ໃນພິທີປິດຊຸດຝຶກອົບຮົມຄັ້ງນີ້, ທ່ານ ນ. ໄກມະນີ ອໍລະບຸນ, ກຳມະການຄະນະພັກກະຊວງ, ຮອງປະທານຄະນະກວດກາພັກ, ຫົວໜ້າກົມກວດກາ ໄດ້ຜ່ານບົດລາຍງານກ່ຽວກັບຜົນການຈັດຝຶກອົບຮົມວຽກງານກວດກາ ໃນຄັ້ງນີ້, ເຊິ່ງໄດ້ດຳເນີນມາແຕ່ວັນທີ 28 ສິງຫາ-11 ກັນຍາ 2023 (11 ວັນ) ດ້ວຍຜົນສຳເລັດອັນຈົບງາມ. ຜ່ານການຝຶກອົບຮົມ ເຮັດໃຫ້ນັກສຳມະນາກອນໄດ້ຍົກສູງຄວາມຮັບຮູ້ ແລະ ເຂົ້າໃຈ ກ່ຽວກັັບການເຄື່ອນໄຫວວຽກງານຕິດຕາມ, ກວດກາຢ່າງເລິກເຊິ່ງກວ່າເກົ່າ, ເຫັນໄດ້ຄວາມໝາຍຄວາມສໍາຄັນຕໍ່ວຽກງານຕິດຕາມ, ກວດກາຢ່າງຈະແຈ້ງ. ໂດຍສະເພາະວຽກງານຕິດຕາມ, ກວດກາ ເປັນວຽກໜຶ່ງທີ່ຕ້ອງໄດ້ເຮັດເປັນປົກກະຕິ ຕໍ່ເນື່ອງ ແລະ ການຕິດຕາມ, ກວດກາເປັນເຄື່ອງມືທີ່ສຳຄັນ ເພື່ອຊ່ວຍເຕືອນ ແລະ ແກ້ໄຂບັນຫາໄດ້ຢ່າງທັນການ; ນອກນັ້ນ, ນັກສໍາມະນາກອນຍັງໄດ້ພ້ອມກັນແລກປ່ຽນບົດຮຽນ ແລະ ປະສົບການຕົວຈິງນຳບັນດາອາຈານ ແລະ ນັກສໍາມະນາກອນດ້ວຍກັນ ທີ່ມີປະສົບການ ແລະ ບົດຮຽນຫຼາກຫຼາຍ ເຊິ່ງເປັນຂໍ້ມູນພື້ນຖານອັນສໍາຄັນ ແລະ ຄວາມຮູ້ອັນລໍ້າຄ່າ ເຊິ່ງສາມາດນຳໄປຈັດຕັ້ງຜັນຂະຫຍາຍ ແລະ ນຳໃຊ້ເຂົ້າໃນການເຄື່ອນໄຫວວຽກງານຕິດຕາມ, ກວດກາຕົວຈິງ.

ໃນໂອກາດດັ່ງກ່າວນີ້, ທ່ານ ຕິ່ງ ສຸກສັນ, ປະທານກອງປະຊຸມ ໄດ້ໃຫ້ກຽດມອບໃບຢັ້ງຢືນ ໃຫ້ແກ່ນັກສໍາມະນາກອນທີ່ເຂົ້າຮ່ວມຝຶກອົບຮົມ ທັງໝົດ 32 ທ່ານ, ຍິງ 16 ທ່ານ. ພ້ອມນີ້ທ່ານ ຍັງໄດ້ສະແດງຄວາມຂອບໃຈມາຍັງຄະນະກວດກາສູນກາງພັກ ແລະ ອົງການກວດກາແຫ່ງລັດ, ຄະນະອົງການກວດສອບແຫ່ງລັດ ແລະ ອົງການໄອຍະການປະຊາຊົນສູງສຸດ ທີ່ໄດ້ໃຫ້ການຮ່ວມມື ແລະ ອຳນວຍຄວາມສະດວກໃນການຕອບສະໜອງນັກວິທະຍາກອນ, ເອກະສານບົດຮຽນ ແລະ ປະກອບສ່ວນບໍາລຸງ-ກໍ່ສ້າງ ສະມາຊິກພັກ-ພະນັກງານ ທີ່ເຮັດວຽກງານກວດກາ ຂອງບັນດາໜ່ວຍພັກ ທີ່ຂື້ນກັບອົງຄະນະພັກກະຊວງການຕ່າງປະເທດ ໃຫ້ມີຄວາມເຂັ້ມແຂງ. ພ້ອມນັ້ນ, ທ່ານຍັງໄດ້ເນັ້ນໃຫ້ບັນດານັກສໍາມະນາກອນທຸກທ່ານ ເອົາໃຈໃສ່ນໍາເອົາບົດຮຽນທີ່ສໍາຄັນດັ່ງກ່າວ ໄປໝູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນ ເພື່ອຍົກສູງວຽກງານຕິດຕາມ, ກວດກາ ຂອງກະຊວງການຕ່າງປະເທດ ໃຫ້ມີຄວາມເຂັ້ມແຂງ, ຖືກຕ້ອງ ແລະ ມີຜົນສັກສິດຍິ່ງຂຶ້ນ.

ຊຸດຝຶກອົບຮົມຄັ້ງນີ້ ໄດ້ດຳເນີນໄປດ້ວຍຜົນສຳເລັດອັນຈົບງາມ ເຊິ່ງໃນຕອນທ້າຍ ທ່ານ ເທບຖາວອນ ແສງມະນີ, ກຳມະການໜ່ວຍພັກ, ຮອງຫົວໜ້າກົມສົນທິສັນຍາ ແລະ ກົດໝາຍ ໃນນາມຕາງໜ້າໃຫ້ນັກສຳມະນາກອນ ໄດ້ກ່າວສະແດງຄວາມຂອບໃຈຕໍ່ທ່ານປະທານກອງປະຊຸມ, ຄູອາຈານ ແລະ ແຂກຖືກເຊີນ ພ້ອມທັງຮັບເອົາບັນດາທິດນໍາ ແລະ ຄໍາເຫັນຕ່າງໆ, ການຖ່າຍທອດບົດຮຽນຕ່າງໆ ຈາກຊຸດຝຶກອົບຮົມໃນຄັ້ງນີ້, ເພື່ອນໍາໄປໜູນໃຊ້ເຂົ້າໃນວຽກງານຕົວຈິງໃຫ້ເກີດດອກອອກຜົນ.