ໃນວັນທີ 07 ມິຖຸນາ 2024 ນີ້, ກະຊວງພາຍໃນ ໄດ້ຈັດກອງປະຊຸມຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາ ທົ່ວປະເທດ ປະຈໍາປີ 2023 ແລະ ສະຫຼຸບວຽກງານກວດກາ ປະຈໍາປີ 2023 ຂຶ້ນ, ໂດຍການເປັນປະທານ ຂອງສະຫາຍ ສະຫາຍ ປອ. ວິໄລວົງ ບຸດດາຄໍາ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພາຍໃນ, ມີສະຫາຍ ນາງ ທອງຈັນ ແກ້ວແສນຫອມ ຄະນະປະຈໍາພັກກະຊວງ, ປະທານຄະນະກວດກາພັກ ກະຊວງພາຍໃນ, ພ້ອມດ້ວຍຄະນະປະຈໍາພັກ, ຄະນະບໍລິຫານງານພັກກະຊວງ, ເລຂາໜ່ວຍພັກ, ຜູ້ຕາງໜ້າຈາກຄະນະກວດກາສູນກາງພັກ, ຫົວໜ້າ-ຮອງຫົວໜ້າຫ້ອງການ, ບັນດາກົມ, ສະຖາບັນ, ສູນ ແລະ ຜູ້ຮັບຜິດຊອບວຽກງານກວດກາຂອງບັນດາໜ່ວຍພັກ, ຫ້ອງການ, ບັນດາກົມ, ສະຖາບັນ, ສູນ ແລະ ພະນັກງານກວດກາ ຂອງກະຊວງພາຍໃນເຂົ້າຮ່ວມຢ່າງພ້ອມພຽງ.

ໃນກອງປະຊຸມ ສະຫາຍ ວິໄລວົງ ບຸດດາຄໍາ ໄດ້ໃຫ້ກຽດກ່າວເປີດພິທີ ພ້ອມທັງເຜີຍແຜ່ເອກະສານຄໍາສັ່ງແນະນໍາຂອງຄະນະເລຂາທິການສູນການພັກ ກ່ຽວກັບການເພີ່ມທະວີການນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ ສະບັບເລກທີ 169/ຄລສພ, ລົງວັນທີ 15 ສິງຫາ 2022; ຈາກນັ້ນ, ສະຫາຍ ນາງ ທອງຈັນ ແກ້ວແສນຫອມ ໄດ້ເຜີຍແຜ່ຄໍາແນະນໍາ ຂອງອົງການກວດກາແຫ່ງລັດ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການກວດກາລັດ (ສະບັບປັບປຸງ) ສະບັບເລກທີ 331/ອກຫລ, ລົງວັນທີ 03 ຕຸລາ 2023; ຄໍາແນະນໍາ ຂອງຄະນະກວດກາສູນກາງພັກ ກ່ຽວກັບການປັບປຸງການຈັດຕັ້ງຄະນະກວດກາພັກ ແລະ ອົງການກວດກາລັດແຕ່ລະຂັ້ນ ສະບັບເລກທີ 379/ຄກສພ, ລົງວັນທີ 07 ພະຈິກ 2023; ພ້ອມນີ້ ສະຫາຍ ຕ໋ອງ ພູມມີພັນ ຄະນະພັກກະຊວງ, ຮອງປະທານຄະນະກວດກາ, ຫົວໜ້າກົມກວດກາ ໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາ ປະຈໍາປີ 2023 ແລະ ທິດທາງແຜນການ ປີ 2024 ຂອງຄະນະກວດກາສູນກາງພັກ ສະບັບເລກທີ 147/ຄກສພ, ລົງວັນທີ 14 ມີນາ 2024; ຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາ ປະຈໍາປີ 2023 ແລະ ທິດທາງແຜນການ ປີ 2024 ຂອງຄະນະກວດກາພັກ ກະຊວງພາຍໃນ ສະບັບເລກທີ 01/ຄກພນ, ລົງວັນທີ 04 ມັງກອນ 2024 ເຊິ່ງໄດ້ຍົກໃຫ້ເຫັນຜົນງານດ້ານດີໃນການເຄື່ອນໄຫວວຽກງານກວດກາພັກ, ກວດກາລັດ, ສະກັດກັ້ນ-ຕ້ານການສໍ້ລາດບັງຫຼວງ, ການແກ້ໄຂຄໍາຮ້ອງ-ຄໍາສະເໜີຂອງພົນລະເມືອງ ແລະ ວຽກງານປິ່ນອ້ອມ ໃນໄລຍະຜ່ານມາ, ດ້ານອ່ອນ-ຂໍ້ຄົງຄ້າງ, ບາງບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ. ພ້ອມດຽວກັນນີ້ ຜູ້ແທນກອງປະຊຸມໄດ້ພ້ອມກັນປະກອບຄໍາຄິດເຫັນໃສ່ບົດສະຫຼຸບ ຢ່າງກົງໄປກົງມາ, ພາວະວິໄສ ຕິດພັນກັບການປະຕິບັດວຽກງານໃນຕົວຈິງ ເພື່ອເຮັດໃຫ້ບົດສະຫຼຸບມີເນື້ອໃນຄົບຖ້ວນ, ຈະແຈ້ງ ແລະ ມີຄວາມເປັນເອກະພາບໃນການຈັດຕັ້ງປະຕິບັດ.