ໃນວັນທີ 20 ກຸມພາ 2024 ນີ້, ທ່ານ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ຈອງຢອງຊູ ເອກອັກຄະລັດຖະທູດ ຜູ້ມີອໍານາດເຕັມ ແຫ່ງສາທາລະນະລັດ ສ.ເກົາຫຼີ ປະຈໍາ ສປປ ລາວ ພ້ອມຄະນະ, ທີ່ຫ້ອງຮັບແຂກ ຄະນະກວດກາສູນກາງພັກ ( ຫຼັກ 6 );

ໂອກາດດັ່ງກ່າວ, ທ່ານ ຄຳພັນ ພົມມະທັດ ໄດ້ກ່າວສະແດງຄວາມຕ້ອນຮັບ ແລະ ຊົມເຊີຍຕໍ່ທ່ານທູດທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສ. ເກົາຫຼີ ຄົນໃໝ່ປະຈຳ ສປປ ລາວ ການເຂົ້າຢ້ຽມຂໍ່ານັບໃນຄັ້ງນີ້ ແມ່ນມີຄວາມໝາຍ, ຄວາມສໍາຄັນ ທັງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນຮ່ວມມື ລະຫວ່າງສອງປະເທດ ລາວ - ສ. ເກົາຫຼີ ທີ່ມີມາແຕ່ດົນນານໃຫ້ແໜ້ນແຟ້ນຍິ່ງຂຶ້ນ. ໂດຍສະເພາະການເຄື່ອນໄຫວ ອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງ ກັບ ສ ເກົາຫຼີ ໃນໄລຍະຜ່ານມາ ພະນັກງານຂອງພວກເຮົາໄດ້ເຂົ້າຮ່ວມກອງປະຊຸມສຳມະນາ ແລະ ຝຶກອົບຮົບຫຼາຍຄັ້ງ ໂດຍການໃຫ້ທຶນຂອງປະເທດເຈົ້າພາບ ແລະ ຈັດຝຶກອົບຮົບ ໃນຫົວຂໍ້: ການຕ້ານການສໍ້ລາດບັງຫຼວງ ຢູ່ທີ່ ສ ເກົາຫຼີ, ໃນຕໍ່ໜ້າອົງການກວດກາແຫ່ງລັດ ມີຄວາມຍິນດີທີ່ຈະຂະຫຍາຍການພົວພັນຮ່ວມມືກັບອົງການຕ້ານການສໍ້ລາດບັງຫຼວງ ໃນພາກພື້ນ ແລະ ສາກົນ ເພື່ອການແລກປ່ຽນຂໍ້ມູນຂ່າວສານ, ບົດຮຽນຈາກປະເທດທີ່ພັດທະນາ ແລະ ມີຄວາມເຂັ້ມແຂງທາງດ້ານວຽກງານຕ້ານການສໍ້ລາດບັງຫຼວງ ເຊັ່ນ ສ ເກົາຫຼີ. ທ່ານທູດ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງກ່າວຢືນຢັນຈະຕັ້ງໜ້າສືບຕໍ່ປະກອບສ່ວນເຂົ້າໃນການພົວພັນຮ່ວມມືທີ່ດີລະຫວ່າງ ສ ເກົາຫຼີ ແລະ ສປປ ລາວ ໃຫ້ນັບມື້ແໜ້ນແຟ້ນຂະຫຍາຍຕົວຍິ່ງຂຶ້ນ.