ໃນພີທີ ທ່ານ ປະເດີມພອນ ສົນທະນີ ໄດ້ໃຫ້ກຽດຂຶ້້ນ ປາຖະກະຖາວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 41 ປີ (16/02/1982-16/02/2023) ໂດຍທ່ານໄດ້ຍົກໃຫ້ເຫັນປະຫວັດການເຕີບໃຫຍ່ຂະຫຍາຍຕົວຂອງອົງການກວດກາພັກ-ລັດສປປ ລາວ, ບັນດາຜົນງານການເຄື່ອນໄຫວວຽກງານກວດກາໃນແຕ່ລະໄລຍະ, ດ້ານດີ, ດ້ານອ່ອນ-ຂໍ້ຄົງຄ້າງ, ບາງບົດຮຽນທີ່ຖອດຖອນໄດ້ ແລະ ທິດທາງແຜນການເຄື່ອນໄຫວວຽກງານກວດກາໃນຕໍ່ໜ້າ. ຈາກນັ້ນ, ຍັງໄດ້ເຜີຍແຜ່ເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະເທດ ປະຈໍາປີ 2022; ບົດໂອ້ລົມຂອງທ່ານ ປອ ຄໍາພັນ ພົມມະທັດ ປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ ຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2022.

ໂອກາດດຽວກັນນີ້, ທ່ານ ປະເດີມພອນ ສົນທະນີ ຍັງໄດ້ຜ່ານບົດສະຫຼຸບການເຄື່ອນໄຫວວຽກງານກວດກາຂອງກະຊວງ ໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ໂດຍທ່ານໃຫ້ຮູ້ວ່າ: ໃນໄລຍະຜ່ານມາ ຄະນະພັກ, ຄະນະນຳ ຂອງກະຊວງ ຮສສ ແມ່ນໄດ້ຖືສຳຄັນ ແລະ ເອົາໃຈໃສ່ຢ່າງຕັ້ງໜ້າຕໍ່ກັບວຽກງານກວດກາ ເປັນຕົ້ນ ໄດ້ສຳເລັດບັ້ນເປີດກອງປະຊຸມທາບທາມຄວາມເຊື່ຶອໝັ້ນໄວ້ວາງໃຈຕໍ່ຄະນະພັກ ກະຊວງ ກາງສະໄໝ ແລະ ໄດ້ດໍາເນີນຊີວິດການເມືອງບັນດາໜ່ວຍພັກສໍາເລັດ ທັງໝົດ 11 ໜ່ວຍພັກ; ການກວດກາລັດ ແມ່ນໄດ້ກວດກາໂຄງການລົງທຶນຂອງລັດ ທີ່ມີມູນຄ່າຕ່ຳກວ່າ 10ຕື້ລົງມາ ຈຳນວນ 17 ໂຄງການ, ລວມມູນຄ່າ 81,584,524,500 ກີບ, ໃນນັ້ນ, ຊໍາລະແລ້ວ 29,285,378,000 ກີບ, ຍັງຄ້າງຊຳລະ ຈຳນວນ 52,299,146,500 ກີບ, ໂຄງການຂອງກະຊວງ 01 ໂຄງການ, ໂຄງການຂອງກະຊວງ ແລະ ແຂວງ ໂດຍແບ່ງກັນ 40/60 ມີ 01 ໂຄງການ ແລະ ໂຄງການຂອງແຂວງ 100% ມີ 14 ໂຄງການ; ກວດກາແກ້ໄຂຂໍ້ສະເໜີແນະຂອງອົງການກວດສອບແຫ່ງລັດ ຕາມຜົນການກວດສອບປະຈໍາປີ 2018ຢູ່ກະຊວງ ຮສສ ທັງໝົດ 09ກໍລະນີ, ແກ້ໄຂຂາດໂຕແລ້ວ 05ກໍລະນີ, ຍັງພວມສືບຕໍ່ແກ້ໄຂ 04ກໍລະນີ;ໄດ້ມອບ-ໂອນສໍານວນເອກະສານແຈ້ງຊັບສິນ ຂອງພະນັກງານ-ລັດຖະກອນ ອົງການກາແດງແຫ່ງຊາດລາວ, ຈຳນວນ 105 ທ່ານ, ຍິງ 57 ທ່ານ; ສໍາເລັດການລາຍງານກ່ຽວກັບການຄົ້ນຄວ້າແກ້ໄຂຄໍາຮ້ອງ-ຄໍາສະເໜີຂໍຄວາມເປັນທໍາໄດ້ຈໍານວນໜື່ງ ຕໍ່ຄະນະນໍາກະຊວງ. ພ້ອມນີ້, ຍັງໄດ້ຍົກໃຫ້ເຫັນດ້ານດີອັນພົ້ນເດັ່ນ, ດ້ານອ່ອນ-ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການເຄື່ອນໄຫວໃນ 6 ເດືອນທ້າຍປີ 2023.

ຂ່າວ: ຄໍາຫວັນ