ໂດຍຕອບສະໜອງຕາມໜັງສືເຊື້ອເຊີນ ຂອງຄະນະພົວພັນຕ່າງປະເທດສູນກາງພັກກອມມູນິດຈີນ, ຄະນະຜູ້ແທນຂັ້ນສູງ ຂອງຄະນະກວດກາສູນກາງພັກ ເຊິ່ງນຳໂດຍ ສະຫາຍ ປອ. ຄຳພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານ ຄະນະກວດກາສູນກາງພັກ, ປະທານ ອົງການກວດກາແຫ່ງລັດ ແລະ ຫົວໜ້າ ອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ໄປຢ້ຽມຢາມ ແລະ ເຮັດວຽກ ຢູ່ ສປ ຈີນ, ໃນລະຫວ່າງວັນທີ 5-9 ທັນວາ 2023.

ຈຸດປະສົງຂອງການຢ້ຽມຢາມຄັ້ງນີ້ ເພື່ອເປັນການຈັດຕັ້ງປະຕິບັດ ຕາມແຜນການຮ່ວມມືປະຈຳປີຂອງສອງພັກ ກໍຄື ສອງອົງການກວດກາ ລາວ-ຈີນ, ເປັນການຈັດຕັ້ງປະຕິບັດຕາມເນື້ອໃນຈິດໃຈ ທີ່ເປັນເອກະພາບກັນ ຂອງການນໍາສູງສຸດ 2 ພັກ, 2 ລັດ, ທັງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ຕາມທິດ 4 ດີ ແລະ ການສ້າງເປັນຄູ່ຮ່ວມຊາຕາກຳ ລາວ-ຈີນ ໃຫ້ນັບມື້ນັບແຕກດອກອອກຜົນ ແລະ ສືບຕໍ່ກ້າວສູ່ລ່ວງເລິກ.

ພິທີສົ່ງຄະນະຜູ້ແທນດັ່ງກ່າວ ໄດ້ຈັດຂຶ້ນໃນຕອນເຊົ້າວັນທີ 5 ທັນວາ 2023, ໂດຍມີ ສະຫາຍ ວິໄລວັນ ບຸດດາຄຳ ຮອງປະທານຄະນະກວດກາສູນກາງພັກ ຕາງໜ້າຄະນະນຳ ຄະນະກວດກາສູນກາງພັກ ແລະ ສະຫາຍ ຫວາງຊ້າງ, ອຸປະທູດ ສະຖານທູດ ສປ ຈີນ ປະຈຳ ສປປ ລາວ ພ້ອມດ້ວຍຄະນະເຂົ້າຮ່ວມ.