ພະນັກງານຂົງເຂດວຽກງານກວດກາ ຢູ່ສູນກາງ ແລະ ທ້ອງຖິ່ນສໍາເລັດຝຶກອົບຮົມຫົວຂໍ້ສະເພາະ ກ່ຽວກັບວຽກງານກວດກາ ຢູ່ນະຄອນຄຸນໝິງ ແຂວງຢຸນນານ ສປ ຈີນ
14/06/2024
![ພະນັກງານຂົງເຂດວຽກງານກວດກາ ຢູ່ສູນກາງ ແລະ ທ້ອງຖິ່ນສໍາເລັດຝຶກອົບຮົມຫົວຂໍ້ສະເພາະ ກ່ຽວກັບວຽກງານກວດກາ ຢູ່ນະຄອນຄຸນໝິງ ແຂວງຢຸນນານ ສປ ຈີນ](/sia/backend/web/images/download/Content_2024070803075034.jpg)
ເພື່ອຍົກລະດັບຄວາມຮູ້ຄວາມສາມາດໃຫ້ພະນັກງານກວດກາທັງສູນກາງ ແລະ ທ້ອງຖິ່ນ, ໃນລະຫວ່າງວັນທີ 2-7 ມີຖຸນາ 2024 ຄະນະກວດກາສູນກາງພັກ ແລະ ອົງການກວດກາແຫ່ງລັດແຫ່ງ ສປປ ລາວ ໄດ້ສົ່ງພະນັກງານຂົງເຂດວຽກງານກວດກາ ຢູ່ສູນກາງ ແລະ ທ້ອງຖິ່ນ ເຂົ້າຮ່ວມຝຶກອົບຮົມຫົວຂໍ້ສະເພາະ ກ່ຽວກັບວຽກງານກວດກາ ຢູ່ນະຄອນຄຸນໝິງ ແຂວງຢຸນນານ ສປ ຈີນ, ເຊິ່ງມີຜູ້ເຂົ້າຮ່ວມທັງໝົດ 25 ທ່ານ, ຍິງ 04 ທ່ານ, ໃນນີ້ມາຈາກຄະນະກວດກາສູນກາງພັກ ຈຳນວນ 15 ທ່ານ, ຍິງ 3 ທ່ານ, ມາຈາກຄະນະກວດກາແຂວງພາກເໜືອ ແລະ ນະຄອນຫຼວງ ຈໍານວນ 10 ທ່ານ, ຍິງ 1 ທ່ານ.
ຊຸດຝຶກອົບຮົມໃນຄັ້ງນີ້ ຈັດຂຶ້ນເພື່ອຍົກສູງຄວາມຮູ້, ຄວາມສາມາດ, ແລະ ເປັນການສ້າງຄວາມເຂົ້າໃຈ, ຄວາມຮັບຮູ້ອັນໃໝ່ ຕໍ່ກັບບົດຮຽນວຽກງານກວດກາ ຂອງ ສປ ຈີນ ທີ່ໄດ້ຈັດຕັ້ງປະຕິບັດມີຜົນສໍາເລັດສູງ ໃນໄລຍະຜ່ານມາ, ແນ່ໃສ່ເຮັດໃຫ້ພະນັກງານຜູ້ທີ່ເຮັດວຽກງານກວດກາ ກໍາໄດ້ເນື້ອໃນ ທາງດ້ານທິດສະດີ ແລະ ພຶດຕິກໍາຕົວຈິງ ຂອງວຽກງານກວດກາພັກຄອມມູນິດຈີນ ເພື່ອນໍາໄປໝູນໃຊ້ເຂົ້າໃນວຽກງານຈິງ ຢູ່ ສປປ ລາວ ໃຫ້ມີປະສິດທິພາບ ແລະ ປະສິດທິຜົນ ສູງຂຶ້ນກວ່າເກົ່າ. ການຝຶກອົບຮົມໃນຄັ້ງນີ້ ປະກອບມີ 4 ຫຼັກສູດຫົວຂໍ້ສະເພາະ, ມີ 7 ຫຼັກສູດພາກສະໜາມ ແລະ ມີ 3 ຫຼັກສູດສໍາຜັດ, ສໍາລັບຫຼັກສູດສະເພາະປະກອບມີຄື: ຂໍ້ສະເໜີ ແລະ ປະສົບການຂອງພັກກອມມູນິດຈີນ ກ່ຽວກັບການຄຸ້ມຄອງພັກຢ່າງຮອບດ້ານ ແລະ ເຂັ້ມງວດ ແລະ ການປະຕິບັດຕົວຈິງຂອງແຂວງຢຸນນານ; ກໍ່ຄືການປະຕິບັດຕົວຈິງຂອງ ສປ ຈີນ ໃນການຫຼຸດຜ່ອນຄວາມທຸກຍາກຂອງມະນຸດ; ບົດຮຽນ ແລະ ວິທີການລຶບລ້າງຄວາມທຸກຍາກ ຢ່າງຖືກເປົ້າຫມາຍຂອງຈີນ; ບົດຮຽນ ແລະ ຄວາມຮັບຮູ້ຂອງການຄຸ້ມຄອງພັກຢ່າງເຂັ້ມງວດຮອບດ້ານ ໃນສະພາບການຫັນເປັນທັນສະໄໝ ຂອງການປົກຄອງແຫ່ງຊາດ; ປະສົບການ ແລະ ມາດຕະການຂອງການກວດກາພັກ-ລັດ ແລະ ລາດຕະເວນກວດກາ ສປ ຈີນ. ຫຼັກສູດພາກສະໜາມປະກອບມີຄື: ທັດສະນະສຶກສາຫ້ອງທົດລອງການພັດທະນາ ແລະ ການນໍາໃຊ້ພະລັງງານທົດແທນຈີນ-ລາວ; ທັດສະນະສຶກສາສູນປະມູນ ແລະ ການຄ້າດອກໄມ້ສາກົນຄຸນໝິງ; ທັດສະນະສຶກສາຕະຫຼາດຄ້າຂາຍດອກໄມ້ ໂດນັນ ຂອງນະຄອນຄຸນໝິງ; ທັດສະນະສຶກສາ ກຸ່ມບໍລິສັດລົງທຶນໂຮນດິງຮຸ້ນສ່ວນການລົງທຶນກໍ່ສ້າງແຂວງຢຸນນານ; ທັດສະນະສຶກສາ ຫໍພິພິທະພັນສະຖານທີ່ເກົ່າແກ່ ຂອງມະຫາວິທະຍາໄລປະສົມພາກຕາເວັນຕົກສຽງໃຕ້ແຫ່ງຊາດ; ຢ້ຽມຢາມຕາແສງເມັງຮ້ານ ນະຄອນຊຽງຮຸ່ງ; ທັດສະນະສຶກສາ ດ່ານບໍຫານ. ຫຼັກສູດສໍາຜັດມີ 3 ຈຸດຄື: ສໍາຜັດສູນການຄ້າວ້ານຊ້າງເສີງຄຸນໝິງ; ເຂົ້າຮ່ວມງານລາຕີ ແລະ ສໍາຜັດກັບວັດທະນະທໍາຊາຕາມ "ໜຶ່ງແລວໜຶ່ງເສັ້ນທາງ"; ທັດສະນະສຶກສາ ເກົ້າຈອມສິບສອງຊຽງໃນນະຄອນຊຽງຮຸ່ງ.
ຜ່ານການຝຶກອົບຮົມຫົວຂໍ້ສະເພາະ ກ່ຽວກັບວຽກງານກວດກາໃນຄັ້ງນີ້ ນັກສໍາມະນກອນ ໄດ້ມີຄວາມຮັບຮູ້ ແລະ ເຂົ້າໃຈ ຕໍ່ກັບບັນດາເນື້ອໃນບົດຮຽນ ທີ່ ສປ ຈີນ ໄດ້ຖ່າຍທອດໃຫ້ ແລະ ຮັບຮູ້ໄດ້ເຖິງລັກສະນະທີ່ພົ້ນເດັ່ນທີ່ສຸດໃນການປົກຄອງປະເທດ ແລະ ບໍລິຫານການເມືອງ ຂອງທ່ານ ເລຂາທິການໃຫຍ່ ສີຈີິ້ນຜິງ ແມ່ນຖືເອົາການຄຸ້ມຄອງພັກຮອບດ້ານ ແລະ ເຂັ້ມງວດເປັນສໍາຄັນ; ຮັບຮູ້ໄດ້ປະຫວັດສາດການລືບລ້າງຄວາມທຸກຍາກຂອງຈີນ ແລະ ບົດຮຽນພື້ນຖານໃນການລືບລ້າງຄວາມທຸກຍາກຂອງຈີນ. ເຊິ່ງໃນປີ 1949 ວຽກງານຫຼຸດຜ່ອນຄວາມທຸກຍາກ ຂອງຈີນໄດ້ພັດທະນາໄປຄຽງຄູ່ກັບການພັດທະນາເສດຖະກິດ-ສັງຄົມ; ຮັບຮູ້ເຂົ້້າໃຈຕໍ່ລະບົບການປົກຄອງແຫ່ງຊາດ ແລະ ຄວາມສາມາດໃນການປະຕິບັດລະບອບຂອງປະເທດ. ກໍ່ຄືພັກກອມມູນິດຈີນ ໄດ້ເອົາໃຈໃສ່ເຖິງການຫັນເປັນທັນສະໄໝ ຂອງການປົກຄອງປະເທດຊາດ ແລະ ບົດຮຽນອື່ນໆ ຈາກການສິດສອນຂອງຄູ-ອາຈານທີ່ມີປະສົບການມາຈາກຄະນະກວດກາພັກ-ລັດແຂວງຢຸນນານ, ມະຫາວິທະຍາໄລສ້າງຄູຢຸນນານ ເຊິ່ງແຕ່ລະທ່ານລ້ວນແຕ່ມີຄວາມຮູ້ຄວາມສາມາດ ແລະ ປະສົບການທາງດ້ານການສິດສອນມາກ່ອນ, ພ້ອມນີ້ນັກສໍາມະນາກອນແມ່ນໄດ້ເອົາໃຈໃສ່ສຸມສະຕິປັນຍາເຂົ້າໃນການຄົ້ນຄວ້າບົດຮຽນ ຍາດແຍ່ງເອົາບົດຮຽນຈາກຄູອາຈານ ທີ່ມີປະສົບການດ້ວຍການສົນທະນາ, ຕັ້ງຄໍາຖາມ ເພື່ອນໍາເອົາບົດຮຽນທີ່ດີມານໍາໃຊ້ເຂົ້້າໃນການຈັດຕັ້ງປະຕິບັດວຽກງານຕົວຈິງຂອງຕົນ, ໂດຍສະເພາະການຈັດຕັ້ງປະຕິບັດເຂົ້້າໃນວຽກງານກວດກາ ຂອງ ສປປ ລາວ ຢູ່ສູນກາງ ແລະ ທ້ອງຖິ່ນໃຫ້ມີປະສິດທິຜົນສູງຂຶ້ນກ່ວາເກົ່າ.
ຂ່າວໂດຍ, ຕູ່ນາ ເລົ່າຖາວອນ.