການ ກໍຄືອົງການ, ຮັກສາໄດ້ຄວາມສາມັກຄີພາຍໃນ, ເປັນເຈົ້າການໃນການປະຕິບັດວຽກງານວິຊາສະເພາະຕາມພາລະບົດບາດ ຕິດພັນກັບການປະຕິບັດວຽກງານ 3 ດີໃຫ້ມີຜົນສໍາເລັດດ້ວຍປະສິດທິຜົນສູງກ່ວາເກົ່າ.