05/06/2024
![ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວເຄື່ອນໄຫວຊຸກຍູ້ການກໍ່ສ້າງພະນັກງານນໍາພາ-ຄຸ້ມຄອງເພດຍິງ ຢູ່ຄະນະກວດກາສູນກາງພັກ ແລະ ອົງການກວດກາແຫ່ງລັດ](/sia/backend/web/images/download/Content_2024060504064625.jpg)
ໃນວັນທີ 31 ພຶດສະພາ 2024 ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ລົງເຄື່ອນໄຫວຊຸກຍູ້ການກໍ່ສ້າງພະນັກງານນໍາພາ-ຄຸ້ມຄອງເພດຍິງຢູ່ຄະນະກວດກາສູນກາງພັກ ແລະ ອົງການກວດກາແຫ່ງລັດ ນໍາໂດຍ ສະຫາຍ ນາງ ສິລິກິດ ບຸບຜາ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມດ້ວຍຄະນະ, ໃຫ້ກຽດຕ້ອນຮັບໂດຍສະຫາຍ ນາງ ບຸນອ້ອມ ອຸ່ນມະໂນ ຮອງຫົວໜ້າ ກົມຄົ້ນຄວ້າ ແລະ ວາລະສານກວດກາ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານ ສະຫະພັນແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດ ພ້ອມດ້ວຍຄະນະ ໂດຍການໃຫ້ກຽດເຂົ້າຮ່ວມຂອງສະຫາຍ ສຸກຄໍາເພັດ ເຮືອງບຸດສີ ກໍາມະການປະຈໍາພັກ ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ, ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ ພ້ອມດ້ວຍຄະນະກົມຕັ້ງພັກ-ພະນັກງານ ຄະນະກວດກາສູນກາງພັກເຂົ້າຮ່ວມ.
ໂອກາດທີ່ໄດ້ລົງເຄື່ອນໄຫວຊຸກຍູ້ວຽກງານຄັ້ງນີ້ ສະຫາຍ ນາງ ສິລິກິດ ບຸບຜາ ພ້ອມດ້ວຍຄະນະ ໄດ້ພົບປະ ແລະ ເຮັດວຽກຮ່ວມກັບ ສະຫາຍ ສຸກຄຳເພັດ ເຮືອງບຸດສີ ກຳມະການປະຈຳພັກ, ຮອງປະທານ ຄກສພ-ອກຫລ, ຜູ້ຊີ້ນຳວຽກງານອົງການຈັດຕັ້ງມະຫາຊົນ ແລະ ສະຫາຍ ຄໍາສຸກ ອອຍຍະວົງ ກໍາມະການພັກ ຄະນະກວດກາສູນກາງພັກ, ຫົວໜ້າກົມຈັດຕັ້ງພັກ-ພະນັກງານ, ເຊິ່ງສະຫາຍໄດ້ສະເໜີຈຸດປະສົງຕໍ່ຄະນະພັກ-ຄະນະນໍາ ຄະນະກວດກາສູນກາງພັກ ກ່ຽວກັບການເຄື່ອນໄຫວວຽກງານໃນຄັ້ງນີ້ ແລະ ແລກປ່ຽນປຶກສາຫາລືກ່ຽວກັບ ແຜນກໍານົດພະນັກງານນໍາພາຄຸ້ມຄອງຂັ້ນສູນກາງຄຸ້ມຄອງ ແລະ ຂັ້ນກະຊວງ-ອົງການຄຸ້ມຄອງ; ການບໍາລຸງສ້າງ ແລະ ບັນຈຸ, ສັບຊ້ອນພະນັກງານນໍາ-ຄຸ້ມຄອງ ເພດຍິງ ຢູ່ຄະນະກວດກາສູນກາງພັກ ແລະ ອົງການກວດກາແຫ່ງລັດ ໃນໄລຍະຜ່ານມາ ແລະ ແຜນການໃນຕໍ່ໜ້າ; ແຜນຄາດຄະເນເປົ້າໝາຍຄະນະປະທານສະຫະພັນແມ່ຍິງຂອງອົງການຊຸດໃໝ່.
ຫຼັງຈາກນັ້ນ ກໍໄດ້ປຶກສາຫາລືຮ່ວມກັນລະຫວ່າງສູນກາງສະຫະພັນແມ່ຍິງລາວ ກັບຄະນະສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ ກ່ຽວກັບ ແຜນກໍານົດພະນັກງານນໍາພາຄຸ້ມຄອງຂັ້ນສູນກາງຄຸ້ມຄອງ ແລະ ຂັ້ນກະຊວງ-ອົງການຄຸ້ມຄອງ; ການບໍາລຸງສ້າງ ແລະ ບັນຈຸ, ສັບຊ້ອນພະນັກງານນໍາ-ຄຸ້ມຄອງ ເພດຍິງ ຂອງພາກສ່ວນຕົນ ໃນໄລຍະຜ່ານມາ ແລະ ແຜນການໃນຕໍ່ໜ້າ; ແຜນຄາດຄະເນເປົ້າໝາຍຄະນະປະທານສະຫະພັນແມ່ຍິງຂອງອົງການຊຸດໃໝ່. ໂອກາດນີ້ ສະຫາຍ ນາງ ບຸນອ້ອມ ອຸ່ນມະໂນ ກໍໄດ້ລາຍງານການເຄື່ອນໄຫວວຽກງານ ຮອບດ້ານຂອງສະຫະພັນແມ່ຍິງ ຄະນະກວດກາສູນກາງພັກ ແລະ ອົງການກວດກາແຫ່ງລັດ ເຊິ່ງສະຫາຍໃຫ້ຮູ້ວ່ານັບແຕ່ປີ 2020-2024 ມີສະມາຊິກແມ່ຍິງທັງໝົດ 104 ສະຫາຍ, ແບ່ງອອກເປັນ 10 ໜ່ວຍ, ໄດ້ຕັ້ງຫນ້າປັບປຸງກົງຈັກການຈັດຕັ້ງຂອງຕົນ ໃຫ້ມີຄວາມໜັກແໜ້ນເຂັ້ມແຂງ ເປັນລະບົບ ມີການປ່ຽນແປງດີຂຶ້ນເທື່ອລະກ້າວ, ເຮັດໃຫ້ການຈັດຕັ້ງເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ. ຄະນະສະຫະພັນແມ່ຍິງຄະນະກວດກາສູນກາງພັກ ປະກອບມີ 5 ທ່ານ, ໃນນີ້: ປະທານ 1 ທ່ານ ຊີ້ນໍາລວມ, ຮອງປະທານ 2 ທ່ານ, 1 ທ່ານ ຊີ້ນໍາວຽກງານກວດກາ, 1 ທ່ານ ຊີ້ນໍາວຽກງານ 3 ດີ, ຄະນະ 2 ທ່ານ, 1 ທ່ານ ຊີ້ນໍາວຽກງານເສດຖະກິດ ແລະ 1 ທ່ານ ຊີ້ນຳວຽກງານສະຖິຕິຂອງແມ່ຍິງ; ມີຜູ້ຊ່ວຍວຽກງານກວດກາ 13 ທ່ານ ແລະ ຜູ້ຊ່ວຍວຽກງານ 3 ດີ 13 ທ່ານ. ຄະນະພັກໄດ້ເອົາໃຈໃສ່ ແລະ ເຫັນໄດ້ເຖິງຄວາມສຳຄັນ ຂອງການປະກອບສ່ວນວຽກງານຂອງພະນັກງານເພດຍິງ, ເອື້ອຍນ້ອງແມ່ຍິງຫຼາຍສະຫາຍໄດ້ຮັບການສະຫນັບສະຫນູນ ແລະ ສົ່ງເສີມທາງດ້ານການພັດທະນາຄວາມຮູ້ຄວາມສາມາດເປັນຕົ້ນແມ່ນໄດ້ຍົກລະດັບດ້ານວິຊາສະເພາະ ໄລຍະຍາວຢູ່ພາຍໃນ ແລະ ຕ່າງປະເທດ ທັງໝົດ 5 ຄົນ, ໃນນີ້, ປະລິນຍາໂທພາຍໃນປະເທດ 2 ຄົນ, ຢູ່ຕ່າງປະເທດປະລິນຍາໂທ 3 ຄົນ, ດ້ານທິດສະດີການເມືອງ-ການປົກຄອງ: ໄດ້ຮຽນເອກະສານສະໜັບສະໜູນໃຫ້ມະຫາຊົນກ້າວໜ້າ 23 ສະຫາຍ, ຮຽນກົດລະບຽບ 28 ສະຫາຍ, ຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກພັກສໍາຮອງ 25 ສະຫາຍ ແລະ ເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນ 29 ສະຫາຍ; ໄດ້ຍົກຍ້າຍສະມາຊິກພັກໄປຮ່ວມຊີວິດຢູ່ອົງຄະນະພັກໃໝ່ 8 ສະຫາຍ; ຍົກລະດັບຄວາມຮູ້ຄວາມສາມາດໃຫ້ສະມາຊິກພັກ ດ້ານທິດສະດີການເມືອງ ແລະ ການປົກຄອງ ຂັ້ນຕ່າງໆ ຢູ່ພາຍໃນ ແລະ ຕ່າງປະເທດ 21 ສະຫາຍ; ຈັດຝືກອົບຮົມໄລຍະສັ້ນ ແລະ ສໍາເລັດການທຽບລະດັບທິດສະດີການເມືອງຂັ້ນສູງ 1 ສະຫາຍ; ຂັ້ນຕົ້ນ 20 ສະຫາຍ; ເອື້ອຍນ້ອງແມ່ຍິງ ໄດ້ຮັບຄວາມເຊື່ອຫມັ້ນ, ຄວາມໄວ້ເນື້ອເຊື່ອໃຈຈາກຄະນະພັກ-ຄະນະນໍາ, ການຈັດຕັ້ງທຸກຂັ້ນ ເຊິ່ງໄດ້ຮັບການແຕ່ງຕັ້ງບັນຈຸຊັບຊ້ອນ ໃຫ້ຮັບຜິດຊອບຫນ້າທີ່ສຳຄັນຫລາຍຕຳແໜ່ງເຊັ່ນ: ຮອງເລຂາຫນ່ວຍພັກ 2 ສະຫາຍ, ຄະນະຫນ່ວຍພັກ 3 ສະຫາຍ, ຮອງຫົວຫນ້າກົມ 6 ສະຫາຍ, ຫົວຫນ້າພະແນກ 8 ສະຫາຍ ແລະ ຮອງຫົວຫນ້າພະແນກ 29 ສະຫາຍ.
ຕອນທ້າຍຂອງກອງປະຊຸມສະຫາຍ ນາງ ສິລິກິດ ບຸບຜາ ກໍໄດ້ມີຄຳເຫັນຊີ້ນຳຕໍ່ຄະນະສະຫະພັນແມ່ຍິງໃຫ້ເອົາໃຈຊຸກຍູ້ກໍ່ສ້າງເອື້ອຍນ້ອງຍິງໃຫ້ກາຍເປັນພະນັກງານນຳພາ-ຄຸ້ມຄອງຢູ່ແຖວໜ້າ ແລະ ມີບົດບາດສູງຂຶ້ນກວ່າເກົ່າ, ເອົາໃຈໃສ່ຊີ້ນຳ ແລະ ກະກຽມການຈັດກອງປະຊຸມໃຫຍ່ຂັ້ນຂອງຕົນ, ເລືອກເຟັ້ນເອົາຜູ້ທີ່ມີຄວາມຮູ້ຄວາມສາມາດ, ປະສົບການ, ມີແນວຄິດອຸ່ນອ່ຽງທຸ່ນທຽງ, ມີຄວາມຮັບຜິດຊອບສູງຕໍ່ໜ້າທີ່ວຽກງານ, ກ້າເຮັດກ້າຮັບຜິດຊອບ, ພ້ອມນີ້ກໍ່ໃຫ້ກະກຽມຄວາມພ້ອມດ້ານຕ່າງໆໃນການຈັດກອງປະຊຸມໃຫຍ່ຂອງຄະນະສະຫະພັນແມ່ຍິງຄະນະກວດກາສູນກາງພັກ ແລະ ອົງການກວດກາແຫ່ງລັດ ດ້ວຍຜົນສຳເລັດສູງ.