ໃນພິທີ ສະຫາຍ ດອນ ໄພວົງ ຄະນະພັກ ຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກໄດ້ຂຶ້ນຜ່ານບັນດາ ຄໍາສັ່ງ, ມະຕິ ຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກ ວ່າດ້ວຍການຍົກຍ້າຍ ແລະ ແຕ່ງຕັ້ງ ເລຂາຄະນະພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ( ຜູ້ເກົ່າ ) ແລະ ( ຜູ້ໃໝ່ ); ຈາກນັ້ນ, ສະຫາຍ ປອ ສອນທະນູ ທຳມະວົງ ໄດ້ຂຶ້ນຜ່ານບົດສະຫຼຸບການນໍາພາ-ຊີ້ນໍາວຽກງານຮອບດ້ານໄລຍະຜ່ານມາໃຫ້ຮູ້ວ່າ ພາຍຫຼັງກອງປະຊຸມໃຫຍ່ຄັ້ງທີ່ I ຂອງອົງຄະນະພັກ ສວສສຊ ແມ່ນໄດ້ສຸມໃສ່ຈັດຕັ້ງປະຕິບັດວຽກວິຊາສະເພາະຕາມພາລະບົດບາດ, ຕາມການມອບຂອງຂັ້ນເທິງ ແລະ ຮ່ວມມືກັບຕ່າງປະເທດ, ອົງການຈັດຕັ້ງສາກົນ ແລະ ອົງການຈັດຕັ້ງສັງຄົມພາຍໃນ ເປັນຕົ້ນ ວຽກງານຄົ້ນຄວ້າວິທະຍາສາດເສດຖະກິດ ແລະ ສັງຄົມຕາມພາລະບົດບາດ ແລະ ຮ່ວມມືກັບຕ່າງປະເທດ ແມ່ນໄດ້ສຸມໃສ່ຈັດຕັ້ງປະຕິບັດບັນດາໂຄງການຄົ້ນຄວ້າວິທະຍາສາດ ໂດຍການນໍາໃຊ້ງົບປະມານຂອງລັດ ພາກ 63 ແລະ 67 ທັງໝົດ 53 ໂຄງການ, ລວມມູນຄ່າປະມານ 4,8 ຕື້ກີບ. ປະຈຸບັນ ສໍາເລັດແລ້ວ 9 ໂຄງການ ລວມມູນຄ່າປະມານ 747 ລ້ານກີບ, ສໍາເລັດໂດຍພື້ນຖານແລ້ວ 15 ໂຄງການ ລວມມູນຄ່າປະມານ 1,5 ຕື້ກີບ ແລະ ກໍາລັງຢູ່ໃນຂັ້ນຕອນຈັດຕັ້ງປະຕິບັດທັງໝົດ 23 ໂຄງການ, ລວມມູນຄ່າ 1,9 ຕື້ກີບ; ວຽກສໍາມະນາວິທະຍາສາດຮ່ວມກັບສາກົນ, ຕ່າງປະເທດ ຜ່ານມາ ສວສສຊ ໄດ້ເຂົ້າຮ່ວມ ແລະ ພັດປ່ຽນໝູນວຽນກັນ ເປັນເຈົ້າພາບ ຈັດສໍາມະນາວິທະຍາສາດສາກົນ ພາຍໃຕ້ກອບການຮ່ວມມືຕ່າງໆ ເຊັ່ນ: ກອງປະຊຸມສໍາມະນາວິທະຍາສາດສາກົນ 3 ຊາດ (ລາວ, ຫວຽດນາມ, ກໍາປູເຈຍ), ກອງປະຊຸມສໍາມະນາວິທະຍາສາດສາກົນ 4 ສະຖາບັນ (LASES, VASS, RAC ແລະ KEI); ກອງປະຊຸມສໍາມະນາວິທະຍາສາດສາກົນສັງຄົມນິຍົມ; ກອງປະຊຸມສໍາມະນາວິທະຍາສາດສາກົນ 2 ຊາດ (ສປປ ລາວ ແລະ ສສ. ຫວຽດນາມ); ໄດ້ສໍາເລັດການຈັດກອງປະຊຸມເຜີຍແຜ່ຜົນການຄົ້ນຄວ້າລະດັບຊາດ ປະຈໍາປີ 2022, 2023 ແລະ ຜ່ານບັນດາທິດທາງແຜນການໃນຕໍ່ໜ້າ. ພ້ອມນີ້ ຍັງໄດ້ເຊັນບົດບັນທຶກມອບ-ຮັບໜ້າທີ່ ລະຫວ່າງສະຫາຍ ເລຂາຄະນະພັກ, ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ຜູ້ເກົ່າ) ແລະ (ຜູ້ໃໝ່).

ໃນໂອກາດດຽວກັນນີ້, ສະຫາຍ ປອ ຄຳພັນ ພົມມະທັດ ຍັງໄດ້ມີຄໍາເຫັນໂອ້ລົມ ກ່ອນອື່ນທ່ານໄດ້ສະແດງຄວາມຊົມເຊີຍຕໍ່ຜົນສໍາເລັດໃນການຈັດຕັ້ງປະຕິບັດວຽກງານຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃນໄລຍະຜ່ານມາ; ພ້ອມນີ້ ຍັງໄດ້ສະເໜີໃຫ້ຄະນະພັກ, ຄະນະນໍາ ຂອງສະຖາບັນ ສືບຕໍ່ຮັກສາມູນເຊື້ອຄວາມສາມັກຄີໃນການຈັດຕັ້ງປະຕິບັດວຽກງານ, ເສີມຂະຫຍາຍດ້ານດີ ຜົນສໍາເລັດ, ນໍາເອົາບົດຮຽນດັ່ງກ່າວ ເພື່ອໄປໝູນໃຊ້ເຂົ້າໃນການພັດທະນາວຽກງານວິຊາສະເພາະໃນຕໍ່ໜ້າ ໃຫ້ເກີດຜົນປະໂຫຍດສູງສຸດ ທັງຮັບປະກັນທາງດ້ານປະລິມານ, ຄຸນນະພາບ ຮັກສາໄດ້ລັກສະນະວິທະຍາສາດທີ່ທັນສະໄໝ, ພ້ອມກັນແກ້ໄຂບັນຫາທີ່ຍັງຄົງຄ້າງ ເພື່ອເຮັດໃຫ້ວຽກງານຄົ້ນຄວ້າ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ກ້າວໄປສູ່ຄວາມທັນສະໄໝ, ມີຜົນສໍາເລັດອັນຍິ່ງໃຫຍ່ ທຽບທັນກັບພາກພື້ນ ແລະ ສາກົນ.