ວັນທີ 02 ກຸມພາ 2024 ນີ້, ກະຊວງເຕັກໂນໂລຊີ ແລະ ການສື່ສານ ໄດ້ຈັດພິທີປິດຊຸດຝຶກອົບຮົມວຽກງານກວດກາພັກ-ລັດ ຊຸດທີ 1 ຂຶ້ນທີ່ຫ້ອງປະຊຸມຊັ້ນ 5 (ຕຶກສີສະເກດ), ໂດຍການເປັນປະທານ ຂອງທ່ານ ໄຊລືຊາ ອິນສີຊຽງໃໝ່ ຄະນະປະຈໍາພັກກະຊວງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ. ມີຄະນະໜ່ວຍພັກບັນດາກົມ, ທຽບເທົ່າກົມອ້ອມຂ້າງກະຊວງ, ຄະນະອໍານວຍການ ບັນດາບໍລິສັດທີ່ຂຶ້ນກັບກະຊວງ, ຄະນະພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ, ຄະນະຮັບຜິດຊອບ ແລະ ນັກສຳມະນາກອນ ເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ເຮີເຊັງ ເຢຍປໍເຮິ, ກຳມະການຄະນະພັກກະຊວງ, ຮອງປະທານຄະນະກວດກາພັກ, ຫົວໜ້າກົມກວດກາກະຊວງ ໄດ້ຜ່ານບົດລາຍງານກ່ຽວກັບຜົນສຳເລັດການຈັດຝຶກອົບຮົມວຽກງານກວດກາພັກ-ລັດ ຊຸດທີ 1 ໃນຄັ້ງນີ້, ເຊິ່ງໄດ້ດຳເນີນມາແຕ່ວັນທີ 22 ມັງກອນ ຫາ 02 ກຸມພາ 2024 (ຈໍານວນ 10 ວັນລັດຖະການ) ດ້ວຍຜົນສໍາເລັດອັນຈົບງາມ. ຜ່ານການຝຶກອົບຮົມ ເຮັດໃຫ້ນັກສໍາມະນາກອນ ໄດ້ເຂົ້າໃຈ ແລະ ຮຽນຮູ້ ກ່ຽວກັັບບົດຮຽນການເຄື່ອນໄຫວວຽກງານຕິດຕາມ, ກວດກາພັກ-ລັດ ຢ່າງເລິກເຊິ່ງກວ່າເກົ່າ, ເຫັນໄດ້ຄວາມໝາຍຄວາມສໍາຄັນຕໍ່ວຽກງານຕິດຕາມ, ກວດກາຢ່າງຈະແຈ້ງ. ໂດຍສະເພາະວຽກງານຕິດຕາມ, ກວດກາພັກ, ກວດກາລັດ ເປັນວຽກໜຶ່ງທີ່ຕ້ອງໄດ້ເຮັດເປັນປົກກະຕິ, ເປັນປະຈໍາ ແລະ ຕໍ່ເນື່ອງ. ວຽກງານກວດກາເປັນເຄື່ອງມືທີ່ສຳຄັນ ຊອກໃຫ້ເຫັນດ້ານດີທີ່ຕັ້ງ ໜ້າເພື່ອເສີມຂະຫຍາຍ ແລະ ຊອກໃຫ້ເຫັນດ້ານອ່ອນຂໍ້ຄົງຄ້າງເພື່ອປັບປຸງແກ້ໄຂໃຫ້ທັນເວລາ; ນອກນັ້ນ, ນັກສໍາມະນາກອນຍັງໄດ້ພ້ອມກັນແລກປ່ຽນບົດຮຽນ ແລະ ປະສົບການຕົວຈິງ ນຳບັນດາທ່ານ ຄູອາຈານຈາກຄະນະກວດກາສູນກາງພັກ, ອົງການກວດກາແຫ່ງລັດ ທີ່ມີປະສົບການ, ບົດຮຽນທີ່ຫຼາກຫຼາຍ ແລະ ລະຫວ່າງນັກສໍາມະນາກອນດ້ວຍກັນ ເຊິ່ງເປັນຂໍ້ມູນພື້ນຖານອັນສໍາຄັນ ແລະ ຄວາມຮູ້ອັນລໍ້າຄ່າ, ສາມາດນຳໄປຈັດຕັ້ງຜັນຂະຫຍາຍ ແລະ ໝູນໃຊ້ເຂົ້າໃນການເຄື່ອນໄຫວວຽກງານຕິດຕາມ, ກວດກາຕົວຈິງຂອງຕົນ. ຫຼັງຈາກນັ້ນ ທ່ານ ພຸດທະສັກ ບຸນສຸດທະວີ ຮອງຫົວໜ້າພະແນກສັງລວມ ແລະ ແກ້ໄຂຄໍາຮ້ອງທຸກ ຍັງໄດ້ຂຶ້ນຜ່ານ ຂໍ້ຕົກລົງ ວ່າດ້ວຍການອອກໃບຢັ້ງຢືນໃຫ້ນັກຝຶກອົບຮົມ ທີ່ເຂົ້າຮ່ວມຝຶກອົບຮົມວຽກງານກວດກາພັກ-ລັດ ຊຸດທີ I ຢູ່ກະຊວງເຕັກໂນໂລຊີ ແລະ ການສື່ສານອີກດ້ວຍ.

ໂອກາດນີ້, ທ່ານ ໄຊລືຊາ ອີນສີຊຽງໃໝ່ ໄດ້ໃຫ້ກຽດມອບໃບຢັ້ງຢືນ ໃຫ້ແກ່ນັກສໍາມະນາກອນທີ່ເຂົ້າຮ່ວມຝຶກອົບຮົມໃນຄັ້ງນີ້ ທັງໝົດ 41 ທ່ານ, ຍິງ 21 ທ່ານ. ພ້ອມນີ້ທ່ານ ຍັງໄດ້ສະແດງຄວາມຂອບໃຈມາຍັງຄະນະກວດກາສູນກາງພັກ, ອົງການກວດກາແຫ່ງລັດ, ທີ່ໄດ້ໃຫ້ການຮ່ວມມື ແລະ ຕອບສະໜອງນັກວິທະຍາກອນ, ເອກະສານບົດຮຽນສໍາລັບການຝືກອົບຮົມ ແລະ ປະກອບສ່ວນບໍາລຸງ-ກໍ່ສ້າງ ສະມາຊິກພັກ, ພະນັກງານ-ລັດຖະກອນ ຜູ້ທີ່ເຮັດວຽກງານກວດກາ ຂອງບັນດາໜ່ວຍພັກ ທີ່ຂຶ້ນກັບອົງຄະນະພັກກະຊວງເຕັກໂນໂລຊີ ແລະ ການສື່ສານ ໃຫ້ມີຄວາມໜັກແໜ້ນ, ເຂັ້ມແຂງ. ພ້ອມທັງເນັ້ນຕື່ມວ່າ ການສ້າງຖັນແຖວພະນັກງານກວດກາ ຕ້ອງເລີ່ມຈາກກຄວາມຕ້ອງການຂອງໜ້າທີ່ການເມືອງ ແລະ ສະພາບຄວາມເປັນຈິງຂອງຖັນແຖວພະນັກງານ, ຖືສໍາຄັນທາງດ້ານຄຸນນະພາບ, ຮັບປະ ກັນບົດບາດການນໍາພາຂອງພັກ ໃຫ້ສືບຕໍ່ມີຄວາມໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ, ແບບແຜນ ນໍາພາ, ຄວາມຮັບຜິດຊອບໜ້າທີ່ການເມືອງ, ມີຄວາມຮູ້, ຄວາມສາມາດ ແລະ ສ້າງໃຫ້ເປັນລະບົບຕໍ່ເນື່ອງ, ໂຄງປະ ກອບພະນັກງານກໍ່ຕ້ອງສົມສ່ວນກັນລະຫວ່າງ ພະນັກງານແຕ່ລະຂັ້ນ ເພື່ອຕອບສະໜອງຄວາມຮຽກຮ້ອງຕ້ອງການ ຂອງໜ້າທີ່ວຽກງານກວດກາ ໃນຕໍ່ໜ້າ ແລະ ຍາວນານ ແລະ ຮຽກຮ້ອງມາຍັງນັກສໍາມະນາກອນທຸກທ່ານ ເອົາໃຈ ໃສ່ ນໍາເອົາບັນດາບົດຮຽນທີ່ສໍາຄັນດັ່ງກ່າວ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນຢ່າງປະດິດສ້າງ ເພື່ອຍົກສູງວຽກງານຕິດຕາມ, ກວດກາ ຂອງກະຊວງເຕັກໂນໂລຊີ ແລະ ການສື່ສານ ໃຫ້ມີຄວາມໜັກແໜ້ນ, ເຂັ້ມ ແຂງ, ຖືກຕ້ອງ ແລະ ມີຜົນສັກສິດຍິ່ງຂຶ້ນ.

ຊຸດຝຶກອົບຮົມຄັ້ງນີ້ ໄດ້ດຳເນີນໄປດ້ວຍຜົນສຳເລັດອັນຈົບງາມ ເຊິ່ງໃນຕອນທ້າຍ ທ່ານ ພຸດທະສັກ ບຸນສຸດທະວີ ຮອງຫົວໜ້າພະແນກສັງລວມ ແລະ ແກ້ໄຂຄໍາຮ້ອງທຸກ ໃນນາມຕາງໜ້າໃຫ້ຄະນະຮັບຜິດຊອບພິທີ ໄດ້ກ່າວສະແດງຄວາມຂອບໃຈຕໍ່ ສະຫາຍປະທານກອງປະຊຸມ, ຄູອາຈານ, ຄະນະຮັບຜິດຊອບ ແລະ ແຂກຖືກເຊີນ.