ໃນຕອນເຊົ້າ ວັນທີ 02 ກໍລະກົດ 2024 ນີ້, ຄະນະກວດກາພັກ-ອົງການກວດກາລັດ ເມືອງສະໜາມໄຊ ແຂວງ ອັດຕະປື ໄດ້ຈັດ ພິທີເປີດຂະບວນການແຂ່ງຂັນຮັກຊາດ ແລະ ພັດທະນາ ຂອງຄະນະກວດກາຂຶ້ນ ທີ່ຫ້ອງປະຊຸມ ຄະນະໂຄສະນາອົບຮົມ, ໂດຍການເປັນປະທານກອງປະຊຸມຂອງ ທ່ານ ຄຳໝັ້ນ ພົມມະແສງ ຮອງເລຂາພັກເມືອງ, ປະທານ ຄະນະກວດກາພັກ-ອົງການກວດກາລັດເມືອງ, ໂດຍມີຜູ້ຕາງໜ້າບັນດາຫ້ອງການອ້ອມຂ້າງເມືອງ ແລະ ພະນັກງານລັດຖະກອນ ພາຍໃນຫ້ອງການ ດັ່ງກ່າວເຂົ້າຮ່ວມ.

ການຈັດພິທີເປີດຂະບວນການຂໍ້ແຂ່ງຂັນຮັກຊາດ ແລະ ພັດທະນາ ແມ່ນເພື່ອປະຕິບັດຕາມ ແຈ້ງການແນະນໍາ ຂອງປະທານຄະນະຊີ້ນໍາການແຂ່ງຂັນ-ຍ້ອງຍໍ, ຮັກຊາດ ແລະ ພັດທະນາເມືອງ ສະບັບເລກທີ 786/ຄຊຂມ ລົງວັນທີ 18 ມິຖຸນາ 2024 ແລະ ພ້ອມກັນຈັບມືແຂ່ງຂັນກັນຈັດຕັ້ງປະຕິບັດວຽກງານວິຊາສະເພາະຕາມເນື້ອໃນຂໍ້ແຂ່ງຂັນ 03 ໜ້າທີ່, 12 ຂໍ້ປະຕິບັດ, ທັງເປັນການປຸກລະດົມກຳລັງແຮງຂອງພະນັກງານ-ລັດຖະກອນພາຍໃນຫ້ອງການຂອງຕົນ ໃຫ້ເຊີດຊູນ້ຳໃຈຮັກຊາດ, ເອກະພາບ, ເປັນເຈົ້າຕົນເອງ, ເສີມຂະຫຍາຍຄວາມດຸໝັ່ນ, ປະຢັດ, ຊື່ສັດ, ອົດທົນ, ປະດິດສ້າງ ແລະ ແຂ່ງຂັນປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ, ສູ້ຊົນປະຕິບັດບັນດາຄາດໝາຍມະຕິກອງປະ ຊຸມໃຫຍ່ຄັ້ງທີ I ຂອງໜ່ວຍພັກຕົນ, ແຜນການພັດທະນາວຽກງານກວດກາ ໄລຍະ 5 ປີ ຂອງຄະນະກວດກາພັກ-ອົງການກວດກາລັດເມືອງ ໃຫ້ປະກົດຜົນເປັນຈິງ, ເພື່ອເປັນບ່ອນອີງໃນການຄັດເລືອກຜົນງານບຸກຄົນ ແລະ ການຈັດຕັ້ງປະຈຳປີ 5 ປີ ເພື່ອນຳສະເໜີຂັ້ນເທິງພິຈາລະນາຍ້ອງຍໍ-ຊົມເຊີຍ. ໃນພິທີ ທ່ານ ໄກສິດ ສີລາເພັດ ຮອງປະທານ ຄະນະກວດກາພັກ-ອົງການກວດກາລັດເມືອງ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນໍາການແຂ່ງຂັນ-ຍ້ອງຍໍ ຮັກຊາດ ແລະພັດທະນາ, ຂໍ້ຕົກລົງ ວ່າດ້ວຍການຮັບຮອງເອົາເນື້ອໃນຂໍ້ແຂ່ງຂັນຮັກຊາດ ແລະ ພັດທະນາ, ແຜນການແຂ່ງຂັນຮັກຊາດ ແລະ ພັດທະນາ ໃນໄລະຍະ 5 ປີ ແຕ່ປີ 2021-2025 ຂອງຄະນະກວດກາພັກ-ອົງການກວດກາລັດເມືອງ, ພ້ອມດຽວກັນນີ້ ໃນພິທີດັ່ງກ່າວ ຄະນະປະທານ, ຫົວໜ້າໜ່ວຍງານ ພ້ອມດ້ວຍພະນັກງານວິຊາການ ໄດ້ຂຶ້ນຈັບມື ແລະ ລົງທະບຽນການແຂ່ງຂັນກັນພາຍໃນການຈັດຕັ້ງຂອງຕົນອີກດ້ວຍ.