ໃນຕອນເຊົ້າຂອງວັນທີ 24 ພຶດສະພາ 2024, ຫ້ອງວ່າການສຳນັກງານປະທານປະເທດ ໄດ້ຈັດກອງປະຊຸມສະຫຼຸບວຽກງານກວດກາປະຈຳປີ 2023 ແລະ ທິດທາງແຜນການ ປະຈຳປີ 2024 ຂຶ້ນ ຢູ່ທີ່ຫ້ອງປະຊຸມໃຫຍ່ຊັ້ນ2 ໂດຍການເປັນປະທານຂອງ ສະຫາຍ ນາງ ເຂັມມະນີ ພົນເສນາ ເລຂາບໍລິຫານງານພັກ ຫສປທ, ຫົວໜ້າຫ້ອງວ່າການສຳນັກງານປະທານປະເທດ, ຕາງໜ້າເຂົ້າຮ້ວມຈາກຄະນະກວດກາສູນກາງພັກໂດຍ ສະຫາຍ ແສງທອງ ຊາພູວົງ ຮອງຫົວໜ້າກົມ ກວດກາພັກ, ພ້ອມດ້ວຍ ສະຫາຍຮອງເລຂາຄະນະພັກ, ບັນດາສະຫາຍຄະນະພັກ, ຄະນະໜ່ວຍພັກ, ຄະນະກົມ ແລະ ພະນັກງານ-ລັດຖະກອນເຂົ້າຮ່ວມ.

ໃນພິທີ ສະຫາຍ ຄຳຕາ ລາດສະວົງ, ກຳມະການຄະນະພັກ ຫົວໜ້າກົມຈັດຕັ້ງ ແລະ ກວດກາ ຫສປທ ໄດ້ລາຍງານໃຫ້ຮູ້ວ່າ: ໃນໄລຍະຜ່ານມາ ຕິດຕາມກວດກາການປະຕິບັດແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຄັ້ງ XI ຂອງພັກ ແລະ ມະຕິກອງປະຊຸມຄົບຄະນະພັກ ຫສປທ ທີ່ວາງອອກໃນແຕ່ລະຄັ້ງ, ເຫັນວ່າ ບັນດາໜ່ວຍພັກ, ບັນດາສະຫາຍສະມາຊິກພັກ, ພະນັກງານ - ລັດຖະກອນ ໄດ້ເອົາໃຈໃສ່ປະຕິບັດຕາມມະຕິ, ຄໍາສັ່ງ ແລະ ນິຕິກໍາ ຕ່າງໆ ທີ່ຂັ້ນເທິງວາງອອກ. ໄດ້ຕິດຕາມ, ກວດກາການປະຕິບັດວິໄນຕໍ່ການຈັດຕັ້ງພັກ, ຄະນະພັກ ແລະ ສະມາຊິກພັກ. ໄລຍະໜຶ່ງປີຜ່ານມາ ມີສະມາຊິກພັກ 01 ສະຫາຍໄດ້ລະເມີດຕໍ່ຂໍ້ຫ້າມກົດລະບຽບພັກ ຜ່ານການພິຈາລະນາຕາມຂັ້ນຕອນລະບຽບການ ຈຶ່ງຕົກລົງລຶບຊື່ຜູ້ກ່ຽວອອກຈາກການເປັນສະມາຊິກພັກ ໃນເດືອນເມສາ 2024. ໄດ້ກວດກາ ໂຄງການລົງທຶນຂອງລັດ ປີ 2023 ໂຄງການທີ່ໄດ້ຈັດຕັ້ງປະຕິບັດທຶນເປົ້າໝາຍສະເພາະ ມີ 3 ໂຄງການ ລວມມູນຄ່າ 113.991.132.000 ກີບ ມີຄື: 1 ໂຄງການສ້ອມແປງໃຫ່ຍອາຄານຫໍຄຳ ຈຳນວນ 108.961.400.000 ກີບ (ອີງຕາມສັນຍາສະບັບເລກທີ 683/ຫສປທ, ລົງວັນທີ 7 ພະຈິກ 2023) ຊໍາລະໃນປີ 2023 ແລ້ວ ຈໍານວນ 32.525.000.000 ກີບ, (ໂຄງການດັ່ງກ່າວກໍາລັງດໍາເນີນການກໍ່ສ້າງຄາດວ່າຈະສໍາເລັດໃນມໍ່ໆນີ້); 2 ຈ້າງທີ່ປຶກສາໂຄງການ ຈໍານວນ 2.554.732.000 ກີບ (ອີງຕາມສັນຍາສະບັບເລກທີ 391/ຫສປທ ລົງວັນທີ 27 ກໍລະກົດ 2023) ຊໍາລະໃນປີ 2023 ຈໍານວນ 1.949.380.000 ກີບ; 3 ຄ່າອອກແບບ ຈໍານວນ 2.475.000.000 ກີບ (ອີງຕາມສັນຍາສະບັບເລກທີ 418/ຫສປທ.ບກ ລົງວັນທີ 14 ສິງຫາ 2023) ຊໍາລະໃນປີ 2023 ຈໍານວນ 2.475.000.000 ກີບ. ຫຼັງຈາກນັ້ນຜູ້ເຂົ້າຮ່ວມກອງປະຊຸມຍັງໄດ້ຜັດປ່ຽນກັນປະກອບຄຳຄິດ-ຄຳເຫັນ ແລກປ່ຽນບາງບັນຫາເພື່ອເຮັດໃຫ້ກອງປະຊຸມມີເນື້ອໃນຄົບຖ້ວນຂຶ້ນຕື່ມ. ນອກຈາກນີ້ຍັງໄດ້ຮັບຟັງການເຜີຍແຜ່ຄຳສັ່ງ, ຄຳແນະນຳກ່ຽວກັບວຽກງານກວດກາຕື່ມອີກ.

ໃນຕອນທ້າຍ ສະຫາຍນາງ ເຂັມມະນີ ພົນເສນາ ໄດ້ມີຄຳເຫັນໂອ້ລົມ ໂດຍໄດ້ເນັ້ນໜັກໃຫ້ພະນັກງານທີ່ເຮັດວຽກງານກວດກາຕ້ອງມີລະດັບຄວາມຮູ້, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍ ຂອງລັດເວົ້າລວມ, ເວົ້າສະເພາະ ຕ້ອງກໍາໃຫ້ໄດ້ພື້ນຖານ ຂອງວຽກງານກວດກາພັກ, ກວດກາລັດ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ບັນດາລະບຽບການດັ່ງກ່າວເພື່ອນໍາໄປໝູນໃຊ້ເຂົ້າໃນການເຄື່ອນໄຫວວຽກງານກວດກາຕົວຈິງໃຫ້ສອດຄ່ອງ ແລະ ມີປະສິດທິຜົນ.