ກອງປະຊຸມສະຫຼຸບວຽກງານກວດກາ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງກະຊວງອຸດສາຫະກໍາ ແລະ ການຄ້າ ໄດ້ຈັດຂຶ້ນໃນວັນທີ 28 ພຶດສະພາ 2024 ນີ້, ທີ່ຫ້ອງປະຊຸມໃຫຍ່ ຊັ້ນ I ຂອງກະຊວງອຸດສາຫະກໍາ ແລະ ການຄ້າ ໂດຍການເປັນປະທານຂອງ ສະຫາຍ ພຸດທະວັນ ນັນທະວົງ ຄະນະປະຈໍາພັກ, ປະທານຄະນະກວດກາພັກກະຊວງ, ຫົວໜ້າກົມກວດກາ, ມີສະຫາຍ ຄໍາຜ່ອງ ສິດທິຊົນ ຮອງຫົວໜ້າກົມກວດກາພັກ ຄະນະກວດກາສູນກາງພັກ, ບັນດາສະຫາຍຮອງປະທານກວດກາພັກກະຊວງ, ເລຂາໜ່ວຍພັກຫ້ອງການ-ບັນດາກົມ, ລັດວິສາຫະກິດທີ່ຂຶ້ນກັບກະຊວງ, ຜູ້ກວດກາໜ່ວຍພັກອົງການຈັດຕັ້ງມະຫາຊົນ, ພະນັກງານກວດກາ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ສະຫາຍ ເກີທ່າວ ເຈີເຈັ່ງ ຮອງປະທານຄະນະກວດກາພັກກະຊວງ ໄດ້ຂຶ້ນຜ່ານບົດສະຫຼຸບຫຍໍ້ການເຄື່ອນໄຫວວຽກງານກວດກາ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງກະຊວງອຸດສາຫະກໍາ ແລະ ການຄ້າ ເຫັນວ່າມີຜົນສໍາເລັດໃນຫຼາຍດ້ານ ຄື: ໄດ້ຄົ້ນຄວ້າສ້າງ ແລະ ປັບປຸງນິຕິກໍາກ່ຽວກັບວຽກງານກວດກາພັກ-ກວດກາລັດ ສໍາເລັດທັງໝົດ 5 ຫົວຂໍ້; ໄດ້ສໍາເລັດການດໍາເນີນຊີວິດການເມືອງກາງສະໄໝຄົບຄະນະບໍລິຫານງານພັກກະຊວງ, ຄະນະພັກຮາກຖານ ແລະ ໜ່ວຍພັກຮາກຖານ ຜ່ານການດໍາເນີນຊີວິດການເມືອງພາຍໃນພັກ ເຫັນວ່າສະມາຊິກພັກ-ພະນັກງານສ່ວນຫຼາຍ ຍັງສືບຕໍ່ໃຫ້ຄວາມໄວ້ວາງໃຈຕໍ່ການນໍາພາລວມ ແລະ ຕໍ່ບຸກຄົນໃນຄະນະບໍລິຫານງານພັກກະຊວງ ສະໄໝທີ V ເຊິ່ງໄດ້ຮັບຄະແນນຄວາມໄວ້ວາງໃຈສູງສຸດເຖິງ 100%, ຕໍ່າສຸດແມ່ນ 87,80%, ຄະແນນຄວາມໄວ້ວາງໃຈສະເລ່ຍ 93,9% ແລະ ໄດ້ຮັບຄະແນນບໍ່ໄວ້ວາງໃຈສູງສຸດ 12,19% ແລະ ຕໍ່າສຸດ 1,21% ຂອງຈໍານວນຜູ້ແທນທີ່ເຂົ້າຮ່ວມທັງໝົດ; ທົ່ວອົງຄະນະພັກກະຊວງ ມີສະມາຊິກພັກທັງໝົດ 788 ສະຫາຍ ສາມາດຕີລາຄາຈັດແບ່ງປະເພດສະມາຊິພັກແຂງໄດ້ 702 ສະຫາຍ ຍິງ 259 ສະຫາຍ, ປະເພດກາງ 20 ສະຫາຍ ຍິງ 4 ສະຫາຍ; ສາມາຮຽນສະໜັບສະໜູນໃຫ້ມະຫາຊົນກ້າວໜ້າຈໍານວນ 35 ສະຫາຍ ຍິງ 18 ສະຫາຍ, ຮຽນກົດລະບຽບພັກຈໍານວນ 34 ສະຫາຍ ຍິງ 15 ສະຫາຍ, ເຂົ້າພັກສໍາຮອງ ຈໍານວນ 29 ສະຫາຍ ຍິງ 12 ສະຫາຍ, ເຂົ້າພັກສົມບູນຈໍານວນ 54 ສະຫາຍ ຍິງ 22 ສະຫາຍ ທຽບໃສ່ປີ 2022 ເພິ່ມຂຶ້ນ 29 ສະຫາຍ; ຕິດຕາມ, ຊຸກຍູ້ການຈັດຕັ້ງປະຕິບັດໂຄງການລົງທຶນຂອງລັດຂອງກະຊວງ ໃນປີ 2023 ໄດ້ຮັບງົບປະມານໂຄງການລົງທຶນຂອງລັດຈໍານວນ 3.270 ລ້ານກີບ ໃນ 28 ໂຄງການ ຜ່ານການຈັດຕັ້ງປະຕິບັດເຫັນວ່າ ໂຄງການທີ່ໄດ້ສໍາເລັດການປະກອບເອກະສານຂໍອະນຸມັດການຊໍາລະສະສາງມີ 24 ໂຄງການ, ຍັງ 4 ໂຄງການບໍ່ໄດ້ປະກອບເອກະສານສະເໜີຂໍການຊໍາລະສະສາງ ເນື່ອງຈາກໄດ້ຢຸດເຊົາໂຄງການແລ້ວ; ໄດ້ຮັບຄໍາຮ້ອງ-ຄໍາສະເໜີ ຈໍານວນ 5 ສະບັບ ໃນນີ້ຄໍາສະເໜີ 4 ສະບັບ, ບົດສົນເທ 1 ສະບັບ, ແກ້ໄຂແລ້ວ 3 ກໍລະນີ, ຍັງຄ້າງ 2 ກໍລະນີ ເນື້ອໃນແມ່ນພົວພັນເຖິງການປະຕິບັດໜ້າທີ່ຂອງພະນັກງານ, ຂໍ້ຂັດແຍ້ງທາງທຸລະກິດດ້ວຍກັນ. ພ້ອມນີ້ ຍັງໄດ້ຍົກໃຫ້ເຫັນດ້ານດີທີ່ພົ້ນເດັ່ນ, ດ້ານອ່ອນຂໍ້ຄົງຄ້າງ, ສາເຫດທີ່ພາໃຫ້ມີດ້ານດີ-ດ້ານອ່ອນ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ. ຈາກນັ້ນ, ສະຫາຍ ພຸດທະວັນ ນັນທະວົງ ປະທານກອງປະຊຸມຍັງໄດ້ມີຄໍາເຫັນເຈາະຈີ້ມຕໍ່ການປະກອບຄໍາເປັນໃສ່ບົດສະຫຼຸບ ແລະ ໃຫ້ກຽດເຜີຍແຜ່ເອກະສານສໍາຄັນ ເປັນຕົ້ນ ຄໍາສັ່ງແນະນໍາ ເລກທີ 169/ຄລສພ, ລົງວັນທີ 15 ສິງຫາ 2022 ຂອງຄະນະເລຂາທິການສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ; ຄໍາແນະນໍາ ເລກທີ 331/ອກຫລ, ລົງວັນທີ 03 ຕຸລາ 2023 ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການກວດກາລັດ (ສະບັບປັບປຸງ); ບົດແນະນໍາ ເລກທີ 379/ຄກສພ, ລົງວັນທີ 07 ພະຈິກ 2023 ວ່າດ້ວຍການປັບປຸງການຈັດຕັ້ງຄະນະກວດກາພັກ ແລະ ອົງການກວດກາລັດແຕ່ລະຂັ້ນ. ພ້ອມນີ້ບັນດາຜູ້ແທນກອງປະຊຸມຍັງໄດ້ພ້ອມກັນປະກອບຄໍາຄິດເຫັນໃສ່ຮ່າງບົດສະຫຼຸບການເຄື່ອນໄຫວວຽກງານກວດກາ ປະຈໍາປີ 2023 ແລະ ທິດທາງວຽກງານຈຸດສຸມ ປີ 2024 ຢ່າງກົງໄປກົງມາ ເພື່ອເຮັດໃຫ້ມີເນື້ອໃນຈະແຈ້ງຄົບຖ້ວນແທດເໝາະກັບຕົວຈິງ.