ໃນວັນທີ 10 ມັງກອນ 2024 ນີ້, ທ່ານ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດຕະປື ໂດຍໃຫ້ກຽດຕ້ອນຮັບຂອງ ທ່ານ ພົຕ ວັນທອງ ກອງມະນີ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆອັດຕະປື ພ້ອມດ້ວຍຄະນະ.

ໃນການເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດຕະປືໃນຄັ້ງນີ້ ທ່ານ ປອ ຄໍາພັນ ພົມະທັດ ຍັງໄດ້ພົບປະໂອ້ລົມພະນັງງານຫຼັກແຫຼ່ງຂອງແຂວງອັດຕະປື, ໃນໂອກາດດັ່ງກ່າວ ທ່ານ ພົຕ ວັນທອງ ກອງມະນີ ໄດ້ລາຍ​ງານສະພາບລວມຂອງການຈັດຕັ້ງຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ, ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ພັກ​ແຂວງ​ກາງ​ສະ​ໄໝ, ການຈັດ​ຕັ້ງ​ປະຕິບັດ 2 ວາລະ​​ແຫ່ງ​ຊາດ ​ແລະ ວຽກ​ງານ​ກວດກາ​ ເຫັນວ່າ ລວມຍອດຜະລິດຕະພັນພາຍໃນ (GDP) ຂອງແຂວງຂະຫຍາຍຕົວ 6,77%, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນປະມານ 36 ລ້ານກວ່າກີບ ຫຼື 1.855 ໂດລາ; ສາມາດຈັດເກັບລາຍຮັບງົບປະມານພາຍໃນແຂວງບັນລຸໄດ້ 743 ຕື້ກວ່າກີບ; ມອບເຮືອນຢູ່ຖາວອນ 700 ຫຼັງໃຫ້ປະຊາຊົນທີ່ໄດ້ຮັບຜົນກະທົບ ຈາກເຂື່ອນໄຟຟ້າເຊປຽນ-ເຊນໍ້ານ້ອຍ ແຕກພັງ ທີ່ເມືອງສະໜາມໄຊ; ໄດ້ກວດກາການຊົດເຊີຍຜົນກະທົບໃຫ້ປະຊາຊົນຈາກເຂື່ອນໄຟຟ້າເຊປຽນ-ເຊນໍ້ານ້ອຍ ແຕກພັງ ເມືອງສະໜາມໄຊ ພົບເຫັນການໃຊ້ຈ່າຍບ້ວງເງິນບໍລິຈາກ ແລະ ເງິນຊົດເຊີຍທີ່ບໍ່ຖືກຕ້ອງ ຈໍານວນ 84 ຕື້ກວ່າກີບ ແລະ 100.000 ໂດລາ; ກວດກາໂຄງການ ທີ່ມີມູນຄ່າ 10 ຕື້ກີບຂຶ້ນໄປ ແລະ 10 ຕື້ກີບລົງມາ ຂອງແຂວງ ທັງໝົດ 239 ໂຄງການ, ມູນຄ່າ 1.922 ຕື້ກວ່າກີບ, ກວດກາຕົວຈິງມີ 165 ໂຄງການ; ໄດ້ຈັດ​ຕັ້ງ​ປະຕິບັດ 2 ວາລະ​​ແຫ່ງ​ຊາດ ໃນການ​ແກ້​ໄຂ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ-​ການ​ເງິນ ໂດຍໄດ້ຈັດຕັ້ງຜັນຂະຫຍາຍ ດໍາລັດວ່າດ້ວຍການປະຢັດຕ້ານການຟຸມເຟືອຍ. ນອກນີ້, ຍັງໄດ້ຍົກໃຫ້ເຫັນບາງບັນຫາທີ່ຍັງຄົງຄ້າງ ແລະ ທິດທາງແຜນການໃນການນໍາພາ-ຊີ້ນໍາວຽກງານຈຸດສຸມ ໃນປີ 2024 ແລະ ໃນຕອນບ່າຍຂອງວັນດຽວກັນ ທ່ານ ປອ ຄໍາພັນ ພົມມະທັດ ໄດ້ພົບປະໂອ້ລົມພະນັກງານກວດກາ ແຂວງ, ກວດກາ 5 ເມືອງ, ປະທານກວດກາຂອງຄະນະພັກຮາກຖານ ແລະ ຜູ້ກວດກາໜ່ວຍພັກອ້ອມຂ້າງແຂວງ, ໂດຍໄດ້ຮັບຟັງການລາຍງານສະພາບການເຄື່ອນໄຫວວຽກງານກວດກາ, ຕິດຕາມ ແກ້ໄຂຜົນການກວດກາ ຈາກ ທ່ານ ຄໍາຫວັນ ຈັນທະໂຄດ ຄະນະປະຈໍາພັກ ປະທານຄະນະກວດກາພັກ-ລັດ ແຂວງ ເຊິ່ງທ່ານໄດ້ໃຫ້ຮູ້ວ່າ ໄລຍະຜ່ານມາ ໄດ້ຊຸກຍູ້ໃຫ້ພະແນກການ, ອົງການທຽບເທົ່າ, ຂະແໜງກ່ຽວຂ້ອງ ປະຕິບັດການແກ້ໄຂຜົນການກວດກາ ມີຜົນສໍາເລັດຫຼາຍດ້ານ. ພ້ອມນີ້ ຍັງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ຂອງການເຄື່ອນໄຫວວຽກງານກວດກາ ແລະ ບາງຄໍາສະເໜີຕໍ່ຂັ້ນເທິງ.

​ໂອກາດດຽວກັນນີ້ ທ່ານ ປອ ຄໍາພັນ ພົມມະທັດ ຍັງໄດ້ໃຫ້ກຽດໂອ້ລົມໃຫ້ທິດຊີ້ນໍາ ຕໍ່ພະນັກງານຫຼັກແຫຼ່ງ ແລະ ພະນັກງານ ທີ່ເຮັດວຽກງານພາຍໃນແຂວງອັດຕະປື ໂດຍທ່ານ ໄດ້ເນັ້ນໜັກໃຫ້ ຄະນະພັກ ແລະ ຄະນະກວດກາທຸກຂັ້ນ ຕ້ອງພ້ອມກັນເປັນເຈົ້າການໃນການແກ້ໄຂບັນຫາໃນດ້ານຕ່າງໆ ຕາມຂອບເຂດຄວາມຮັບຜິດຊອບຂອງຕົນ ດ້ວຍຄວາມຮັບຜິດຊອບສູງ, ຍົກສູງບົດບາດ ແລະ ເພີ່ມທະວີໃນວຽກງານກວດກາໃຫ້ເຂັ້ມແຂງ, ມີປະສິດທິພາບ ເພື່ອເປັນເຄື່ອງມືໃນການຟື້ນຟູຄວາມເຊື່ອໝັ້ນ, ຄວາມສັດທາຂອງສັງຄົມ, ຕ້ອງສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ໃນວຽກງານກວດກາ, ເພີ່ມທະວີການກວດກາທາງດ້ານການເມືອງ, ລະບຽບວິໄນ ຄຽງຄູ່ກັບການສຶກສາອົບຮົມດ້ານການເມືອງແນວຄິດ ຕິດພັນກັບການແກ້ໄຂຜົນຂອງການກວດກາ, ສືບຕໍ່ເປັນເຈົ້າການຈັດຕັ້ງນໍາພາປຸກລະດົມຂະບວນການການເມືອງຂອງມະຫາຊົນຕິດພັນກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ, ສຸມໃສ່ແກ້ໄຂບັນຫາປະກົດການສໍ້ລາດບັງຫຼວງ, ຕິດຕາມ-ກວດກາ ການເຊື່ອມຊຶມຜັນຂະຫຍາຍເນື້ອໃນຈິດໃຈຂອງບັນດາມະຕິສໍາຄັນ ຂອງພັກ, ຕ້ອງປະເມີນຢ່າງລະອຽດ ແລະ ຖອດຖອນເອົາບົດຮຽນຈາກພຶດຕິກໍາຕົວຈິງ ເພື່ອມເປັນບ່ອນອີງໃນການປັບປຸງວຽກງານກວດກາໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນກວ່າເກົ່າ.