ພິທີເປີດຊຸດຝຶກອົບຮົມ ວຽກງານກວດກາລັດ ແລະ ຕ້ານການສໍ້ລາດບັງຫຼວງ ໃຫ້ແກ່ພະນັກງານວິຊາການທີ່ຮັບຜິດຊອບວຽກງານກວດກາລັດ ຈາກ ພະແນກເຕັກໂນໂລຊີ ແລະ ການສື່ສານ 7 ແຂວງພາກເໜືອ ຄື: ແຂວງຜົ້ງສາລີ, ບໍ່ແກ້ວ, ຫຼວງນ້ຳທາ, ຫຼວງພະບາງ, ຫົວພັນ, ໄຊຍະບູລີ ແລະ ອຸດົມໄຊ ພ້ອມດ້ວຍຕາງໜ້າບໍລິສັດທີ່ໃຫ້ບໍລິການດ້ານໂທລະຄົມມະນາຄົມ ພາຍໃນແຂວງອຸດົມໄຊ ໄດ້ຈັດຂຶ້ນໃນວັນທີ 7 ພຶດສະພາ 2024, ທີ່ຫ້ອງປະຊຸມ ພະແນກເຕັກໂນໂລຊີ ແລະ ການສື່ສານ ແຂວງ ອຸດົມໄຊ, ໂດຍການເປັນປະທານຮ່ວມ ຂອງ ທ່ານ ມັງກອນ ແກ້ວຄຳດີ ຮອງຫົວໜ້າກົມກວດກາ, ກະຊວງເຕັກໂນໂລຊີ ແລະ ການສື່ສານ ແລະ ທ່ານ ສົມບູນ ມະນີ ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ ອຸດົມໄຊ.

ການຈັດຝຶກອົບຮົມຄັ້ງນີ້ ເພື່ອຈັດຕັ້ງຜັນຂະຫຍາຍແນວທາງຂອງພັກ-ລັດ ກ່ຽວກັບການເປັນເຈົ້າການໃນການ ຈັດຕັ້ງປະຕິບັດວຽກງານກວດກາຂອງຄະນະພັກ, ຄະນະນຳ ແລະ ອົງການປົກຄອງທຸກຂັ້ນ ນັບແຕ່ສູນກາງລົງຮອດທ້ອງຖິ່ນ ລວມທັງ ເປັນການຍົກລະດັບຄວາມຮູ້, ຄວາມສາມາດ ໃຫ້ແກ່ພະນັກງານ ຈາກພະແນກເຕັກໂນໂລຊີ ແລະ ການສື່ສານ 7 ແຂວງພາກເໜືອ ທີ່ຮັບຜິດຊອບວຽກງານດັ່ງກ່າວ ໂດຍແນໃສ່ເຮັດໃຫ້ຜູ້ທີ່ໄດ້ຮັບການຝຶກອົບຮົມໃນຄັ້ງນີ້ ກຳໄດ້ຫຼັກການ, ເນື້ອໃນ, ວິທີການ, ຂັ້ນຕອນ ຂອງການຕິດຕາມ, ກວດກາ ພ້ອມທັງນຳໄປໝູນໃຊ້ເຂົ້າໃນການເຄື່ອນໄຫວຈັດຕັ້ງປະຕິບັດວຽກງານກວດກາຕົວຈິງຢູ່ໃນເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນດີ ແລະ ມີປະສິດທິພາບ ເຊິ່ງໄດ້ຮຽນຮູ້ຫຼາຍເນື້ອໃນ ເປັນຕົ້ນ ຄວາມຮູ້ພື້ນຖານກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກງານກວດກາລັດ, ການແກ້ໄຂຜົນການກວດກາ ແລະ ການຕິດຕາມການຈັດຕັ້ງປະຕິບັດຜົນຂອງການກວດກາ, ຄວາມຮູ້ພື້ນຖານກ່ຽວກັບວຽກງານຕິດຕາມ, ກວດກາ ໂຄງການລົງທຶນຂອງລັດ ເລີ່ມແຕ່ຫົວທີ, ການກວດກາໂຄງການລົງທຶນຂອງລັດ ແລະ ກົດໝາຍທີ່ກ່ຽວຂ້ອງ. ນອກນັ້ນ, ຍັງໄດ້ມີການສົນທະນາ ແລກປ່ຽນບົດຮຽນ ແລະ ຄຳຄິດ, ຄຳເຫັນຮ່ວມກັນ ເພື່ອເຮັດໃຫ້ສຳມະນາກອນຮັບຮູ້ ແລະ ເຂົ້າໃຈແຈ້ງຕໍ່ກັບບັນດາເນື້ອໃນທີ່ໄດ້ຮຽນຮູ້ໃນຄັ້ງນີ້ຕື່ມອີກ. ການຈັດຝຶກອົບຮົມໄດ້ດຳເນີນເປັນເວລາ 02 ວັນ.

ຂ່າວ: ຄານມະນີ ຮຽນດໍຈັນ