​ໃນວັນທີ 03 ກໍລະກົດ 2024, ທີ່ສະໂມສອນຄະນະກວດກາສູນກາງພັກ ກົມກວດກາພັກ ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດພິທີມອບຮັບໜ້າທີ່ຫົວໜ້າກົມກວດກາພັກ ຜູ້ເກົ່າ ແລະ ຜູ້ໃໝ່ຂຶ້ນ ສະຫວ່າງສະຫາຍ ຄູນແກ້ວ ສີອຸ່ນໄທ ກໍາມະການພັກ ຄະນະກວດກາສູນກາງພັກ, ເລຂາໜ່ວຍພັກ, ຫົວໜ້າກົມກວດກາພັກ (ຜູ້ເກົ່າ) ແລະ ສະຫາຍ ອ໋ອດສຸລິເດດ ໄຊສີທອນ ຮອງເລຂາໜ່ວຍພັກ, ຫົວໜ້າກົມກວດກາພັກ (ຜູ້ໃໝ່), ໂດຍໃຫ້ກຽດເຂົ້າຮ່ວມຂອງສະຫາຍ ວັນໄຊ ຊົງຊາຢູ ກໍາມະການພັກ ຄະນະກວດກາສູນກາງພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີຜູ້ຕາງໜ້າຈາກຫ້ອງການ, ກົມຈັດຕັ້ງ-ພະນັກງານ, ຄະນະກົມ, ຄະນະພະແນກ, ສະມາຊິກພັກ, ພະນັກງານ-ລັດຖະກອນ ພາຍໃນກົມກວດກາພັກເຂົ້າຮ່ວມ.

​ໃນພິທີ ສະຫາຍ ຄູນແກ້ວ ສີອຸ່ນໄທ ຫົວໜ້າກົມກວດກາພັກ (ຜູ້ເກົ່າ) ໄດ້ຂຶ້ນລາຍງານການເຄື່ອນໄຫວນໍາພາ-ຊີ້ນໍາການຈັດຕັ້ງປະຕິບັດວຽກງານໃນໄລຍະຜ່ານມາ ເຫັນວ່າສາມາດຍາດໄດ້ຜົນສໍາເລັດໃນຫຼາຍດ້ານ ພ້ອມນີ້ສະຫາຍຍັງໄດ້ສະແດງຄວາມເປັນຫ່ວງເປັນໃຍມາຍັງສະຫາຍຫົວໜ້າກົມຜູ້ໃໝ່ ກໍຄືຄະນະກົມ, ຄະນະພະແນກ ເປັນຕົ້ນ ໃຫ້ພ້ອມກັນເອົາໃຈໃສ່ນໍາພາສຶກສາອົບຮົມການເມືອງແນວຄິດ ໃຫ້ບັນດາສະມາຊິກພັກ, ພະນັກງານ-ລັດຖະກອນພາຍໃນກົມ ຕິດພັນກັບການເພີ່ມທະວີການນໍາພາ-ຊີ້ນໍາຄົ້ນຄວ້າ, ເຊື່ອມຊຶມ ບັນດາມະຕິ, ຄໍາສັ່ງ, ກົດລະບຽບຂອງພັກ, ກົດ ໝາຍ ແລະ ລະບຽບການຕ່າງໆຂອງລັດວາງອອກ ໂດຍສະເພາະແມ່ນນິຕິກໍາກ່ຽວກັບວຽກງານກວດກາ; ຍຶດໝັ້ນຄວາມສາມັກຄີເປັນໝູ່ຄະນະ ປະຕິບັດລະບອບແບບແຜນນໍາພາ ແລະ ວິທີເຮັດວຽກ ຕາມຫຼັກການລວມສູນປະຊາທິປະໄຕ; ນໍາພາ-ຊີ້ນໍາການກໍ່ສ້າງໜ່ວຍພັກ ໃຫ້ເປັນໜ່ວຍພັກປອດໃສ ເຂັ້ມແຂງໜັກແໜ້ນ, ຂະຫຍາຍພັກໃຫ້ໄດ້ທັງປະລິມານ ແລະ ຄຸນນະພາບ; ນໍາພາຊຸກຍູ້ອົງການຈັດຕັ້ງມະຫາຊົນທີ່ຂຶ້ນກັບຄວາມຮັບຜິດຊອບຂອງໜ່ວຍພັກໃຫ້ເປັນປົກກະຕິ; ສືບຕໍ່ຊີ້ນໍາການຈັດຕັ້ງປະຕິບັດໜ້າທີ່ວິຊາສະເພາະໃນແຕ່ລະໄລຍະໃຫ້ບັນລຸຕາມລະດັບຄາດໝາຍ ແລະ ມີປະສິດທິຜົນສູງ. ຈາກນັ້ນ ໄດ້ມີພິທີເຊັນບົດບັນທຶກມອບ-ຮັບໜ້າທີ່ຫົວໜ້າກົມກວດກາພັກ (ຜູ້ເກົ່າ) ແລະ (ຜູ້ໃໝ່) ໂດຍພາຍໃຕ້ການເປັນສັກຂີພິຍານຂອງຄະນະພັກ, ຄະນະນໍາ ຕະຫຼອດຮອດສະມາຊິກພັກ, ພະນັກງານ ພາຍໃນກົມກວດກາພັກ ແລະ ແຂກຖືກເຊີນ. ພ້ອມນີ້ ສະຫາຍ ນາງ ດວງປີ ຈັນທະລັງສີ ຫົວໜ້າພະແນກ ຕາງໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງວ່າດ້ວຍການປະຕິບັດນະໂຍບາຍພາຍໃນໃຫ້ແກ່ພະນັກງານອອກພັກການຮັບອຸດໜູນບໍານານ ເຊິ່ງໃຫ້ກຽດມອບໂດຍ ສະຫາຍ ວັນໄຊ ຊົງຊາຢູ.