ໃນວັນທີ 2 ພຶດສະພາ 2024, ຄະນະກວດກາເມືອງງາ, ແຂວງອຸດົມໄຊ ໄດ້ເປີດກອງປະຊຸມວຽກງານກວດກາປະຈໍາປີ 2023 ຂຶ້ນ, ຢູ່ທີ່ສະໂມສອນຂອງເມືອງງາ ພາຍໃຕ້ການເປັນປະທານຂອງ ສະຫາຍ ວຽງໄຊ ຄຳພະຈັນ ຄະນະປະຈຳພັກເມືອງ, ຮອງເລຂາພັກເມືອງ, ໂດຍໃຫ້ກຽດເຂົ້າຮ່ວມຂອງ ສະຫາຍ ນາງ ຈັນສະໝອນ ທິບພະຫົງ ຄະນະປະຈຳພັກແຂວງ, ປະທານກວດກາພັກແຂວງ, ມີບັນດາ ສະຫາຍຄະນະບໍລິຫານງານພັກເມືອງ, ຄະນະທີມງານຂອງແຂວງ, ເລຂາຄະນະພັກຮາກຖານກຸ່ມບ້ານ, ຄະນະໜ່ວຍພັກອ້ອມຂ້າງເມືອງ, ລັດວິສາຫະກິດ, ພະນັກງານຜູ້ເຮັດວຽກງານກວດກາ ແລະ ພະນັກງານຄະນະກວດກາເມືອງ ເຂົ້າຮ່ວມ ທັງໝົດ 55 ສະຫາຍ, ຍິງ 14 ສະຫາຍ.

ໃນກອງປະຊຸມ ສະຫາຍ ບຸນທີ ໄຊຍະວົງ ຄະນະປະຈໍາພັກເມືອງ, ປະທານກວດກາພັກ-ລັດເມືອງ ໄດ້ຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານຕິດຕາມ-ກວດກາໃນໄລຍະ 1 ປີຜ່ານມາ ແລະ ທິດທາງແຜນການສືບຕໍ່ໃນປີ 2024, ຈາກນັ້ນ ສະຫາຍ ເຊັ່ງຖໍ່ ສີດາວເພັດ ຮອງປະທານກວດກາພັກເມືອງ ໄດ້ເຜີຍແຜ່ ຄຳແນະນຳເລກທີ 331/ອກຫລ, ລົງວັນທີ 3 ຕຸລາ 2023 ກ່ຽວກັບການຈັດຕັ້ງະຕິບັດ ກົດໝາຍວ່າດ້ວຍການກວດກາລັດ ສະບັບປັບປຸງ ແລະ ສະຫາຍ ສຸວັນ ພົນອາສາ ຮອງປະທານຄະນະກວດກາພັກເມືອງ ໄດ້ເຜີຍແຜ່ ຄຳແນະນຳເລກທີ 379ຫ/ຄກສພ, ລົງວັນທີ 7 ພະຈິກ 2023 ກ່ຽວກັບການປັບປຸງການຈັດຕັ້ງຄະນະກວດກາພັກ ແລະ ອົງການກວດກາລັດແຕ່ລະຂັ້ນ. ຫຼັງຈາກນັ້ນ, ຜູ້ແທນກອງປະຊຸມແຕ່ລະພາກສ່ວນຍັງໄດ້ແລກປ່ຽນປະກອບຄຳຄິດ-ຄຳເຫັນຢ່າງກົງໄປກົງມາຕໍ່ບົດສະຫຼຸບວຽກງານຕິດຕາມ-ກວດກາ, ເດັ່ນກວ່າໝູ່ແມ່ນວຽກງານທີ່ດິນ, ວຽກງານປ່າໄມ້, ວຽກງານປ້ອງກັນຄວາມສະຫງົບ, ວຽກງານການສຶກສາ, ວຽກງານແຮງງານສະຫວັດດີການ-ສັງຄົມ( ສົ່ງເຄາະ) ແລະ ວຽກງາານການຄຸ້ມຄອງການດັດສົມລົດລັດ ດ້ວຍບັນຍາກາດຟົດຟື້ນທີ່ເຕັມໄປດ້ວຍຄວາມໝາຍສຳຄັນໃນກອງປະຊຸມຄັ້ງນີ້.