ໃນວັນທີ 12 ມັງກອນ 2024 ນີ້, ຄະນະກວດກາພັກ-ອົງການກວດກາລັດເມືອງໄຊເສດຖາ ແຂວງອັດຕະປື ໄດ້ຈັດພິທີເປີດຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາຂຶ້ນ, ຢູ່ທີ່ຄະນະກວດກາພັກເມືອງໄຊເສດຖາ, ໂດຍການເປັນປະທານ ຂອງ ທ່ານ ອຸດສະຫະ ກົມມະເມືອງ, ຮອງເລຂາພັກເມືອງ ປະທານຄະນະກວດກາພັກ, ປະທານອົງການກວດກາລັດເມືອງ, ມີບັນດາພະນັກງານກວດກາພາຍໃນເມືອງເຂົ້າຮ່ວມ.

ເພື່ອປະຕິບັດຕາມ ຂໍ້ຕົກລົງ ຂອງຄະນະຊີ້ນໍາການແຂ່ງຂັນ-ຍ້ອງຍໍ, ຮັກຊາດ ແລະ ພັດທະນາເມືອງ ສະບັບເລກທີ 821/ຄຊຂຍມ, ລົງວັນທີ 06 ທັນວາ 2023 ແລະ ຈັບມືກັນປະຕິບັດຕາມຄໍາຂວັນຂໍ້ແຂ່ງຂັນ " ຄະນະພັກນໍາພາເຂັ້ມແຂງຮອບດ້ານ, ເອົາການສະກັດກັ້ນ ແລະ ຕ້ານເປັນສໍາຄັນຕົ້ນຕໍ, ກວດກາທົ່ວເຖິງ ເລິກເຊີ່ງ ໂປ່ງໃສ ແກ້ໄຂບັນຫາຖືກຕ້ອງ, ເດັດຂາດ, ທັນການ ແລະ ເປັນທໍາ" ໂດຍຕິດພັນກັບວຽກງານວິຊາສະເພາະຕາມ 03 ແຜນງານ, 13 ໂຄງການ ແລະ 49 ແຜນວຽກ. ໃນພິທີ ທ່ານ ໂພສາ ທອງສະຫວັດ ຫົວໜ້າ ໜ່ວຍງານກວດກາລັດ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນໍາການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ, ຂໍ້ຕົກລົງ ວ່າດ້ວຍການຮັບຮອງເອົາເນື້ອໃນຂໍ້ແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ, ແຜນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ແຕ່ປີ 2021-2025. ເພື່ອເປັນການປຸກລະດົມກໍາລັງແຮງຂອງພະນັກງານ-ລັດຖະກອນພາຍໃນຂອງຕົນ ໃຫ້ເຊີດຊູນ້ຳໃຈຮັກຊາດ, ເອກະພາບ, ເປັນເຈົ້າຕົນເອງ, ເສີມຂະຫຍາຍຄວາມດຸໝັ່ນ, ປະຢັດ, ສັດຊື່, ອົດທົນ, ປະດິດສ້າງ ແລະ ແຂ່ງຂັນປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ, ສູ້ຊົນປະຕິບັດ ບັນດາຄາດໝາຍ ທີ່ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງ, ມະຕິກອງປະຊຸມໃຫຍ່ຄັ້ງທີ III ຂອງໜ່ວຍພັກຕົນ, ແຜນການພັດທະນາວຽກງານກວດກາຂັ້ນຂອງຕົນໄລຍະ 5 ປີ ໃຫ້ປະກົດຜົນເປັນຈິງ. ເພື່ອເປັນບ່ອນອີງໃນການຄັດເລືອກຜົນງານບຸກຄົນປະຈໍາປີ, 5 ປີ ເພື່ອນຳສະເໜີຂັ້ນເທິງພິຈາລະນາຍ້ອງຍໍ, ຊົມເຊີຍ. ພ້ອມດຽວກັນນີ້ ຍັງໄດ້ມອບໃບຍ້ອງຍໍ, ຊົມເຊີຍໃຫ້ແກ່ພະນັກງານ-ລັດຖະກອນ ທີ່ມີຜົນງານໃນການຈັດຕັ້ງປະຕິບັດວຽກງານ ປະຈໍາປີ 2022, ຈາກນັ້ນປະທານ, ຮອງປະທານ, ໜ່ວຍງານ, ກໍ່ໄດ້ຂຶ້ນຈັບມື ແລະ ລົງທະບຽນການແຂ່ງຂັນກັນອີກດ້ວຍ.