ຕອນບ່າຍວັນທີ 20 ພຶດສະພາ 2024 ຄະນະໜ່ວຍພັກຄະນະກວດກາເມືອງປາກແບງໄດ້ເປີດກອງປະຊຸມໃຫ່ຍຄັ້ງທີ II ຂອງຕົນຂຶ້ນຢ່າງເປັນທາງການ ທີ່ຫ້ອງປະຊຸມຊັ້ນ3 ຕຶກຫ້ອງວ່າການເມືອງປາກແບງ ພາຍໃຕ້ການເປັນປະທານຂອງ ສະຫາຍ ສີວັນ ບຸນປະຈິດ ຮອງເລຂາໜ່ວຍພັກຄະນະກວດກາເມືອງ, ໂດຍໃຫ້ກຽດເຂົ້າຮ່ວມຂອງ ສະຫາຍ ອິນແປງ ປັນຍາທອງ ຮອງເລຂາພັກເມືອງ,ປະທານຄະນະກວດກາພັກ,ປະທານອົງການກວດກາລັດເມືອງ, ມີບັນດາສະຫາຍສະມາຊິກພັກ ແລະແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.

ໃນກອງປະຊຸມ ສະຫາຍ ທອງສາຍ ສີເຮືອງມາ ຮອງຄະນະຈັດຕັ້ງເມືອງ ໄດ້ຜ່ານມະຕິຕົກລົງ ສະບັບເລກທີ41/ຄກພມ,ລົງວັນທີ 17 ພຶດສະພາ 2024 ວ່າດ້ວຍການອະນຸມັດເປີດກອງປະຊຸມໃຫຍ່ໜ່ວຍພັກ ຄະນະກວດກາເມືອງ, ຈາກນັ້ນ; ສະຫາຍ ສີວັນ ບຸນປະຈິດ ຮອງເລຂາໜ່ວຍພັກ ໄດ້ກ່າວເປີດກອງປະຊຸມ ພ້ອມທັງຜ່ານ ຮ່າງບົດລາຍງານການເມືອງ ໃນໄລຍະ 5 ປີ ຜ່ານມາ ແລະ ທິດທາງ ແຜນການແຕ່ປີ2025-2029 ຕິດພັນກັບວຽກງານກວດກາ. ໂດຍຍົກໃຫ້ເຫັນການເຄື່ອນໄຫວນໍາພາ-ຊີ້ນໍາ ຂອງຄະນະໜ່ວຍພັກໄລຍະ 5 ປີຜ່ານມາແມ່ນໄດ້ມີຜົນສໍາເລັດໃນຫຼາຍດ້ານເປັນຕົ້ນສາມາດຮັກສາໄດ້ໜ່ວຍພັກປອດໃສ,ເຂັ້ມແຂງ,ໜັກແໜ້ນ 4 ປີຊ້ອນ,ໄດ້ນໍາພາ-ຊີ້ນຳຕໍ່ວຽກງານຕິດຕາມ, ກວດກາພັກ, ກວດກາລັດ ແລະຕ້ານການສໍ້ລາດບັງຫຼວງເປັນວຽກໜຶ່ງທີ່ສຳຄັນ ແລະຕິດພັນກັບການນຳພາຂອງພັກແຕ່ລະຂັ້ນເປັນຕົນແມ່ນການຕິດຕາມ-ກວດກາການຜັນຂະຫຍາຍ ແລະຈັດຕັ້ງປະຕິບັດແນວທາງ, ມະຕິຄຳສັ່ງ, ກົດລະບຽບຂອງພັກ, ກົດໝາຍ ແລະລະບຽບການຕ່າງໆຂອງລັດວາງອອກ. ຕິດຕາມ-ກວດກາການປະຕິບັດໜ້າທີ່ຂອງຄະນະພັກ, ການເຄື່ອນໄຫວຂອງສະມາຊິກພັກ, ພະນັກງານ-ລັດຖະກອນ ຕິດພັນກັບການດຳເນີນຊີວິດການເມືອງ, ການດຳເນີນກອງປະຊຸມກາງສະໄໝຂອງຄະນະບໍລິຫານງານພັກເມືອງ ແລະກອງປະຊຸມໃຫຍ່ຂອງຄະນະພັກຮາກຖານ, ໜ່ວຍພັກສຳເລັດທົ່ວເມືອງ ການສະເໜີແກ້ໄຂ ຄຳຮ້ອງ, ຄໍາສະເໜີ ແລະຜົນຂອງການກວດກາເຫັນວ່າຖືກຕ້ອງຊອດຄອງ. ຜ່ານການຈັດຕັ້ງປະຕິບັດວຽກງານຕິດຕາມ-ກວດກາສາມາດສະກັດກັ້ນໄດ້ປະກົດການຍໍ້ທໍ້ພາຍໃນການຈັດຕັ້ງພັກ-ລັດ ແລະຖັນແຖວພະນັກງານ-ລັດຖະກອນໄດ້ດີຕະຫຼອດ ພ້ອມນີ້ ຜູ້ແທນເຂົ້້າຮ່ວມກອງປະຊຸມ ກໍ່ໄດ້ປະກອບຄໍາເຫັນຕໍ່ຮ່າງລາຍງານການເມືອງ, ທິດທາງແຜນການຕິດພັນກັບວຽກງານກວດກາ, ເພື່ອເຮັດໃຫ້ເນື້ອໃນເອກະສານຕ່າງໆສົມບູນຂຶ້ນ. ຈາກນັ້ນ, ຜູ້ແທນກອງປະຊຸມໄດ້ໃຊ້ສິດຂອງຕົນປ່ອນບັດເລືອກຕັ້ງເອົາ ຄະນະໜ່ວຍພັກຊຸດໃໝ່, ໂດຍມີຜູ້ລົງສະໝັກຮັບເລືອກຕັ້ງທັງໝົດ 03 ສະຫາຍ, ຍິງ 0 ສະຫາຍ, ເລືອກໄດ້ 02 ສະຫາຍ, ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກເອົາສະຫາຍ ສີໄວ ແສງດວງໃຈ ເປັນເລຂາໜ່ວຍພັກ, ສະຫາຍ ສີວັນ ບຸນປະຈິດ ເປັນຮອງ ເລຂາໜ່ວຍພັກ ທັງເປັນຜູ້ເຮັດວຽກງານກວດກາໜ່ວຍພັກ.